Prezident İlham Əliyev Türkiyənin "Anadolu" agentliyinə müsahibəsində Iranın ünvanına sərt tənqidlər səsləndirib. Prezident bildirib ki, İran TIR-larının qanunsuz olaraq Qarabağ bölgəsinə getməsi birinci dəfə baş vermir:
“Bu, işğal dövründə də dəfələrlə olan hadisələrdir. Bu TIR-lar müntəzəm olaraq ora gedirdi. Bizim məlumatımız var idi. Ancaq indiki qədər dəqiq məlumat, əlbəttə ki, yox idi. Bunu nəzərə alaraq biz müxtəlif kanallarla İran tərəfinə narazılığımızı ifadə edirdik. Amma bu proses davam edirdi. Müharibə başa çatandan sonra artıq Laçın dəhlizi bizim gözümüzün önündədir. Bizim hərbi mövqelərimizdən Xankəndiyə gedən yola məsafə bəlkə də 5-6 metrdir. Biz Laçın dəhlizi boyunca, o cümlədən, Şuşa ətrafında və digər yerlərdə kifayət qədər texniki imkanlara malikik. Kameralar var. Peykdən istifadə edirik, dronlardan istifadə edirik. Biz yenə gördük ki, bu TIR-lar müharibədən sonra da ora getməyə davam edir. Belə olan halda mən Prezident Administrasiyasının əməkdaşlarına göstəriş verdim ki, İranın Azərbaycandakı səfiri ilə danışsınlar. Biz bunu rəsmiyyətə salmaq istəmirik. Dostcasına danışsınlar və desinlər ki, buna son qoyulmalıdır. Bu bizə qarşı hörmətsizlikdir. Azərbaycanın ərazi bütövlüyünə qarşı hörmətsizlikdir, buna son qoyulmalıdır”.
İlham Əliyev müsahibəsində daha sonra deyib: “O ki qaldı bizim sərhədimizin yaxınlığında keçirilən hərbi təlimlərə, bu çox təəccüblü bir məsələdir. Çünki 30 illik müstəqillik dövründə belə hadisələr olmamışdı. İlk növbədə deməliyəm ki, hər bir ölkə öz ərazisində istədiyi hərbi təlimi keçirə bilər. Bu onun suveren hüququdur, söz ola bilməz. Ancaq eyni zamanda, bunu zaman kəsiyində analiz edərkən görürük ki, bu heç vaxt olmamışdı. Nə üçün məhz indi? Nə üçün bizim sərhədimizdə? Bu sualları mən yox, Azərbaycan cəmiyyəti verir. Bu sualı dünya azərbaycanlıları verir. Bir sual da verilir ki, nə üçün işğal dövründə o bölgədə təlim keçirilmirdi? Ermənilər Cəbrayılda, Zəngilanda, Füzulidə oturduğu dövrdə nə üçün təlimlər keçirilmirdi? Nə üçün biz bu torpaqları azad edəndən sonra, 30 illik əsarətə və işğala son qoyandan sonra bu keçirilir? Bu suallar legitim suallardır. Əlbəttə, biz istəyirik ki, bölgədə uzunmüddətli əməkdaşlığa xələl gətirəcək heç bir hal olmasın. Bir də demək istəyirəm ki, Azərbaycan burada da özünü çox məsuliyyətlə aparır və təmkinlə aparır. Ümid edirik ki, bizim legitim addımlarımıza emosional reaksiya, yəqin ki, müvəqqəti xarakter daşıyır”.
Göründüyü kimi, İranın atdığı addımlar hətta Prezidentin bu məsələyə reaksiya verməsilə nəticələnib. İran bu xəbərdarlıqlardan hansı nəticəni çıxarmalıdır?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, Prezidentin çıxışında İranla bağlı olan məqamları bölüşür: “ Haqlı olaraq İrana ciddi iradlar bildirildi. Hətta iki ay əvvəl İrandan Azərbaycana yönələn təxribatların qarşısının necə alınması səbəblərini də cəmiyyət üçün açıqladı. Biz də bu mövqeyi dəstəkləyirik. İran tarixən Azərbaycana qarşı belə mövqedə olub. Bunun da tarixi əsasları var. Çünki Azərbaycanın iki hissəyə parçalanmasının əsas səbəbkarı İrandır. Qarabağ münaqişəsi başlayandan indiyə kimi İran daima Ermənistanın mövqeyini dəstəkləyib və Ermənistanı gizli silahlandırma ilə məşğul olub. Qarabağ ərazisində yerləşən separatçılara özünün maddi, texniki, hərbi dəstəyini heç zaman əsirgəməyib. Biz bunu İkinci Qarabağ müharibəsinin gedişində də açıq şəkildə gördük. Ptrezident ifadə etdi ki, biz bununla bağlı məlumatları ən müxtəlif kanallarla əldə edə bilirdik. Ərazilərimiz işğaldan azad ediləndən sonra biz bu məsələləri daha rahat şəkildə görməyə başladıq. İran tərəfinin separatçılara necə dəstək verməsi tam əlimizin içindədir. Azərbaycan bununla bağlı İrana etiraz notası verdi. Ancaq heç bir nəticəsi olmadı. Hesab edirəm ki, İranla bağlı məsələlərə Azərbaycan dövləti yenidən baxmalıdır. İrana dini təhsil adı ilə göndərilən tələbələrin qarşısı alınmalıdır. Azərbaycan vətəndaşları həmin ölkədə heç bir təhsil ala bilməz. Aramızda olan iqtisadi münasibətlərə yenidən baxılmalıdır. Düşünürəm ki, bunun ciddi təsiri olacaq. Hiss olunur ki, buna görə İran tərəfi çox narahatdır. Bir neçə gündür bizim sərhədlərimizə yaxın ərazilərdə İran hərbi təlimlər keçirir. Türkiyə tərəfi də bizə öz dəstəyini verəcək. Yaxın günlərdə qardaş ölkə İranla Türkiyənin sərhədində də təlimlər başlasa yaxşı olar. Azərbaycan bu istiqamətdəki basqıları davam etdirməlidir. Cəmiyyət də buna loyal qalmamalıdır. Molla rejimini dəstəkıəyən vətəndaşlarımız da gözlərini açıb, etirazlarını bildirməlidir”.
Məhəmmədəli QƏRİBLİ
