BMT Baş Assambleyasının 76-cı sessiyasının illik ümumi müzakirələrində Prezident İlham Əliyev videoformatda çıxışı zamanı olduqca mühüm məsələlərə toxunub və bir sıra vacib təkliflər, ideyalar irəli sürüb.
Azərbaycan Prezidenti COVID-19-dan sonra qlobal bərpa üzrə Yüksək Səviyyəli Panelin yaradılmasını təklif edib: “Hesab edirik ki, COVID-19-dan sonra daha yaxşı bərpa üçün güclü, əlaqələndirilmiş və məqsədyönlü qlobal addımlara ehtiyac var. Bu mənada biz pandemiyadan sonrakı dövr üçün qlobal tədbirlərə dair tövsiyələr hazırlayacaq BMT-nin COVID-19-dan sonra qlobal bərpa üzrə Yüksək Səviyyəli Panelinin yaradılmasını təklif edirik…”
Azərbaycan Prezidentinin COVID-19-dan sonra qlobal bərpa üzrə Yüksək Səviyyəli Panelin yaradılması təklifinin əhəmiyyəti nədən ibarətdir?
“Prezidentin dünənki çıxışında verdiyi bu təklif bütövlükdə bəşəriyyətə çox böyük xidmətin nümunəsi olacaq”
Millət vəkili Musa Quliyev “Bakı-Xəbər”ə şərhində bildirdi ki, ümimiyyətlə, Azərbaycan Prezidenti İlham Əliyev dünya miqyasında bir siyasətçidir və çox tez-tez dünya əhəmiyyətli məsələlərdə yenilikçi ideyalarla çıxış edir. M.Quliyev qeyd etdi ki, pandemiya yeni başladığı dövrdə Azərbaycan Qoşulmama Hərəkatının sədri olaraq BMT-yə müraciət edib: “Məhz Azərbaycan Prezidentinin müraciəti əsasında da keçən ilin 3-4 dekabr tarixində BMT-nin xüsusi iclası keçirildi. Ondan sonra isə cənab Prezidentin təklifi ilə bu ilin martında COVID-19-la mübarizədə “vaksin millətçiliyi” ilə bağlı BMT-nin xüsusi komissiyasının iclası keçirildi. Prezidentin dünənki çıxışı da çox böyük konseptual əhəmiyyətə malik çıxışdır”.
M.Quliyevin sözlərinə görə, Prezident öz çıxışında bir çox məsələlərə toxundu, ölkə, region və dünya əhəmiyyətli məsələləri qabartdı, o cümlədən də COVID-19-la mübarizədə Azərbaycanın töhfələrini dünya birliyinə çatdırmaqla yanaşı, özünün postpandemiya dövrü üçün proqramını təqdim etdi: “Prezident bildirdi ki, postcovid dövründə də dünya iqtisadiyyatının və dünyada sosial-humanitar məsələlərin həlli üçün yüksək səviyyəli bir panel qurulması çox vacib məsələdir. Burada həm müzakirə etməyə, həm əməkdaşlıq etməyə, həm də yoxsul dövlətlərin, COVİD-dən daha çox əziyyət çəkən ölkələrə dəstək kimi çoxlu vacib məsələlər var. İnanıram ki, bunlar da həm dünya birliyi, həm orada iştirak edən bütün ölkələr, o cümlədən dünya əhalisi tərəfindən olduqca müsbət qarşılanan məsələlərdir. Əminəm ki, Yüksək Səviyyəli Panelin yaradılması təklifi dəyərləndiriləcək və bu platforma da baş tutacaq. Bu da Azərbaycanın dünyada imicini daha da yüksəldən məsələlərdən biri olacaq. Azərbaycan artıq dünyada əməkdaşlığın tərəfdarı, tərəfdaşı olan bir ölkə kimi tanınır və Azərbaycanın təşəbbüsü ilə ölkəmizdə istər region, istərsə də beynəlxalq əhəmiyyətli yüzlərlə tədbir keçirilib. Bundan sonra da keçiriləcək. Koronavirus pandemiyası artıq sona yetmək üzrədir, yəqin bir ilə, il yarıma bu məsələ bitəcək. Ondan sonrakı dövrü artıq cənab Prezident düşünür, proqramını hazırlayır. Çıxışında da bildirdi ki, artıq ölkədə postcovid dövrü üçün bərpa və inkişaf proqramı hazırlanması barədə tapşırıq verib. Hesab edirəm ki, cənab Prezidentin dünənki çıxışında verdiyi bu təklif bütövlüklükdə bəşəriyyətə çox böyük xidmətin nümunəsi olacaq”.
İradə SARIYEVA
