Ermənistan baş nazirinin müavini Suren Papikyan Rusiyanın bu ölkədəki səfiri Sergey Kopırkinlə görüşüb. Bu barədə Ermənistan hökumətinin mətbuat xidməti məlumat yayıb. Görüşdə iki ölkə arasındakı münasibətlər, Qarabağda 44 günlük müharibədən sonra bölgədəki vəziyyət və regionda kommunikasiyaların açılması məsələləri müzakirə edilib.
Tərəflər Cənubi Qafqaz dəmir yolunun imkanlarının yenilənməsinin Ermənistanın və bölgənin digər ölkələrinin inkişafına təkan verəcəyini bildirib. Suren Papikyan regional kommunikasiyaların blokadadan çıxarılması kontekstində həm üçtərəfli formatda, həm də ATƏT-in Minsk Qrupu çərçivəsində Rusiyanın xüsusi və effektiv rolunu vurğulayıb. Tərəflər Gorus-Qafan yolundakı son durumla da bağlı danışıblar. Qeyd edək ki, Cənubi Qafqaz dəmir yolunun Azərbaycandan keçən hissəsi 1989-cu ildən fəaliyyətini dayandırıb. Dəmir yolunun Türkiyəyə uzanan hissəsi də işləmir.
Rusiya, Azərbaycan və Ermənistan arasında imzalanmış üçtərəfli anlaşmalar Zəngəzurdan keçməklə Naxçıvanı Azərbaycanın əsas hissəsi ilə birləşdirəcək dəmir yolunun bərpasını da nəzərdə tutur. Avtomobil yolunun açılmasına razılıq verdiyini bildirən Ermənistan hələlik dəmir yolunun açılmasına etiraz edir. Baş nazirin müavini ilə səfir arasında müzakirə olunan bu məsələ İrəvanın mövqeyinin yumşalması kimi qəbul oluna bilərmi?
Politoloq Rəşad Bayramov “Bakı-Xəbər”ə açıqlamasında bildirdi ki, ikinci Qarabağ müharibəsi bitəndən sonra Azərbaycan və Ermənistan rəhbərləri regionda kommunikasiyaların bərpası, quru yolla dəhliz açılması kimi məsələlərdən bəhs edərkən birdən-birə ritorikanın sərtləşdiyi müşahidə edildi: “Söhbət Azərbaycan Prezidenti İlham Əliyevin "Zəngəzur hədəsindən", Paşinyanın "Naxçıvan dəhlizi" eyhamından gedir. İlham Əliyev dedi ki, Ermənistan istəsə də, istəməsə də Zəngəzur dəhlizi açılacaq. İstəməsə, zorla həll edəcəyik. Nikol Paşinyansa həmin vaxt bildirdi ki, o zaman Ermənistan da eyni məntiqlə "Naxçıvan dəhlizi"ndən söz aça bilər. İlham Əliyev 10 noyabr razılaşmasında "Zəngəzur dəhlizi"ndən bəhs olunduğunu tarixi nailiyyət kimi qiymətləndirirdi, Nikol Paşinyan bu razılaşmada hər hansı "Zəngəzur dəhlizi"nin nəzərdə tutulmadığını, yalnız bölgənin blokadadan çıxarılmasının göstərildiyini iddia edirdi. Məlum oldu ki, Ermənistanın baş naziri Nikol Paşinyanın tənqidi fikirləri onun seçkiqabağı əhvala uyğun dediyi sözlər olub və bu, ölkəsindəki narazı qrupun könlünü qazanmaq üçün edilib. Azərbaycan “Zəngəzur dəhlizi”ndən dəmiryolu və avtomobil yolunun çəkilməsini istəyir. Bu yol həm Azərbaycanının böyük hissəsini Naxçıvanla əlaqələndirəcək, həm də Naxçıvan üzərindən Azərbaycan Türkiyə ilə birbaşa dəmiryolu və avtomobil yolu ilə əlaqə quracaq. Qarabağ münaqişəsindən əvvəl bu dəhliz isitfadə olunub, amma münaqişədən sonra Naxçıvanla quru əlaqəsi ancaq İran ərazisindən keçməklə təmin edilib. Artıq Ermənistan anlayır ki, Azərbaycana təzyiq etməklə əlavə nəsə əldə edə bilməyəcək. Bu səbəbdən də, artıq Paşinyanın özü də Türkiyə ilə əlaqələrin bərpasının və kommunikasiyaların açılmasının zəruriliyini dilə gətirir. Ərdoğanın isə Paşinyanın qarşısında qoyduğu birinci şərt “Zəngəzur dəhlizi” ilə bağlıdır. Bu baxımdan da Ermənistan rəsmilərinin dəhlizlə bağlı verdiyi müsbət impulslar təsadüfi deyil. Ermənistanın kommunkasiyaları bərpa etməkdən başqa çarəsi qalmayıb”.
Politoloqun sözlərinə görə, yaxın zamanda biz Ermənistan tərəfdən bu istiqamətdə daha konkret addımların atıldığının şahidi olacağıq.
Məhəmmədəli QƏRİBLİ
