“Ermənistan Azərbaycana qarşı ərazi iddialarını davam etdirsə, Azərbaycanın Ermənistana qarşı ərazi iddialarından çəkinməsi çətin olacaq”. Bunu Prezident İlham Əliyev Rusiyanın “Nasionalnaya oborona” jurnalına müsahibəsində deyib.
Dövlət başçısının sözlərinə görə, müharibə qurtarıb, Dağlıq Qarabağ münaqişəsi tarixdə qalıb: “Özü də həmişəlik. Buna görə normal qarşılıqlı əlaqələr yaratmaq lazımdır. Biz münasibətlərin normallaşdırılması istiqamətində irəliləməyə hazırıq, lakin hələ erməni tərəfdən müsbət siqnal yoxdur. Təəssüf ki, hələ də “Dağlıq Qarabağ”ın statusu barədə məsələlər qaldırılır, bu isə tamamilə perspektivsiz və mənim fikrimcə, Ermənistanın hazırkı faciəvi vəziyyətində onun üçün zərərli və təhlükəlidir. Çünki onlar İkinci Qarabağ müharibəsinin dərslərini unutmamalıdırlar. Əgər Ermənistan Azərbaycana qarşı ərazi iddialarını davam etdirsə, Azərbaycanın Ermənistana qarşı ərazi iddialarından çəkinməsi çətin olacaq. Bundan ötrü elə həmin Zəngəzurun və elə həmin Göyçə gölü regionunun tarixi mənsubiyyəti baxımından, bizim daha çox əsasımız, ərazi iddiaları üçün daha çox tarixi zəmin vardır”.
Bütövlükdə, bu cür mesajın verilməsi artıq Ermənistanın daha konkret formada cəzalandırılması üçün bir taktikadır. Yəni Ermənistan öz ərazi iddialarından əl çəkməsə, hansı ki, onların iddiaları tamamilə haqsızdır, o zaman Azərbaycan daha haqlı və əsaslı şəkildə bu iddiaları ortaya qoyacaq.
“Bizim parlament itirilmiş ərazilərlə bağlı iddia qaldırmalıdır”
Sözügedən məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayevin fikrincə, Prezidentin bu açıqlaması Ermənistana çox ciddi xəbərdarlıqdır: “Bu, çox açıq bir bəyanatdır. Bundan əvvəlki dövrlərdə də çox açıq-aşkar dövlət başçısı elan etdi ki, İrəvan, Göyçə, Zəngəzur bizimdir. Prezidentdən başqa, istər hakimiyyətdə, istərsə də müxalifətin içində olan şəxslər bu cür cəsarətli bəyanatlar verməkdən çəkinirlər. Bu təəssüf doğurur. Hadisələrin gedişi onu göstərir ki, Ermənistan öz iddialarından əl çəkməsə, o zaman rəsmi dövlət səviyyəsində əks iddialarla qarşılaşacaq. Biz partiya olaraq itirilmiş torpaqlarımızla bağlı ərazi iddiaları ilə çıxış edirik. Çünki doğrudan da bizim dədə-baba torpaqlarımızda Ermənistan adında süni bir dövlət qurulub. Bütün hallarda, ölkə prezidentinin açıq-aşkar bunu bəyan etməsi Ermənistana çox ciddi xəbərdarlıqdır. O cümlədən, Ermənistanın havadarlarına da xəbərdarlıqdır. Ermənistan bu səpkidə fəaliyyətini davam etdirəcəksə, o zaman öz müstəqilliyini itirmək təhlükəsi ilə üz-üzə qalacaq. Çünki faktiki olaraq Ermənistanda əhali azalır, miqrasiya güclənir. Ölkəni müdafiə etməyə adam qalmayıb, amma ritorika köhnədir. Partiya sədri olaraq əvvəldən demişdim ki, bizim parlament itirilmiş ərazilərlə bağlı iddia qaldırmalıdır. Hansı ki, o vaxt bolşeviklər qanunsuz və haqsız olaraq ərazilərimizi ermənilərə peşkəş ediblər”.
Bir sözlə, partiya sədri hesab edir ki, Azərbaycan bunun üzərinə getməlidir.
Vidadi ORDAHALLI
