Rusiya sülhməramlı qüvvələri Qarabağdan çıxarılır...
Dəlidən doğru xəbər. Hər halda, Rusiya Liberal Demokrat Partiyasının sədri Vladimir Jirinovskinin sensasion hesab edilə biləcək açıqlamasını məhz bu qəbildən qiymətləndirmək olar.
Onun açıqlamalarından belə bəlli olur ki, Moskva Ermənistana yardımı dayandırmalı, bölgədən öz hərbi qüvvələrini çıxarmalıdır. Bu xüsusda Jirinovski qeyd edib: "Hazırda biz Ermənistana Azərbaycana qarşı yardım edirik. Artıq Əfqanıstanda aclıq çəkənlər üçün təyyarələr formalaşıb-qruplaşır. LDPR bunlara qarşıdır. Biz daim bunlara qarşı olacağıq. Bir qram da olsun ərzaq heç bir xarici dövlətə verilməməlidir. Heç bir ölkəyə heç bir qəpik, heç bir əsgər göndərilməməlidir. Biz öz vətəndaşlarımıza kömək etməliyik. Bu, ən doğru addımdır". Qeyd edək ki, Azərbaycan da rus sülhməramlı qüvvələrinin fəaliyyətindən narazıdır. Azərbaycan və Ermənistan arasında vaxtaşırı baş verən atışmalar fonunda Bakı Qarabağda Rusiya sülhməramlılarının olduğu ərazilərdə erməni qüvvələrinin qalmasından narazılığını bildirir. Bakı onu da bildirir ki, Rusiya Ermənistan silahlı qüvvələrinin bölgədə yerləşdirilməsi hallarına son qoymalıdır. Hazırda Rusiya sülhməramlı qüvvələrinin məsuliyyət zonasında əsas söz sahibi məhz Rusiya dövlətidir. Bu fonda Azərbaycan Rusiya sülhməramlılarından Qarabağdakı erməni qüvvələrin çıxarılmasını tələb edir. Bakı burada ötən il müharibəyə son qoyan 10 noyabr bəyannaməsinə istinad edir. Bu sənədin dördüncü bəndini göstərən Azərbaycan bildirir ki, bölgəyə Rusiya sülməramlıları yerləşdirilən kimi erməni qüvvələri Qarabağdan geri çəkilməli idi. Amma buna riayət edilməyib. Əvəzində rus sülhməramlılarının mandatı sülhün qorunmasını nəzərdə tutsa da, onların fəaliyyəti humanitar problemlərdən tutmuş infrastruktur layihələrədək geniş sahəni əhatə edir.
Azərbaycan Müdafiə Nazirliyinin son açıqlamaları da ölkəmizin Rusiya sülməramlılarından narazılığını ifadə edir. Belə ki, bir müddət əvvəl Müdafiə Nazirliyi İran yük maşınlarının qanunsuz olaraq Qarabağa gəlişinə şərait yaratmasına görə Rusiya sülməramlılarından narazılığını bildirmişdi: “Digər ölkələrə aid nəqliyyat vasitələrinin Rusiya Federasıyası sülhməramlılarının müvəqqəti yerləşdirildiyi Azərbaycan Respublikası ərazilərinə qanunsuz keçməsi ilə bağlı Müdafiə Nazirliyi tərəfindən Rusiya Federasiyası Müdafiə Nazirliyi və Sülhməramlı qüvvələrin komandanlığına məktublar ünvanlanıb. Məktublarda qeyd olunub ki, bu kimi hallar Azərbaycan Respublikası və Rusiya Federasiyası Prezidentlərinin və Ermənistan Baş nazirinin 10 noyabr 2020-ci ildə imzaladığı üçtərəfli bəyanata ziddir və onların qarşısının alınması xahiş olunub. Azərbaycan Respublikasının razılığı olmadan digər ölkələrin hüquqi və fiziki