İrandan Azərbaycana müharibə elanına bərabər təhdid - Bakıya 4 min raket, Amili şükürlü imiş ki...

İbrahim Rüstəmli: “İran olmur kim olur-olsun, Azərbaycanın ərazi bütövlüyünə hörmət etməsə adekvat cavab alacaq”

img

Azərbaycana 4000 raket atılacaq və Bakı məhv ediləcək”. Bu sözləri İran Silahlı Qüvvələri Baş Qərargah rəisi general Məhəmməd Baqiri söyləyib.

O, münaqişə kəskinləşəcəyi təqdirdə Azərbaycana 4000 raket ataraq, Bakını məhv edəcəkləri barədə sərsəmləyib.

Görünən odur ki, Azərbaycanın öz sərhədlərində - Gorus-Qafan yolunda nəzarət-buraxılış məntəqəsi qurması İranı əməlli-başlı özündən çıxarıb. İran yük maşınlarının Qarabağa qeyri-humanitar yük daşımalarının qarşısının alınmasına SEPAH qüvvələri Arazın o tayında hərbi təlim keçirməklə cavab verib. Təlimlər Horadizin paralelində yerləşən Aslandüzdən İran Culfasınadək əraziləri əhatə edib. Horadizdən Mehri rayonuna qədər ərazilərimizin işğaldan azad olunduğunu və təlimlərin də məhz bu ərazidə keçirildiyini nəzərə alsaq, İranın bu addımının Azərbaycanı hərbi müdaxilə ilə təhdid olduğu aydındır. İran bu təhdidini yalnız hərbi təlimlərlə deyil, həm də sözlə dilə gətirib. İran dini lideri Ayətullah Xamneyinin nümayəndəsi, Ərdəbil imamcüməsi ayətullah Seyid Həsən Amili öz cümə xütbəsində Azərbaycana “şirin quyruğu ilə oynamamağı” məsləhət görüb. İndi də baş qərargah rəisi təhdid dilində danışır.

Bütün bunlar nə deməkdir?

  • “Heç kəsin haqqı yoxdur ki, ölkəmizlə belə təhdid dilində danışsın”

Məsələyə münasibət bildirən hərbi ekspert İbrahim Rüstəmlinin sözlərinə görə, bu cür təhdid xarakterli sərsəmləmələr məsulyyətsiz açıqlamalardır: “Əvvəla, heç bir dövlətin Azərbaycanı təhdid etməyə əsası yoxdur. 44 günlük müharibədə Azərbaycan Ordusu öz qüdrətini bütün dünyaya göstərdi. Azərbaycan erməni işğalına son qoyaraq ərazi bütövlüyünü bərpa etdi. Belə olan halda İran niyə narahatdır? Neçə vaxtdır İran qanunsuz olaraq birbaşa Qarabağa yük daşıyır. Azərbaycanın icazəsi olmadan bu cür fəaliyyətlə məşğul olmaq beynəlxalq hüquqa ziddir. Dəfələrlə bununla bağlı foto, video faktlar ortaya qoyularaq İrana xəbərdarlıq edilib ki, buna son qoyulsun. Əhəmiyyət verməyiblər. Ən sonda Azərbaycan Gorus-Qafan yolunun ərazimizə düşən hissəsində müvafiq addımlar atmalı oldu. İranın 2 sürücüsü buna görə saxlanıldı. İran olmur kim olur-olsun, Azərbaycanın ərazi bütövlüyünə hörmət etməsə adekvat cavab alacaq. Azərbaycanın müasir hava hücumundan müdafiə sistemləri Ermənistanın atdığı raketlərin çoxunu məhv etdi. Bu baxımdan İranın atacağı raketləri də sıradan çıxarmaq çətin olmayacaq. Belə qoçaqdılarsa, öz nüvə alimlərini qorusunlar. Heç kəsin haqqı yoxdur ki, Azərbaycanla belə təhdid dilində danışsın. Zəhmət çəkib beynəlxalq hüquqa hörmət etsinlər”.

Hərbi ekspert onu da qeyd etdi ki, bu cür sərsəm açıqlamalarla Azərbaycanı qorxutmaq mümkün olmayacaq.

Vidadi ORDAHALLI

Son xəbərlər