“Azərbaycan Təhlükəsizlik Şurasının qətnamələrinin icrasını özü təmin etdi və bu, yəqin ki, BMT-nin təsis edildiyi vaxtdan bugünə qədər dünyada ilk belə haldır”.
Bunu Prezident İlham Əliyev BMT Baş Assambleyasının 76-cı sessiyasında videomüraciət formatında çıxışında deyib.
Ölkə başçısının sözlərinə görə, ATƏT-in Minsk Qrupunun həmsədrləri Ermənistanı Azərbaycana qarşı hərbi təcavüzə son qoymağa məcbur etmək üçün qətiyyətli addımlar atsaydılar, üzərlərinə düşən vəzifələrin icrasına nail ola bilərdilər: “BMT Təhlükəsizlik Şurasının bəzi qətnamələri bir neçə gün ərzində icra edildiyi halda, bizə gəldikdə 27 il icra olunmamış qaldı. Bu isə ikili standartların bariz nümunəsidir. Selektiv yanaşmaya yol verilməməsi üçün BMT Təhlükəsizlik Şurasının qətnamələrinin icrası mexanizminin yaradılması yönündə səylərin birləşdirilməsinə ehtiyac var. İllər ərzində hökm sürən cəzasızlıqdan ruhlanan Ermənistan təcavüzün nəticələrini möhkəmləndirmək və qanunsuz məskunlaşdırmanı sürətləndirmək üçün Ermənistandan işğal olunmuş ərazilərimizə yeni yolun inşa ediləcəyini bəyan edirdi. Sentyabrın 27-də Ermənistan Azərbaycanın hərbi mövqelərinə və mülki şəxslərinə qarşı irimiqyaslı hücuma başladı. Buna cavab olaraq, Azərbaycan BMT Nizamnaməsinin 51-ci maddəsində təsbit edilmiş özünümüdafiə hüququndan istifadə edərək, öz ərazisində Ermənistana qarşı əks-hücum əməliyyatına başladı. 44 günlük müharibə ərzində Azərbaycan işğal olunmuş ərazilərinin böyük bir hissəsini, o cümlədən Cəbrayıl, Hadrut, Füzuli, Zəngilan, Qubadlı və Şuşa şəhərlərini azad etdi”.
Həqiqətən də Azərbaycan dünya tarixində böyük bir ilkə imza atdı. İllərlə kağız üzərində qalan qətnamələrin icrasını öz gücü hesabına təmin etdi.
“Azərbaycan Silahlı Qüvvələri həmin qətnamələrin icrasını təmin etdi”
Məsələyə münasibət bildirən millət vəkili, politoloq Elman Nəsirovun fikrincə, budəfəki BMT toplantısının əsas fərqli xüsusiyyəti ondan ibarətdir ki, cənab Prezident qalib dövlətin rəhbəri kimi çıxış etdi: “Azərbaycan həqiqətlərini, yeni reallıqları BMT kürsüsündən beynəlxalq ictimayətin diqqətinə çatdırdı. Xüsusən də 44 günlük müharibədə Azərbaycan Ordusunun qazandığı tarixi qələbəyə diqqəti cəlb etdi. Vurğuladı ki, torpaqlarımız işğaldan azad olunub. O cümlədən, 27 il əvvəl BMT-nin qəbul etdiyi qətnamələrin heç birinin Ermənistan tərəfindən icra olunmadığını qeyd etdi. Azərbaycan Silahlı Qüvvələri həmin qətnamələrin icrasını təmin etdi. Ancaq nə BMT Təhlükəsizlik Şurası, nə də ATƏT-in Minsk Qrupu üzərinə düşən vəzifəni yerinə yetirdi. Bu konteksdə vurğuladı ki, BMT-nin qəbul etdiyi qətnamələrin icra mexanizmlərinin yaradılmasına böyük ehtiyac var. Bir halda BMT qətnamələri dərhal icra olunur, başqa bir halda qətnamələr 27 il icra olunmur. Ona görə də ilk dəfədir ki, faktiki olaraq BMT-nin icra etməli olduğu qətnamələri Azərbaycan özü icra etdi. Bununla həm də BMT-nin simasını qoruyub saxladı. Yəqin ki, BMT 2020-ci illə bağlı hesabatında bu reallığı, yəni 4 qətnamənin icra olunduğunu qeyd edəcək. Bununla belə, Prezident çıxışında Azərbaycanın əməkdaşlığa hazır olduğunu qeyd etdi. Qeyd etdi ki, biz Ermənistana regionda sülh və sabitlik naminə əməkdaşlıq təklif edirik. Biz sərhədlərin delimitasiya və demarkasiyasını, dəhlizlərin açılmasını təklif edirik. Ancaq hələ ki, Ermənistan buna müsbət cavab vermir”.
Bir sözlə, politoloq hesab edir ki, Azərbaycan öz məsuliyyətini dərk edir və ardıcıl addımlar atır.
Vidadi ORDAHALLI
