“…Hərbi əməliyyatlar aparılan dövrdə biz bir dəfə də provokasiyalara uymadıq. Hətta ermənilər şəhərlərimizi bombalayanda, uşaqlarımızı və qadınlarımızı öldürəndə də biz Ermənistana eyni şəkildə cavab vermədik, biz onların şəhərlərini bombalamadıq. Hərçənd, bizi coşduran emosiyaları başa düşmək olardı. Biz hərbi cinayətlər törətməmişik. Hərbi əməliyyatın elə ilk günündə mən hərbi qulluqçulara çox sərt göstərişlər vermişdim ki, hərbi cinayətlər törətməyi özünə rəva görənlər ciddi cəzalandırılacaqlar...”
Bu fikirləri Prezident İlham Əliyev Rusiyanın nüfuzlu “Nasionalnaya oborona” jurnalının baş redaktoru, tanınmış hərbi ekspert İqor Korotçenkoya müsahibəsində deyib.
Prezidentin hərbçilərə hərbi cinayətlər törətməməklə bağlı göstərişi müharibə günlərində özünü necə göstərdi, Azərbaycan əsgərləri buna necə əməl etdilər?
“Fakt budur ki, Azərbaycan qoşunları, hərbçiləri maksimum qaydada incəliklə hərəkət edərək, mülki insanların zərər çəkməməsi üçün əlindən gələni edirdi və buna nail də olurdu”
Siyasi şərhçi Rövşən Rəsulov bizimlə söhbətində bildirdi ki, Azərbaycan hərbçiləri Ali Baş Komandanın bütün əmr və göstərişlərini müzakirə etmədən, birmənalı olaraq qüsursuz şəkildə yerinə yetiriblər: “Qeyd edim ki, müharibə dövründə hərbi cinayətlərin törədilməsi məsələsi istər beynəlxalq konvensiyalara görə, istərsə də yazılmamış hərb qanunlarına görə qadağandır. Müharibə zamanı hərbi cinayət törədənlər, söz yox ki, həmin əməllərinə görə də cəzalandırılmalıdırlar. Biz bunu İkinci Dünya müharibəsindən sonra keçirilən həbri tribunalların arxiv sənədlərindən də görmüşük. Ümumiyyətlə, müharibənin də öz qanunları var və tərəflərdən biri bu qanunları pozursa, insani duyğularını vəhşiliklərlə əvəzləyirsə, demək belə insanlar bütün mənalarda ən ağır cəzalara ayiq görülməidirlər. Təəssüf ki, bizim də düşmənlərimiz vəhşilik cinahında yer alanlardandırlar və yalnız indi deyil, Birinci Qarabağ müharibəsi dövründə də, hətta ondan da əvvəlki müharibə zamanlarında erməni terrorçuları dinc əhali arasında kütləvi qətliamlar, soyqırımları törətməklə əslində necə məxluqlar olduqlarını sübuta yetiriblər. Bu barədə kifayət qədər informasiyalar, məlumatlar mövcuddur”.
R.Rəsulov qeyd etdi ki, bu dəfə də eyni hallar məhz düşmənlərimiz tərəfindən həyata keçirildi – dinc şəhərlərimiz ballistik raket atəşlərinə tutuldu, günahsız insanlarımız, körpələrimiz, qız-gəlinlərimiz şəhid oldular, halbuki, müharibə yüz kilometrlərlə uzaqda gedirdi və bu insanlarımızın, şəhərlərimizin hər hansı hərbi məsələlərə ümumiyyətlə aidiyyəti yox idi. “Artıq bildiyimiz kimi, bununla bağlı Azərbaycan Beynəlxalq insan haqları məhkəməsinə müraciət edib, iddia qaldırıb və inanırıq ki, Ermənistan rəhbərliyi öz murdar əməllərinə görə mütləq cavab verməli olacaq.
Bəli, çox düzgün xatırlatdınız ki, cənab Prezident İlham Əliyev Azərbaycan hərbçilərinə hərbi cinayətlərin törədilməməsi istiqamətində qəti tapşırığını vermişdi, hərbiçilərimiz də bu göstərişə əməl ediblər. Amma buna baxmayaraq, Ermənistanın hərbi-siyasi rəhbərliyi hər cəhdində Azərbaycanın cavab atəşlərinin mülki ərazilərə endirilməsi yönündə ən çirkin əməllərə əl atırdı. Bunu isə sübut edən faktlar kifayət qədərdir. Təkcə müharibə vaxtı erməni qoşunlarının artilleriya, raket birləşmələrini qəsdən, bilərəkdən dinc əhalinin yaşadığı ərazilərdə yerləşdirmələri, mövqelərini məhz bu kimi yerlərdə qurmaları və bizə atəş açmaları faktlarını dəqiq lokasiya xəritələri ilə izlərsək, deyilənlərin nə qədər həqiqət olduğunu isbatlamış olarıq. İndi Ermənistan da guya Azərbaycanı eyniadlı məhkəməyə şikayət edib və düşünür ki, iddiaları onların istədikləri nəticəni verəcək. Amma kökündən yanılırlar. Azərbaycanın əlində elə faktlar, dəlillər, danılmaz sübutlar var ki, inanın, ermənilərin iddiaları qayıdıb onların özlərinə tərəf əks dayanacaq. Yəni fakt budur ki, Azərbaycan qoşunları, hərbçiləri maksimum qaydada incəliklə hərəkət edərək, mülki insanların zərər çəkməmələri üçün əlindən gələni edirdi və buna nail də olurdu. Lakin müharibə müharibədir və bəzən istəmədən arzuolunmaz hallar yaşanır. Yaşanıbsa da, bu günah bilavasitə Ermənistanın hərbi-siyasi rəhbərliyinin üzərində olan məsələdir.
Onu da qeyd edim ki, bəli, bəzi hərbçilərimizin hisslərinə hakim ola bilməyərək hadisələr törətdikləri vaxtlar da olub. Onlar müvafiq qaydada cəzalandırılıblar. Bu isə bütövlükdə Azərbaycan ordusunun adına yazıla bilməz. Ona görə də düşünürəm ki, müharibə cinayətləri, müharibə vəhşilikləri birbaşa düşmənin üzərindədir və onlar buna görə mütləq cavab verəcəklər”-deyə R.Rəsulov şərhində bildirdi.
İradə SARIYEVA
