İrandakı məlum dairələr ən müxtəlif vasitələrdən, o cümlədən də internet resurslarından, sosial şəbəkələrdən istifadə etməklə Azərbaycana, Azərbaycanın tarixi şəxsiyyətlərinə, milli ideoloqlarına qarşı şər-böhtan, təxribat xarakterli məlumatlar yaymaqda davam edirlər.
İndi də Mirzə Fətəli Axundova və Mirzə Cəlilə çamur atmaqla Azərbaycan ictimaiyyətini çaşdırmağa cəhd göstərirlər. İran tərəfi sosial şəbəkələrdə belə bir şaiyə yayır ki, guya Mirzə Fətəli Axundov və Cəlil Məmmədquluzadə “mason” olub. Onlar əsassız olaraq iddia edirlər ki, guya Axundov masonlarin "sifarisi" ilə Azərbaycan xalqının ərəb əlifbasindan imtina etməsinə çalışıb, yeni əlifba yaratmaqda israrlı olub. Guya Axundovun həyata keçirmək istədiyi əlifba islahatının mahiyyəti “masonların sifarişini yerinə yetirmək” olub. Bu kimi cəfəng iddialarla aranı qarışdırmaq istəyən İrandakı anti-Azərbaycan qüvvələri indi də bu yola əl atıblar.
“…Tarixi şəxsiyyətlərimizə iftiralar atmaqla, əslində güclənməkdə olan Azərbaycanı hədəfə alırlar və bununla da öz niyyətlərini ortaya qoyurlar”
Azərbaycan Milli Elmlər Akademiyası Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə təəssüf hissi ilə bildirdi ki, zaman-zaman bəzi qüvvələr tərəfindən Axundovun və Mirzə Cəlilin “mason” olduğuna dair dezinformasiyalar yayılıb. “Əsasən də İran adlanan fars – molla rejimi tərəfindən Axundovun və Mirzə Cəlili “mason” olduğu iddia olunur, hətta bəzən ölkəmizdə də onların iddialarını təkrar edənlər, buna işarə vuranlar tapılır. Axundov və Mirzə Cəlili “mason” adlandıranlar onların dinlərə, xüsusən də islam dininə münasibətini əsas götürürlər. Mirzə Fətəli Axundov əlifba sahəsində islahatların aparılmasından yana idi. O, əvvəlcə ərəb əlifbasında islahatların aparılmasının vacibliyini qeyd edirdi, sonradan hətta latın əlifbasının tərəfdarı kimi çıxış edərək bu əlifbaya keçilməsini istəmişdi. Eyni zamanda, Mirzə Cəlil də “Molla Nəsrəddən” jurnalınmda əlifba islahatına tərəfdar kimi çıxış edir, dinə qarşı isə sərt yanaşmalar ortaya qoyurdu. Onları nə üçün masonlara bağlamağa cəhd edirlər? Təhlil etsək görərik ki, masonların əsas ideyalarından biri bütün dinlərin ləğv edilməsi, vahid din və vahid dövlətin yaradılması idi. Əslində, mənə elə gəlir məsələyə bu cür yanaşmaq doğru deyildi. Belə çıxır ki, dinlərə bu cür yanaşanların hamısını “mason” adlandırmaq lazımdır. Bu doğru deyil. Açıq-aşkar görsənir ki, İran adlandırılan ölkə və onun təbliğatçıları burada ikili standarta yol verirlər. Çünki biz bilirik ki, Axundov ərəb əlifbasının dəyişməsini istəyərkən, latın əlifbasına keçidin tərəfdarı kimi çıxış edərkən və bu istiqamətdə işlər görərkən, “Kəmaliddövlə məktubları”nda məhz daha çox Sasaniləri ön plana çıxarmışdı. Yəni hətta özünü də farsdan dönmə adlandırırdı. Bu işləri görərkən də, türklükdən daha çox, demək olar ki, bunları əsasən də İran adına, farslar adına etdiyini demişdi. O zaman biz də belə deyə bilərik ki, Mirzə Fətəli Axundovu oyuna salan, bu işin arxasında dayanan farslar, irançılar olub. Əslində Qacarlar dövlətinin son dönəmlərində, demək olar ki, irançıların və fars şovinizminin başında dayananların hamısı Böyük Britaniyaya, masonlara xidmət edirdi. Sonra ingilislərin əli ilə 1925-ci ildə həmin mason təşkilatına qoşulan irançılar, farslar daha sonra türk Qacarlar dövlətini yıxıb, masonlara xidmət edən Pəhləvilər rejimini qurdular”.
F.Ələkbərlinin sözlərinə görə, Axundova və Mirzə Cəlilə çamur atanlar türk Qacarlar dövlətinin son vaxtlarında fars şovinstlərinin masonlarla əlaqələrini araşdırsınlar. Alimin sözlərinə görə, 1925-ci ildə qanunsuz şəkildə haklimiyyətə gətirilən Rza Pəhləvinin özü elə masonlara, Böyük Britaniyaya xidmət edirdi. “ Rza Pəhləvinin hakimiyyətdə olduğu dövrdə onun bütün addımlarını masonlar müəyyənləşdirirdi, onlar islam dininə qarşı çıxırdılar, yenidən Zərdüştlüyü dirçəltmək, fars əlifbasını bərpa etmək istəyirdilər. Axundova, Mirzə Cəlilə böhtan atanlar bilsinlər ki, Rza Pəhləvi və onun ətrafındakılar, türk-Qacarlar dövlətini yıxanlar masonlar idi. Rza Pəhləvidən sonra Məhəmmədrza Pəhləvinin özü də ABŞ-ın bir oyuncağı idi və o da bu işin bir parçası idi. Pəhləvilər dönəminə baxanda görürük ki, onlar ingilislərin və amerikalıların oyununu oynayıb. Masonların başında da əsasən ingilislər və yəhudilər dayanırdı. Pəhləviləri faktiki olaraq masonlar idarə edirdi. İndi durub Mirzə Fətəli Axundovun və Mirzə Cəlilin müəyyən fərqli baxışlarına istinad edib onları “mason” adlandırırlarsa, bugünkü irançılar və İran hakimiyyətinin başında dayananlar, eləcə də Pəhləvilər dönəmindəkilər daha çox masonçulardı. Sözdə guya bunlar şiədilər, islam tərəfdarıdırlar. Bildiyimiz kimi, nə Pəhləvilərdə, nə İran molla rejiminin əsl mahiyyətində nə şiəlik, nə də islam dininə hörmət var. Onlar yenə də zahirdə bir, mahiyyətdə isə tamamilə başqa oyun oynayaraq masonçuluğa xidmət edirlər, islama və şiəliyə isə zidd addımlar atırlar. Bunlar tarixi şəxsiyyətlərimizə iftiralar atmaqla, əslində güclənməkdə olan Azərbaycanı hədəfə alırlar və bununla da öz niyyətlərini ortaya qoyurlar. Çünki onlar güclənən Azərbaycanı müxtəlif istiqamətlərdən “vurmaq” istəyirlər…Amma buna nail ola bilməyəcəklər”.
F.Ələkbərli qeyd etdi ki, Mirzə Fətəli Axundovu, Cəlil Məmmədquluzadəni “mason” adlandıranlar çox yanılır.
İradə SARIYEVA
