“Bu məsələyə beynəlxalq diqqətin cəlb edilməsi məqsədilə Azərbaycan BMT-nin İnsan Hüquqları Şurasında Qoşulmama Hərəkatı adından bütün ölkələrin peyvəndlərə bərabər və universal çıxışının təmin edilməsinə dair qətnamə irəli sürüb və həmin qətnamə cari ilin mart ayında yekdilliklə qəbul edilib.
Cari sessiya çərçivəsində Azərbaycan BMT Baş Assambleyasında eyni mövzuda qətnamə layihəsini irəli sürməyi planlaşdırır...” Prezident İlham Əliyev bu fikirləri BMT Baş Assambleyasının 76-cı sessiyasının illik ümumi müzakirələrindəki videoformatda tədqim etdiyi çıxışı zamanı deyib.
Azərbaycan Prezidentinin səsləndirdiyi bu təklifin, təşəbbüsün əhəmiyyəti nədir? BMT-nin Baş Assambleyası belə bir qətnamə qəbul etsə bunun nə kimi əhəmiyyəti olacaq?
“Azərbaycan Prezidentinin irəli sürdüyü bu təşəbbüs əsasında BMT qətnamə, sənəd qəbul edərsə, bu, pandemiya ilə ümumbəşəri mübarizədə böyük əhəmiyyətə malik olacaq”
“İki sahil” qəzetinin baş redaktoru Vüqar Rəhimzadə “Bakı-Xəbər”ə şərhində bildirdi ki, bütün dünyanı aquşuna alan COVID-19 pandemiyası dünya iqtisadiyyatına ciddi ziyan vurub, sosial-ictimai həyata kifayət qədər mənfi təsir göstərib. “Bu baxımdan düşünürəm ki, pandemiyanın zərərli təsirlərinin qarşısının alınmasında, pandemiyaya qarşı mübarizədə Azərbaycan nümunəvi ölkə kimi öz təşəbbüslərini, öz təkliflərini davamlı şəkildə nümayiş etdirib, açıq şəkildə elan edib. Azərbaycan Qoşulmama Hərəkatında da, İslam Əməkdaşlıq Təşkilatının tədbirlərində də bu fikirləri, təklifləri səsləndirib, dünyada COVID-19-a qarşı vaksinlərin bərabər bölünməsini və burada ədalət prinsplərini daim önə çəkib. Cənab Prezident BMT Baş Assambleyasının 76-cı sessiyasındakı çıxışında səsləndirdiyi fikirlər tamamilə reallığı əks etdirir. BMT bu təklifi birmənalı şəkildə qəbul edib və dünyanın bütün ölkələrinin bərabərhüquqlu şəkildə vaksinlə təmin edilməsi üçün səylər nümayiş etdirməlidir. Bu ədalətin ən yüksək bir göstəricisidir, ədalət prinsiplərinin bərqərar olunmasına verilmiş çox mühüm töhfədir. Hesab edirəm ki, COVID-19-la bağlı bir çox ölkələrdə vaksinasiya problemi yaşanır”.
Vaksinasiya probleminin daha qabarıq şəkildə Afrika ölkələrində yaşandığını vurğulayan V.Rəhimzadə deyib ki, bu ölkələrdə xeyli sayda insan pandemiyadan əziyyət çəkir, burada kifayət qədər narahatlıq yaradan məqamlar var. “Vaksinlərin bərabər şəkildə bölünməsi və vaksinasiya proseslərinin ədalətli nümayiş olunması Azərbaycanın təşəbbüsüdür, təklifidir. Ümumiyyətlə, Azərbaycan bu cür tədbirlərdə kifayət qədər aktivlik nümayiş etdirir və öz qəti, prinsipial mövqeyini davamlı şəkildə ortaya qoyur. Hesab edirəm ki, çox ədalətli yanaşmadır və Azərbaycan həmişə bu təkliflərlə çıxış edib. BMT kimi dünyanın bir nömrəli beynəlxalq təşkilatında da belə bir təklifin səsləndirilməsi Azərbaycanın bu məsələdə nə qədər prinsipial olduğunu və ədalətə nə qədər dəstək verdiyini ortaya qoyur. Fikrimcə, BMT cənab Prezidentin təklifini, təşəbbüsünü dəstəkləməlidir və BMT COVID-19-a qarşı mübarizə tədbirlərində əhəmiyyətli dərəcədə yararlanmalıdır. Azərbaycan Prezidentinin irəli sürdüyü bu təşəbbüs əsasında BMT qətnamə, sənəd qəbul edərsə, bu, pandemiya ilə ümumbəşəri mübarizədə böyük əhəmiyyətə malik olacaq. Hesab edirəm ki, bu qətnamə qəbul ediləcək və insanlara fayda verəcək, “vaksin şovinzmin”nin qarşısını almaqda mühüm rol oynayacaq”-deyə V.Rəhimzadə qeyd etdi.
İradə SARIYEVA
