Sentyabrın 24-də BMT Baş Assambleyasının 76-cı sessiyası çərçivəsində Ermənistanın xarici işlər naziri Ararat Mirzoyan Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Cozep Borel ilə görüşüb.
Tərəflər Ermənistan-Aİ tərəfdaşlığının dinamik inkişafından məmnun olduqlarını bildiriblər. Görüş zamanı ATƏT-in Minsk Qrupunun həmsədrləri çərçivəsində Dağlıq Qarabağ münaqişəsinin sülh prosesi ilə rəsmi və hərtərəfli həllinin zəruriliyi vurğulanıb. Bölgədə gərginliyi azaltmaq, təhlükəsizlik və sabitliyi təmin etmək üçün hər iki tərəfin səy göstərməsinin vacibliyi vurğulanıb.
Bununla yanaşı, tərəflər regional sabitlik və təhlükəsizlik məsələləri ilə də bağlı fikir mübadiləsi aparıblar. 44 günlük müharibədən sonra ortaya çıxan humanitar problemlərin həlli kontekstində Ararat Mirzoyan Azərbaycanda saxlanılan erməni əsir və mülki girovların qeyd-şərtsiz geri qaytarılması məsələsinin vacibliyini və bu məsələnin siyasiləşdirilməsinin qəbuledilməz olduğunu vurğulayıb.
Təəssüf doğuran məqam odur ki, Aİ rəsmisi C.Borel A.Mirzoyanın hərbi əsir və mülki girovlarla bağlı uydurmasını sakitliklə dinləyərək buna heç bir etiraz etməyib. Məgər Azərbaycanda hərbi əsir və mülki erməni girovu var? Bu boyda iftiranı səssizcə dinləmək və buna etiraz etməmək nə deməkdir? Azərbaycan 10 noyabr razılaşmasından sonra bütün hərbi əsirləri qaytarıb. Bizdə, ümumiyyətlə mülki erməni girovu yoxdur. O zaman bütün bunlar nə deməkdir?
“Borel də ermənilərin tayıdır”
Məsələyə münasibət bildirən AMİP funksioneri Əli Orucovun fikrincə, bütün bunlar Avropa Birliyinin açıq formada Ermənistanın həyasızlığına göz yummasıdır: “Məhz bu cür riyakarlığın nəticəsi idi ki, 30 ilə yaxın Ermənistanın işğalı davam etdi. Bir dəfə də olsun, ciddi formada işğalçı tərəfə heç olmasa siyasi baxımdan xəbərdarlıq etmədilər. Heç bir beynəlxalq hüquqa sığmayacaq dərəcədə işğalçı ilə təcavüzə məruz qalan tərəfə eyni qaydada yanaşdılar. Azərbaycanda ümumiyyətlə hansısa erməni əsiri yoxdur. Azərbaycanda 10 noyabrdan sonra qanunsuz ölkə ərazisinə daxil olan və saxlanılan cinayətkarlar var. Hələ Azərbaycan humanistlik göstərərək mina xəritələri qarşılığında onların bir qismini qarşı tərəfə təhvil verib. Görünən odur ki, əvvəl olduğu kimi, Avropa İttifaqı indi də işğalçı Ermənistanın həyasızlığına göz yummaqda, ikili yanaşmalar sərgiləməkdə qərarlıdır. Hər vasitə ilə çalışırlar ki, təcavüzkar Ermənistanı yenidən dirçəltsinlər. İstəmirlər Ermənistan zəif duruma düşsün. Baxmayaraq ki, söhbət işğalçı bir dövlətdən gedir. Bir sözlə, Borel də ermənilərin tayıdır”.
Partiya funksioneri hesab edir ki, Azərbaycan bundan sonra da bənzər haqsızlıqlara hazır olmalıdır.
Vidadi ORDAHALLI
