“...Bütün bunlar belə bir fabula ətrafında formalaşırdı və bu şəraitdə bizim həqiqəti deməyimiz, əlbəttə, çox çətin idi, çünki bizim media resurslarımız ermənilərin müvafiq resursları ilə müqayisə edilə bilməzdi. Münaqişə medianın diqqətini cəlb etdi və mən nələr baş verməsi barədə həqiqəti çatdırmaq üçün bu imkandan istifadə etdim. Mənim dediklərimin hamısını sənədlərlə təsdiq etmək olar. Mən tarixi həqiqətə və ya döyüş meydanında hər gün baş verənlərə uyğun olmayan bircə kəlmə də deməmişəm. Erməni tərəfi müharibə dövründə nələr baş verməsi və daha əvvəl nələr olması barədə öz xalqına yalan deyir, dünya birliyini aldadırdı. Buna görə də əlbəttə, düşünürəm ki, ilk növbədə, onların tezisləri inandırıcı deyildi, əslində, onlar özlərini hörmətdən saldılar və biz baş verənlər barədə həqiqəti çatdıra bildik. Yeri gəlmişkən, “Rossiya” telekanalına təşəkkür edirəm ki, bu efiri təşkil etdi, bizim öz mövqeyimizi birbaşa efirdə ifadə etməyimizə imkan yaratdı. İstər döyüş meydanında, istərsə də informasiya məkanında belə dürüst mübarizə gedəndə, əlbəttə, erməni tərəfin şansı ola bilməzdi…” Bunu Prezident İlham Əliyev Rusiyanın nüfuzlu “Nasionalnaya oborona” jurnalının baş redaktoru, tanınmış hərbi ekspert İqor Korotçenkoya müsahibəsində deyib.
Tanınmış hərbi ekspert İbrahim Rüstəmli “Bakı-Xəbər”ə bildirdi ki, 44 günlük Vətən müharibəsində qələbə qazanmağımızda, hərbi-siyasi, informasiya məsələsində üstünlüyü, təşəbbüsü ələ almağımızda ən mühüm rollardan birini bizim haqlı tərəf olmağımız oynayıb: “Cənab Prezidentin dediyi kimi, burada ən böyük rolu həqiqət oynayıb. Yəni cənab Prezident öz çıxışlarında xalqa da, beynəlxalq ictimaiyyətə də yalnız və yalnız həqiqətləri deyib, faktlar, sənədlər əsasında açıqlamalar verib. Azərbaycan dövlətinin ərazi bütövlüyünün pozulmasını dolayısı ilə elə dünya birliyi özü də bilirdi, görürdü. Onu demək kifayət ki, dünya birliyinin Azərbaycanın ərazi bütövlüyünü tanıması dolayısı ilə erməni faşizminin təcavüz faktını tanıması demək idi. Ona görə də mən bu məsələ haqqında danışarkən ilk növbədə həqiqətin Azərbaycan tərəfində olduğunu xüsusi vurğulamaq və diqqətə çatdırmaq istəyirəm. Məsələ burasındadır ki, Azərbaycan bu illər ərzində öz milli maraqlarının konseptual əsaslarını işlədi, öz hədəfləri haqqında doğru-düzgün rəy formalaşdıra bildi. Azərbaycan öz hədəflərini və bu hədəflərə aparan yolları müəyyənləşdirdi. Təbii ki, müharibə ilk növbədə soyuq cəbhədə, yəni informasiya cəbhəsində udulur, son nöqtəni isə əsgərlər qoyur. Təbii ki, Azərbaycan Prezidentinin, xüsusilə Xarici İşlər Nazirliyi sistemində apardığı kardinal dəyişiklikdən sonra çox dinamik şəkildə həyata keçirdiyi siyasət, yeni bir yanaşma tərzi, yeni bir manevr və sair bütün bu kimi amillər Azərbaycanın soyuq müharibə cəbhəsində qısa müddətdə üstünlük əldə etməsi üçün real şərait yaratdı. Bundan sonra baş verənləri isə hər birimiz izlədik. Azərbaycan soyuq müharibədə -informasiya cəbhəsində qələbə qazandıqdan sonra Qarabağ cəbhəsində də qələbə qazandı. Bu qələbənin qazanılmasında, təbii ki, ən böyük rolu Azərbaycan Prezidentinin soyuq müharibə cəbhəsində həyata keçirdiyi siyasət və bu siyasətin həqiqətə söykənməsi oynayıb. Çox sevinirəm ki, Azərbaycan soyuq müharibə cəbhəsində bu cür radikal dəyişikliklərə nail ola bildi. Əks halda Azərbaycan 44 gündə bu qələbəni qazana bilməzdi”.
İ.Rüstəmli qeyd etdi ki, Azərbaycan bu istiqamətdə uzun illər həyata keçirdiyi hərbi siyasi kampaniyada son 3 il ərzində revanş götürdü, özünün 44 günlük müharibədə qələbəsinin təməlini yaratdı, özülünü qoya bildi. “Azərbaycan xalqını, dövlətini, Ali Baş Komandanını erməni toplumundan fərqləndirən üstün cəhətlərdən biri də Azərbaycanın yalnız və yalnız həqiqətə söykənməsi idi. Azərbaycanın bu müharibədə qələbə qazanmasına onun həqiqətin yanında olması, həqiqətə söykənməsi kömək etdi”-deyə İ.Rüstəmli vurğuladı.
İradə SARIYEVA
