Sosial şəbəkələrdə, xüsusən də “Teleqram”da Ermənistanda rus kilsələrinə qarşı mənfi münasibət göstərildiyi barədə çeşidli məlumatlar yer alır. İndiki Ermənistan ərazisində 1846-cı ildə aid “Möcüzəli Nikolay” rus kilsəsi çox acınacaqlı durumdadır, kilsə baxımsızlıq ucbatından yarıuçuq vəziyyətə düşüb.
1846-cı ildə Ermənistanın Amrakits bölgəsində tikilmiş pravoslavlara aid "Möcüzəli Nikolay" rus kilsəsinin vəziyyəti qətiyyən bu ölkəni maraqlandırmır. Maraqlıdır, Qarabağda “xristian dəyərlərinin qorunması vacibliyindən” danışan, “qoymayın, Qarabağda xristian irsi dağıdılır” deyə haray çəkən beynəlxalq təşkilatlar, eləcə də Rusiya ziyalıları Ermənistanda acınacaqlı hala düşən, dağılan bu kilsə haqqında niyə bir kəlmə də olsun danışmırlar? Rusiya nə üçün bunu Ermənistana irad tutur, nə üçün rus ziyalıları, mədəniyyət, din xadimləri susurlar?
“Ermənistanda rusfobiya, pravoslavofobiya artıq 30 ildir ki, özünü qabarıq göstərir, amma Rusiya bunu görməzdən gəlir”
Tarixçi-etnoqraf Ənvər Çingizoğlunun sözlərinə görə, indiki Ermənistan ərazisində rus pravoslav kilsəsinin aqibətinə biganə qalanlar uzun illər dağıdılan Azərbaycan-türk irsinin taleyinə biganə qalanlardır. Ekspert hesab edir ki, ermənilərin cinayətkar əməllərini bütün dünya görməlidir: “Məsələ burasındadır ki, indiyə qədər Ermənistanın, ermənilərin törətdiyi cinayətləri nə Rusiya “görür”, nə də Qərb ölkələri. Sanki bütün dünyanın gözü yumulub. Ermənistanda rusfobiya, pravoslavofobiya artıq 30 ildir ki, özünü qabarıq göstərir, amma Rusiya bunu görməzdən gəlir. İrəvanda rus dram teatrını bağladılar, bir neçə dəfə Rusiya bayrağını yandırdılar, rus pravoslav kilsələrini yoxa çıxardılar, bəzilərinin isə baxımsızlıqdan məhv olmasına imkan verdilər. Ermənistanda rus kilsələrinə hər hansı bir qayğı və sevginin olmadığı məlumdur. Vaxtilə orada yaşayan molokanlar da artıq köçüblər, ibadət yerləri məhv edilib. O molokanlar ermənilərdən əvvəl Qərbi Azərbaycanda yaşayırdılar, amma ermənilər onların da irsinə, həyat tərzinə zərbə vurdular. Çox təəssüf ki, rus ziyalıları, Risiya hökuməti Ermənistanın rus pravoslav kilsələrinə mənfi münasətini görmək istəmir. Maraqlıdır, 44 günlük müharibədən sonra “Qarabağda xristian irsi Azərbaycan tərəfindən dağıdılmaq təhlükəsi ilə üzləşib” cəfəngfiyatı ilə YUNESCO-ya müraciəti müraciətin üstündən göndərən rus mədəniyyət adamları indi niyə susur? Söhbət Ermənistanda uçub dağılan, baxımsız vəziyyətdə qalan rus pravoslav kilsəsindən gedirsə, bunu Rusiya görməlidir” deyə qeyd edən Ə.Çingizoğlunun sözlərinə görə, Azərbaycanda bir dənə də olsun xristian abidəsinə laqeyd münasibət yoxdur. Ekspert deyir ki, nəhayət dünya gözünü açıb Ermənistanı görməlidir. Ə.Çingizoğlunun sözlərinə görə, ermənilər özlərinə aid olmayan bütün abidələri erməniləşdiriblər, erməniləşdirə bilmədiklərini isə ya məhv ediblər, ya da uçub yıxılmaq təhlükəsi ilə üz-üzə qoyublar.
İradə SARIYEVA
