Olduqca əlamətdar bir təqvimə gəlib çatmışıq. Düz bir il əvvəl Azərbaycan əks-hücum həmləsi ilə düşmənlə mühüribəyə girdi. Cəmi 44 gün ərzində 30 illik bir kədərə, həsrətə son qoydu. Azərbaycan Ordusunun gücü və Ali Baş Komandan Prezident İlham Əliyevin iradəsi nəticəsində torpaqlar işğaldan azad edildi.
Ötən ilin iyul ayında ermənilərin Tovuzda törətdiyi hərbi təxribatın, general-mayor Polad Həşimov və onun əsgərlərinin, komandirlərinin şəhid olması Azərbaycanın səbr kasasını daha da doldurdu. 27 sentyabrda ermənilərin bütün cəbhələrdə başlatdığı hücumlara Azərbaycan Ordusu çox güclü qarşılıq verdi. Məhz buna görə də İkinci Qarabağ müharibəsinin ABŞ, Böyük Britaniya, Rusiya, Fransa, İsraildə, hərbi güc amilinin əhəmiyyət daşıdığı hər yerdə diqqətlə təhlili və öyrənilməsi davam edir. Bu, yeni strateji fikirlər və müasir texnologiyaların istifadəsi ilə aparılan müharibənin nümunəsidir. Hərb tarixində misli görünməmiş, geniş çeşiddə kəşfiyyat və zərbə pilotsuz uçuş aparatlarının eyni anda istifadəsi XXI əsrin yüksək texnoloji müharibəsinin necə olmalı olduğu barədə təsəvvürləri dəyişdirdi. Azərbaycanın xüsusi təyinatlı qüvvələrinin effektiv fəaliyyətini unutmamalıyıq. Azərbaycan göstərdi ki, müharibənin aparılmasının qeyri-standart, effektiv və yüksək texnoloji üsullarını tapıb və bu, yekunda qələbəyə gətirib çıxarıb.
44 günlük İkinci Qarabağ müharibəsi ərzində dünya ictimaiyyətinin təxminən 30 il ərzində nail ola bilmədiyini etmək mümkün oldu: Azərbaycan BMT TŞ-nin dörd qətnaməsini reallaşdıraraq öz ərazi bütövlüyünü bərpa etdi. Biz görürdük ki, ATƏT Minsk Qrupunun bu problemi həll etmək cəhdləri aşılmaz maneələrlə üzləşirdi və sonda Azərbaycan öz gücü ilə problemi həll etdi. Müharibə hər zaman istənilən ölkənin, onun ordusunun və liderinin keyfiyyət yoxlamasıdır. Qalib gələn tərəf müzəffərdir. Bu vəziyyətdə Azərbaycan qeyd-şərtsiz müzəffər oldu və XXI əsrin ordusunun necə olmalı olduğunu göstərdi. Bu gün bəzi dövlətlərdə təlimlər və hərbi quruculuq planları Azərbaycan təcrübəsindən irəli gələrək təkmilləşdirilir.
Müharibə və onun nəticəsində əldə olunan qələbə ötən bir il ərzində Azərbaycanın beynəlxalq imicinə necə təsirlər göstərdi?
“Bizim parlament itirilmiş ərazilərlə bağlı iddia qaldırmalıdır”
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, İkinci Qarabağ müharibəsi dünyada Azərbaycanın nüfuzunu, hörmətini artırdı: “İlk növbədə, bütün dünya gördü ki, Azərbaycan xalqı nə qədər cəsur və mərddir. Hərbi əməliyyatlara yaxın ərazidə yaşayan insanlar hər gün erməni bombalarının altında ölüm təhlükəsi ilə üz-üzə gəlsələr də, heç biri evlərini tərk etmədi. Təbiidir ki, bu amil əsgərlərimizin gücünə-güc qatdı. Bütün dünya Azərbaycan əsgərinin nəyə qadir olduğunu, Azərbaycan Ordusunun gücünü gördü. Məhz buna görədir ki, hazırda bütün dünya Azərbaycanın hərbi təcrübəsini öyrənir. Azərbaycanın xüsusi hərbi qüvvələrinin Şuşanı necə azad etməsini heyranlıqla araşdırır. Bizim tətbiq etdiyimiz yeni döyüş taktikaları, istifadə etdiyimiz silahları diqqətlə tədqiq etməyə çalışırlar. Ən əsası isə, Azərbaycan xalqı və onun rəhbərliyinin müdrikliyinə bütün dünya şahidlik etdi. Ermənilər və onu dəstəkləyənlər xırda bir səhvimizi gözləyirdilər ki, bundan istifadə edib, Qarabağdakı ermənilərin müstəqilliyini tanısınlar. Azərbaycan rəhbərliyi buna şərait yaratmadı. Prezidentin müharibə dönəmindəki müsahibələri zamanı tutduğu son dərəcə müdrik mövqe Azərbaycanı belə bəlalardan qorumağa imakan verdi. Hətta düşmənlərimiz belə, Azərbaycan Prezidentinin böyüklüyünü etiraf etmək məcburiyyətində qaldılar. Hesab edirəm ki, İkinci Qarabağ müharibəsi Azərbaycanın şərəf tarixidir. Həm bizim, həm də bizdən sonra gələcək nəsillərin dünya qarşısında qürur duyacağı bir hadisədir. Günü-gündən də bunun əhəmiyyəti daha çox anlaşılacaq, daha çox bilinəcək”.
Məhəmmədəli QƏRİBLİ
