“Mən Hadrut əməliyyatının əhəmiyyətini də qeyd edərdim. Çünki bizi orada gözləmirdilər, erməni tərəfi bizim bu yolla gedəcəyimizi güman etmirdi və bu onlar üçün gözlənilməz oldu. Biz Hadrutu götürəndən bir neçə gün sonra da erməni tərəfi deyirdi ki, Hadrut onların nəzarətindədir. Hərçənd, Hadrutda artıq bütün yüksəkliklərdə bizimkilər qərarlaşmışdı və şəhərin alınıb-alınmadığını başa düşməmək Ermənistan rəhbərliyi üçün bir qədər diletantlıq idi. Biz Hadrut ətrafındakı bütün əsas yüksəklikləri götürəndən sonra, əslində bu şəhərin taleyi həll edilmişdi. Bizim oraya yenə də minimum itki ilə fiziki olaraq daxil olmağımız, sadəcə, vaxt tələb edirdi. Yalnız bizim hərbi qulluqçu Hadrut administrasiyasının binası üzərinə Azərbaycan bayrağını sancaraq Hadrutun götürülməsi barədə mənə raport verəndə Ermənistan tərəfin daha yalanlar uydurması üçün əsası qalmadı...” Bu sözləri Prezident İlham Əliyev Rusiyanın nüfuzlu “Nasionalnaya oborona” jurnalının baş redaktoru, tanınmış hərbi ekspert İqor Korotçenkoya müsahibəsi zamanı deyib.
Qeyd edək ki, Ermənistanın bir sıra müxalifət təmsilçiləri də, ictimai fəallar da Azərbaycanın Ermənistanın belini Hadrutda qırdığını deyir.
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, İkinci Qarabağ müharibəsi çox cəhətlərinə görə bütövlükdə müasir dünya hərb elmində özünə böyük yer tutacaq. “Müharibənin başlanması, müharibənin aparılması, dinc əhaliyə maksimum az ziyanın dəyməsi, dinc əhalinin arasında demək olar ki, itkilərin olmaması və unikal hərbi əməliyyatların həyata keçirilməsi dünya hərb tarixində diqqəti çox cəlb edən məsələlərdir. Hərb elmində gözlənilməzlik prinsipi var. Yəni düşmənin gözləmədiyi yerdən hücuma keçirsən, bu da uğura çox böyük şans verir. Həddindən artıq çox taktikalar var. Ona görə də İkinci Qarabağ müharibəsi bir çox cəhətlərinə görə indən sonra öyrəniləcək. İlk növbədə Azərbaycanda öyrəniləcək. Çünki hələ də düşmən Ermənistan Azərbaycanın qonşuluğundadır.
Hadrutla bağlı əməliyyatı həyata keçirənlər, o əməliyyatın iştirakçıları zamanı gələndə daha geniş şəkildə məlumat verəcəklər, bu əməliyyat hərbi məktəblərdə dərsliklərə salınacaq. Bütün əməliyyatlar kimi Hadrut əməliyyatı da xüsusi analiz ediləcək, təhlil olunacaq. Cənab Prezidentin dediyi kimi, doğrudan da Hadrut əməliyyatı müharibənin taleyində böyük rol oynayan müstəsna bir əməliyyat olub. Hadrut əməliyyatı mahiyyət etibarı ilə ermənilərin içərisinə girmək idi. Bəlkə də onlar inanmırdı ki, Azərbaycan ordusu ermənilərin məskunlaşdığı əraziyə girəcək. Ermənistan bu gün dünyaya belə bir mövqe çatdırır ki, Azərbaycan Qarabağın ətrafındakı “təhlükəsizlik zolağını özünə qaytarıb”. Ermənilər belə səhv rəy formalaşdırmaq istəyirlər. 7 rayonun geri qaytarılmasını ermənilər normal qarşılayırlar. Hələ də həzm edə bilmədikləri məsələ isə Hadrutun və Şuşanın işğaldan azad olunmasıdır. Bu, erməniləri şok vəziyyətinə salıb. Azərbaycanın siyasi-hərbi rəhbərliyinin bir məqsədi də daşməni şoka salmaq, düşməni həyəcanlandırmaq olub. Düşməni öz məcrasından çıxarmaq qələbənin yarısı deməkdi. Azərbaycan rəhbərliyi bu taktikadan da, bu metoddan da istifadə etdi. Ermənistan gözləmirdi ki, Azərbaycan bu metodlardan istifadə edib belə bir əməliyyat keçirib Hadrutu azad edə. Bu, məsələnin psixoloji tərəfidir. Digər tərəfdən, həmin məntəqənin hərbi-strateji əhəmiyyəti var”.
A.Nağı qeyd etdi ki, Hadrutun azad edilməsi Şuşaya aparan yolun əsasını qoydu və bizi qələbəyə apardı...
“Hadrut əməliyyatının həyata keçirilməsi Ermənistan üçün gözlənilməz oldu və erməniləri şok vəziyyətinə saldı. Azərbaycan ordusu böyük hərbi bacarıq nümayiş etdirdi. Azərbaycan Prezidenti Rusiyanın nüfuzlu “Nasionalnaya oborona” jurnalının baş redaktoru, tanınmış hərbi ekspert İqor Korotçenkoya müsahibəsi zamanı Hadrut əməliyyatının əhəmiyyətini xüsusi qeyd edib. Doğrudan da, Hadrut əməliyyatının nəticələri, qələbəmizdə oynadığı rol misilsizdir. O vaxt Azərbaycan deyirdi ki, Hadrut bizdədi, Ermənistan da yalandan guya Hadrutun ermənilərin nəzarətində olduğunu iddia edirdi. Hətta şəkil də paylaşırdılar. Prezident aydınlıq gətirdi ki, Hadrutun ətrafındakı yüksəkliklər Azərbaycan ordusunun nəzarətindədir. Şəhər onların nəzarətində idi və bu da o deməkdi ki, şəhərdə Ermənilərin qalması mənasız idi.Və ermənilər inanmasa da, inanmaq istəməsə də Hadrutdan çıxmalı və Hadrutu təhvil verməli oldular. Hadrutun işğaldan azad olunmasını Azərbaycanın hərbi rəhbərliyinin uğurlu əməliyyatlarından biri kimi qeyd edə bilərik”-deyə A.Nağı qeyd etdi.
İradə SARIYEVA