şəxsləri və onlara aid nəqliyyat vasitələri Azərbaycan ərazisinə daxil ola bilməz və bu kimi hallar ölkəmizin qanunlarının pozulmasıdır”. Bu günlərdə Müdafiə Nazirliyi daha bir narazılığını diqqətə çatdırıb. Müdafiə Nazirliyinin Mətbuat Xidmətinin rəis müavini, polkovnik-leytenant Anar Eyvazov bu xüsusda bildirib: “Rusiya Müdafiə Nazirliyinin erməni tərəfinə istinadən Azərbaycan ordusunun bölmələri tərəfindən guya atəşin açılması nəticəsində sentyabrın 17-də Şuşa istiqamətində 2 erməni silahlısının yaralanması barədə yaydığı məlumat təəccüb və təəssüf doğurur. Belə ki, haqqında bəhs olunan hadisə Azərbaycan Respublikası Müdafiə Nazirliyi nümayəndələrinin və Rusiya Federasiyasının Sülhməramlı kontinqentinin rəhbərliyinin birgə iştirakı ilə araşdırılıb. Nəticə etibarilə, qeyd olunan tarixdə və göstərilən istiqamətdə bölmələrimiz tərəfindən hər hansı atəşin açılmadığı təsbit olunub. Hər iki tərəfin iştirakı ilə araşdırılmış məlumatın sonradan tamamilə əks formada təqdim edilməsi anlaşılan deyildir. Azərbaycan tərəfi üçtərəfli bəyanatın müddəalarına ciddi riayət etməklə ölkəmizin qanunlarına uyğun olaraq bölgədə sabitliyin təmin edilməsi və mümkün təxribatların qarşısının alınması istiqamətində səylərini davam etdirir”. Erməni mediası da bildirir ki, Azərbaycanın Rusiya sülməramlılarından narazılığı artır. Ermənistanın “Qraparak” nəşri yazıb ki, məhz bu səbəbdən Azərbaycan konkret addımlar atır: “Rüstəm Muradovun uzaqlaşmasından və Qarabağdakı Rusiya sülhməramlı qüvvələrinin komandiri vəzifəsinə general-mayor Mixail Kosobokovun təyin edilməsindən sonra azərbaycanlılar aktivləşib”. Nəşrin Qarabağdakı mənbələri bildirib ki, bu yaxınlarda azərbaycanlılar Şuşaya gedən Rusiya UAZ-ını dayandırıb yoxlayıblar və bu, rus əsgərlərdə şok yaradıb. Bildirilib ki, ruslar bir neçə aydır Qarabağdadır, lakin Azərbaycan əsgərlərinin onları yoxlaması ilk hadisədir.
Bu halda Azərbaycan Rusiya sülməramlılarının bölgəni tərk etməsində maraqlıdır. Qeyd edək ki, Qarabağdakı Rusiya sülhməramlıları 5 il müddətinə bölgədə fəaliyyət göstərəcək. 5 ilin tamamında tərəflərdən hansı etiraz etsə, sülhməramlılar həmin ərazidən çıxmalıdır. Prosesin də məhz Rusiya sülməramlılarının çıxması ilə nəticələnməsi tamamilə gözləniləndir. Kremlin danışan dili olan Rusiya Liberal Demokrat Partiyasının sədri Vladimir Jirinovskinin sensasion açıqlaması bu mənada təsadüf hesab edilmir. LDPR sədri açıq mətnlə ermənilərə Azərbaycana qarşı edilən yardımların kəsilməli olduğunu deyib. Bu açıqlama erməni sosial şəbəkələrində sürətlə yayılmaqda və ən müxtəlif məzmunlu tənqidlərə məruz qalmaqdadır. Amma onsuz da regionda ermənilərin fikri ilə hesablaşan yoxdur. Rusların bölgəni tərk etməsi isə qaçılmaz sayılır.
Tahir TAĞIYEV
