Məlumdur ki, Rusiyada açıq ermənipərəst mövqe sərgiləyən jurnalistlər, deputatlar və digər sahələrə aid şəxslər var. Onlardan biri də teleaparıcı Yevqeni Popovdur. Maraqlıdır ki, son Duma seçkilərində Popov da mandat qazanıb.
Ermənistanın Rusiyadakı əsas lobbiçilərindən biri, Rusiya Dövlət Dumasının deputatı olmuş MDB İşləri Komitəsinin sədr müavini Konstantin Zatulin də Soçidən deputat seçilib. Bu cür odioz adamların Rusiyada deputat seçilməsi təsadüfdür, yoxsa onlara Rusiyadakı erməni lobbisinin və dünya ermənilərinin dəstəyi olub?
Politoloq Yeganə Hacıyeva “Bakı-Xəbər”ə açıqlamasında bildirdi ki, Rusiya siyasətində və mediasında ənənəvi ermənipərəst şəbəkə və onun “görkəmli” rus simalarına daha biri əlavə olundu: ”Bütün zamanlarda Azərbaycana qarşı dezinformasiyanın ruporu olmuş, 44 günlük müharibədə isə birbaşa erməni təbliğat aparatına dönən Yevqeni Popovun Dumaya seçkilərdə qələbə qazanması, əlbəttə, gözlənilən idi.
Məsələ ondadır ki, Rusiyada istər hökümətdə, istərsə də mediada çox geniş kök atmış erməni şəbəkəsi müharibənin ilk günlərindən hər cür dezinformasiya, feyk xəbərlərlə Rusiyanın Dağlıq Qarabağa girməsi üçün informativ zəmin yaradırdı. Həmin adamlar Rusiyanın daxilindəki və dünyadakı erməni qruplarından ciddi maliyyə dəstəyi alırlar. Onların Azərbyacan və Türkiyəyə qarşı təbliğat aparması Rusiyada etnik ermənilərdən ibarət 5-ci kolonun mövcudluğunu aşkara çıxardı və bu, əlbəttə, Rusiyadakı hökümət dairələrində çox da xoş qarşılanmadı. Xatırlayırsınızsa, keçən il, müharibənin ilk günlərində “Russia Today”-ın rəhbəri Margarita Simonyana və onun ailəsinə məxsus media şəbəkəyə Dağlıq Qarabağda hərbi əməliyyatları şərh etmək mövzusunda xəbərdarlıq olundu. 29 sentyabrda təhlükəsizlik idarəsinə çağırılan Margarita Simonyan və əri Kosayana Rusiya KİV-ində yaratdıqları erməni şəbəkəsinin Rusiya Federasiyası daxilində beşinci kolon rolunu oynadığı və Rusiya ilə Azərbaycan arasındakı münasibətlərə xələl gətirdiyi sərt şəkildə xatırladıldı. Qeyd edim ki, başqa bir ermənipərəst Konstantin Zatulin də Dumaya Soçidən deputat seçilib. Onların hər ikisi ənənəvi ermənipərəst şəbəkənin “görkəmli” rus simaları kimi fəaliyyətlərinə davam edəcəklər. Odur ki, bu şəbəkə artıq Rusiya daxilindəki etnik ruslardan ibarət simalarını çoxaltma yolunu tutublar. Bu şəbəkə Ermənistanın problemlərini Rusiyanın hesabına, etnik ruslardan ibarət deputatların və hökumət üzvlərinin əlilə çözməyi hələ SSRİ dövründən öyrənib. Zatilinin ermənilərin daha kompakt yaşadığı Soçi şəhərindən deputat seçilməsi ona həmin millət tərəfindən ciddi dəstəyin verildiyini sübut edir. Ancaq bu heç də o anlama gəlmir ki, Rusiya bu cür odioz adamların əl-qolunun daha da açılmasına seyrçi qalacaq. Unutmaq lazım deyil ki, get-gedə fəaliyyət sahələrini genişləndirən şəbəkə ilk növbədə Rusiya ilə Azərbaycan arasındakı münasibətlərə xələl gətirmiş olur. Onlar dost olan rus və azərbaycan xalqları arasında nifaq salmağı belə gözləri önünə almaqla, yalnız öz maddi maraqlarını təmin etməyi düşünürlər. Rusiyanın əlaqədar dairələri bu amilləri ciddi nəzərdən keçirməlidir”.
Məhəmmədəli QƏRİBLİ
