“Erməni faşizmi məhv edilib, ancaq onun təzahürləri görünməkdədir”. Bunu Prezident İlham Əliyev Anım Günü ilə əlaqədar xalqa müraciəti zamanı deyib.
Dövlət başçısı bildirib ki, 44 gün ərzində biz təkcə öz ərazi bütövlüyümüzü bərpa etmədik: “Təkcə düşməni torpağımızdan qovmadıq, təkcə milli ləyaqətimizi bərpa etmədik, biz erməni faşizminin başını əzdik. Bu gün azad edilmiş torpaqlara gələn hər bir insan erməni vəhşiliyinin təzahürlərini öz gözləri ilə görür. Erməni faşizmi məhv edilib, ancaq onun təzahürləri görünməkdədir. Bu çox təhlükəli tendensiyadır, ilk növbədə, Ermənistan dövləti üçün. Mən bunu demişəm, bu gün Anım Günündə şəhidlərimizin əziz xatirəsi önündə bir daha deyirəm, əgər biz görsək ki, erməni faşizmi baş qaldırır, əgər biz görsək ki, xalqımıza, dövlətimizə yeni təhlükə mənbəyi yaranır, heç tərəddüd etmədən erməni faşizminin başını bir daha əzəcəyik. Bunu hər kəs bilsin! Müharibənin və Qələbənin rəmzi olan “Dəmir yumruq” yerindədir, bunu heç kim unutmasın!”.
Görünən odur ki, erməni faşizmi hələ də tam aradan qalxmayıb və təhlükəli bir ideologiya kimi qalmaqdadır. O üzdən, dünya buna son dərəcə ciddi yanaşmalıdır.
Maraqlıdır, erməni faşizminin təzahürləri nədir? Hansı formada özünü göstərir?
“Kənardakı harınlamış erməni diasporu yenə öz bildiyini edir, erməniləri revanşizm əhval-ruhiyyəsi ilə zəhərləyir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, erməni faşizminin təzahürləri müxtəlif formalarda özünü göstərir: “Onlar hər şeyi öz adlarına çıxarmağa, başqa xalqlara aid olan nə varsa onu oğurlamağa çalışırlar. Hər zaman arxadan zərbə vurmağa fürsət axtarırlar. Bir məqamı da diqqətdən qaçırmaq olmaz ki, kənardan erməni faşizmini qidalandıran dairələr var. Bu, Fransada, ABŞ-da, Rusiyada var. Yəni Ermənistan müharibədən məğlub çıxdığı üçün əhalisi səfil vəziyyətdədir. Ancaq kənardakı harınlanmış erməni disporu isə, yenə öz bildiyini edir. Yenə erməniləri revanşizm əhval-ruhiyyəsi ilə zəhərləyir. Bax, bütün bunlar erməni faşizminin təzahürləridir. Prezidentin də mesajı birbaşa erməni xalqınadır ki, bu cür duyğularla yaşamağın axırı pis olacaq. Belə tendensiyalardan uzaq olun. Sizin üçün xoşbəxt gələcək regionda dayanıqlı sülhdür, nəqliyyat və kommunikasiya xəttlərinin açılmasıdır, iqtisadi inkişafdır. Ona görə də Prezident İlham Əliyev qeyd edir ki, erməni faşizminin təzahürləri qalır. Bütün bunlarla yanaşı, biz hər zaman ayıq-sayıq olmalıyıq. Çünki biz neçə illərdir ki, erməni faşizmindən əziyyət çəkirik. Bir xəbərdarlıqla erməni faşizmi aradan qalxmayacaq. Zaman-zaman bu istiqamətdə səyləri artırmaq lazımdır. Zamanla yeni düşüncəli insanlar, ziyalılar yetişməlidir”.
Professor, nə qədər ki, erməni faşizmi tam aradan qalxmayıb, Azərbaycan xalqının hər zaman bu təhlükələrə hazır olmasını tövsiyə etdi.
Vidadi ORDAHALLI
