Ermənilər təkcə türk xalqlarına qarşı iddialar irəli sürmürlər, get-gedə onların siyahısı böyüyür, genişlənir. İndi də həmişə Ermənistana “atalıq” edən İrana qarşı iddialar irəli sürürlər, deyirlər ki, müasir İranın mədəniyyətini ermənilər yaradıb, formalaşdırıb.
Ermənilərin Teleqram kanalında bir ilginc məlumat yayılıb, ermənilər deyir ki, İran özünü ermənilərin xilaskarı sayır, amma İranın ermənilərə yox, ermənilərin İrana daha cox xeyri dəyib. Ermənilər iddia edirlər ki, İrana kinonu, teatrı, fotonu, tipoqrafiyanı, operanı, hətta italiyan pizzasını belə ilk dəfə ermənilər gətirib və İran mədəniyyətini inkişaf etdiriblər. Ermənilər dolayısı ilə deyirlər ki, İran kinoya, teatra, fotoya, tipoqrafiyaya, operaya sahib olduğu üçün ermənilərə minnətdar olmalıdı.
“Ermənilərin İrana qarşı bu cür iddia irəli sürməsi baş verməli idi”
Siyasi şərhçi Azər Həsrət bizimlə söhbətində bildirdi ki, bu iddia tamamilə erməni xarakterinə xasdır, ermənilərdən bu cür sayıqlamaları hər zaman eşitmək və gözləmək olar: “Ermənilərin belə iddialara düşməsi yeni bir məsələ deyil ki. Bu onların xarakterindən irəli gəlir. Ermənilər təkcə İrana qarşı deyil, başqa dövlətlərə qarşı da bu cür əsassız, cəfəng iddialar irəli sürürlər. Onlara görə, “dünyanın başlanğıcı ermənilərdəndir”, hər şeyin başında “ermənilər durur”, hər şeyi “ermənilər icad edib”. Ermənilərin həmişə onlara arxa-dayaq olan İrana qarşı bu cür iddialar irəli sürməsi təsadüfi deyil. Sadəcə olaraq, İranla Ermənistan bir-birindən fərqli deyillər. Bizim dostlardan birinin sözü ilə desək, İran Ermənistanın namaz qılan formasıdır. Yəni namaz qılması ilə Ermənistandan və ermənilərdən fərqlənir, qalan hər şey ikisində də eynidir. İran da, Ermənistan da başqalarına qarşı iddialıdır. İndi Ermənistanla İranın bir-birinə qarşı qarşılıqlı iddialar səsləndirməsi yerinə düşür. Biz əslində İrana deyirik ki, siz Azərbaycanla müsəlman qardaşsınızsa ermənilərlə, Ermənistanla davarranışlarınıza, münasibətlərinizə diqqət edəcəksiniz. İran sözdə qardaşıq deyir, amma ermənilərlə sarmaş-dolaş qucaqlaşır. Belə olduğu üçün də, təbii, ermənilərin İrana qarşı bu cür iddia irəli sürməsi baş verməli idi”.
A.Həsrətin sözlərinə görə, ermənilər və Ermənistan başa düşür ki, nə etsələr belə, İran öz xislətinə sadiq qalaraq ermənilərdən imtina edən, əl çəkən deyil: “Ona görə də, ermənilər bu cür sərsəm fikirləri ortaya atıb özlərinin İrandan üstün olduqlarını göstərmək istəyirlər. Amma isrəyir Ermənistan, istəyirsə də İran bir bezin qırağıdır”.
A.Həsrət vurğuladı ki, əslində Ermənistanla İranın Azərbaycana, Türk dünyasına münasibəti eynidir, İran nə qədər “müsəlman qardaşlarıq” desə də yalandır: “Hər ikisinin məqsədi Azərbaycan Respublikasının yox olmasıdır. Yəni onları birləşdirən bu cür məkrli niyyətlər var”.
İradə SARIYEVA
