Prezident İlham Əliyev Rusiyanın nüfuzlu “Nasionalnaya oborona” jurnalının baş redaktoru, tanınmış hərbi ekspert İqor Korotçenkoya müsahibə verib.
Jurnalistin “Siz Azərbaycanda həyata keçirilmiş, yekunda qələbə qazanmağa kömək etmiş hərbi potensiala malik olmağa imkan vermiş siyasi, iqtisadi və digər dəyişikliklərin gedişini xarakterizə edə bilərsinizmi” sualına cavabda Prezident bunları bildirib: “… Təbii ki, biz qısa müddətdə, hətta əməliyyatların gedişində resurslarımızın – həm insan resurslarının, həm də texniki ehtiyatların səfərbər edilməsi üçün çox fəal iş aparmalı idik. Deməliyəm ki, həmin 44 gün ərzində biz daha bir ordu korpusu formalaşdırdıq. Qısa müddətdə - cəmi iki gün ərzində həmin korpusun şəxsi heyəti səfərbər edildi. Onlar, həmçinin bütün zəruri silahlar və texniki vasitələrlə təmin edildi. Bizim səfərbər etdiyimiz texniki imkanlar əks-hücum fəaliyyətini daha səmərəli şəkildə həyata keçirməyimizə kömək etdi. Təmas zonasının yaxınlığında yaşayan əhalinin təhlükəsizliyinin təmin edilməsi üzrə böyük iş aparıldı. Həmin rayonlarda yaşayan yüz minlərlə əhalimiz hər gün erməni artilleriyasının atəşi altında olurdu. Buna görə də əhali qismən təxliyə edilmişdi. Hərçənd, deməliyəm ki, həmin kəndlərin və şəhərlərin sakinlərinin əsas hissəsi evlərində qalır və deyirdilər ki, onlar öz yurdlarından heç yerə getməyəcəklər.
Lakin təbii ki, biz uzun müddət öz potensialımızın möhkəmləndirilməsi, ilk növbədə, iqtisadi müstəqilliyin təmin edilməsi üzərində işləyirdik. Ona görə ki, bunsuz biz hansısa maliyyə qoyuluşlarından, yaxud kredit resurslarından asılı olardıq və təbii ki, silahlı qüvvələri modernləşdirməyi özümüzə rəva görə bilməzdik. Buna görə də praktiki olaraq mənim Prezident vəzifəsində olduğum birinci gündən etibarən iqtisadi müstəqilliyin təmin edilməsi üzrə iş başlanıb. Hesab edirəm ki, təxminən altı-yeddi il ərzində biz buna nail olduq. 2010-cu ildə Azərbaycan artıq tam müstəqil iqtisadi siyasət yürütməyə, islahatlar həyata keçirməyə və infrastruktura böyük investisiyalar yatırmağa qabil idi”.
Göründüyü kimi, ölkə başçısı bildirib ki, Azərbaycan cəmi iki gün ərzində yeni bir ordu korpusu formalaşdırıb. Bu addımı atmaq hansı zərurətdən irəli gəlib?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bu bir daha Azərbaycanın müharibə aparmaq üçün yetərincə resurslarının olduğunu subut edir: “Azərbycan qısa müddət ərzində müharibə aparmaq üçün səfərbər oldu. Cənab Prezidentin dediyi qısa müddətdə bir ordu korpusunu cəmləmək, onları lazımi silah-sürsat və geyim əşyaları ilə təmin etmək, güclü maddi-texniki potensialla yanaşı, həm də insan resursu tələb edir. Bununla təsdiqlənir ki, Azərbaycan deyilən sahələrin heç birindən korluq çəkməyib. İki gün ərzində bir ordu korpusuna lazım olan sayda şəxsi heyəti səfərbər etmək fədakarlıq nümunəsidir. Təbiidir ki, burda əsas yük səfərbərlikdən yığılan şəxsi heyətin üzərinə düşürdü. Həmin vaxt mən bir neçə Hərbi Komissarlıqda oldum. İnanın ki, insanlar niyə müharibəyə onları yazmadıqlarına görə dava-dalaş edirdilər. Könüllü vuruşmaq istəyənlərin sayı o qədər çox idi ki, komissarlıqlar çatdırıb onları qeydiyyata ala bimirdi. Bu amil ölkəmizin vətəndaşlarının heç bir zaman işğalla barışmadığının, hər an öz ərazilərini azad etməyə hazır olduğunun göstəricisiydi. Adətən müharibələr zamanı bir qədər fərqli mənzərələr yaranır. İnsanlar döyüşdən yayınmaq üçün yollar axtarır. 44 günlük müharibədə biz belə hallara rast gəlmədik. Heç fərarilk halları da olmadı. Ancaq bizimlə vuruşan tərəfdə ən elit hərbi birləşmələr döyüşə girməkdən boyun qaçırırdılar. Bunu Ermənistanın baş naziri Nikol Paşinyanın özü müharibədən sonrakı müsahibələrində etiraf edib. Bizim müharibə aparmaq, səfərbər olmaq qabiliyyətimizə dünya ölkələri heyranlıqlarını gizlətmir. Xüsusi təyinatlılarımızın Şuşanı əlbəyaxa döyüşlə, sıldırım qayalara dırmaşaraq necə alması da bu ruh yüksəkliyindən xəbər verir. Müharibə ilə bağlı elə detallar var ki, sirr olaraq qalır. Əminəm ki, onlar açıqlansa, biz millətimizin və ordumuzun necə üstün keyfiyyətlərə malik olduğuna bir daha şahid olarıq”.
Məhəmmədəli QƏRİBLİ
