Erməni lobbisi Azərbaycanda hərbi əsirlər məsələsində ABŞ Konqresini tam təsir altına saldı...

Afsəddin Nəbiyev: “Nümayəndələr Palatası erməni lobbisinin girovuna çevrilib”

img

ABŞ Konqresindən Azərbaycana qarşı növbəti təxribat. Nümayəndələr Palatası Azərbaycandan erməni əsirlərin (diversant) dərhal azad olunmasını tələb edib. Bu tələblə Konqresin Nümayəndələr Palatasında qanun qəbul edilib.

Nümayəndələr Palatasının 16 üzvü tərəfindən təqdim olunan qanun layihəsində, guya Azərbaycanın müharibə qaydalarına riayət etmədiyi də öz əksini tapıb və bunun araşdırılması tələb olunub. Bundan əlavə, 44 günlük müharibədə Azərbaycanın istifadə etdiyi Cardenas-Schiff-Sherman Türk pilotsuz uçuş aparatlarının hazırlanmasında Amerika texnologiyasından istifadənin olub-olmadığının araşdırılması tələb edilir.

Sənədin müəlliflərindən biri, ermənipərəst konqresmen Frank Pallone bildirib ki, bu, Azərbaycan kimi ölkələrə pul ayıran ABŞ Müdafiə Nazirliyinə nəzarəti gücləndirəcək. Pallone Pentaqonu və Dövlət Departamentini Azərbaycanın Sərhəd Qüvvələrinə 2018-19-cu illərdə 100 milyon dollardan çox vəsait ayırmaqda da günahlandırıb.

Məlumat üçün qeyd edək ki, ABŞ Konqresinin Nümayəndələr Palatasında Azərbaycana qarşı bu cür qərəzli və ikili yanaşmanın tez-tez şahidi oluruq. Ancaq Nümayəndələr Palatasının qəbul etdiyi heç bir qanun ABŞ hökumətinin xarici siyasəti və mövqeyi kimi qəbul olunmur. ABŞ Konqresinin Nümatyəndələr Palatası və erməni lobbisindən pul alıb saxta qanun layihələri qəbul edən senatorlar anlamalıdırlar ki, Azərbaycan suveren dövlətdir və müstəqil siyasət yürüdür. ABŞ da daxil olmaqla, heç bir ölkə Azərbaycandan nə isə tələb edə və diqtə dili ilə danışa bilməz.

  • “Necə ola bilər ki, ABŞ Azərbaycanın ərazi bütövlüyünü dəstəklədiyi halda, diversantların buraxılmasını tələb etsin?!”

Məsələyə münasibət bildirən AMİP-in sədr müavini Afsəddin Nəbiyevin fikrincə, Nümayəndələr Palatası erməni lobbisinin girovuna çevrilib: “Əslində bu addımlar gözlənilən idi. Erməni lobbisinin yerində dayanmayacağını əvvəlcədən də priqnozlaşdırırdıq. Qısa olaraq keçmiş tarixə nəzər salsaq görərik ki, 1992-ci ildə də oxşar hadisələr baş verdi. Həmin ilin sonlarında Azərbaycanı ABŞ yardımından ayırmaq işində məlum 907-ci düzəlişin qəbul olunması prosesində erməni lobbiçiləri Nümayəndələr Palatasının ermənipərəst üzvlərini (xüsusən Koliforniya  ştatından) bu işə cəlb ediblər. Görünən odur ki, tarix təkrarlanır. Bir həqiqət ondan ibarətdir ki, 1992-ci ildə qanun qəbul edilən zaman Azərbaycanın Vaşinqtonda heç bir nümayəndəliyi yox idi. Az qala 30 ildən çox vaxt keçməsinə baxmayaraq, erməni lobbisinin Amerika Nümayəndələr Palatasına təsir imkanlarının hələ də qaldığını görürük. Erməni lobbiçiləri təkcə Amerikada deyil, Fransada, Belçikada, Niderlandda və digər ölkələrdə hələ də böyük təsir imkanlarına malik olaraq Azərbaycana qarşı müəyyən qərarların qəbul edilməsinə nail olurlar. Bu prosesin daha qabarıq görsənməsinin bir səbəbi də Azərbaycanın 44 günlük Vətən savaşında erməni ordusunu, mifologiyasını darmadağın etməsi olub. Bu qələbə həm də dünyada fəaliyyət göstərən erməni lobbisinin belini qırdı. Vətən savaşından 1 il ötdü. Erməni lobbisi özünə gələrək  Azərbaycana qarşı bir çox dövlətlər vasitəsilə təzyiqi artırmağa başlayıb. Azərbaycan diplomatiyasının, diaspor nümayəndələrimizin daha güclü çalışması və ehtiyatı bir an belə əldən verməmək zərurəti yaranıb. Əslində ABŞ dövlət olaraq bütün məsələləri çox gözəl bilir. Necə ola bilər ki, ABŞ Azərbaycanın ərazi bütövlüyünü dəstəklədiyi halda diversantların buraxılmasını tələb etsin?! Axı bu nonsesdir! Azərbaycan öz ərazizində təhlükəsizliyin təmin olunması üçün qanunvericiliklə nəzərdə tutulmuş addımları ataraq öz suveren ərazimizdə istənilən antiterror tədbirləri həyata keçirmək hüququna malikdir. Onda məntiqlə, ABŞ dövləti bir məsələ ilə bağlı iki mövqe nümayiş etdirir. Bu da ikili standartdan başqa bir şey deyil”.

Sədr müavini onu da qeyd etdi ki, Azərbaycan dövləti ABŞ-la bu məsələ barədə açıq danışmalıdır. Çünki bu addımlar beynəlxalq hüququn prinsiplərinə ziddir.

Vidadi ORDAHALLI

Son xəbərlər