Nikol Paşinyan hakimiyyəti məğlubiyyətdən ciddi nəticə çıxarıb konstruktiv mövqe sərgiləmək əvəzinə, əvvəlki pozucu mövqedən çıxış edir. Azərbaycan və Türkiyə ilə normal münasibətlər qurmağa cəhd etmək əvəzinə Ermənistanı daha dərin sosial-iqtisadi böhrana sürükləyən addımlar atır. Azərbaycanla sərhəd bölgəsində hərbi təxribatlar törətməklə, Ermənistanın onsuz da olmayan dövlət büdcəsini boşaldır. Halbuki, Paşinyan hakimiyyəti bu hərbi təxribatlarla yalnız dövlət büdcəsini deyil, həm də elə Ermənistanı boşaldır.
Məsələ ondadır ki, Ermənistan mətbuatının verdiyi məlumata görə, ermənilər bu ölkənin perspektivlərinə ciddi şübhə ilə yanaşırlar. Ona görə də, ölkədən mühacirət edənlərin sayı yenidən sürətlə artmağa başlayıb. Ən son məlumatlar onu göstərir ki, miqrasiya artan xətt üzrə inkişaf edir. “Joxovurd” qəzeti yazır ki, Ermənistanda son 7 ay ərzində azı 43 mindən çox vətəndaş ölkəni tərk edib. Qəzetin Mülki Aviasiya Komitəsindəki mənbələrinə görə, təkcə “Zvartnots” aeroportundan yanvar-iyul aylarında ölkədən çıxan 488 833 sərnişinin 27 016 nəfəri geri qayıtmayıb. O da bildirilir ki, aviareyslər vasitəsilə ölkəni tərk edənlər barədə rəqəmlər ümumi mənzərəni görmək üçün kifayət deyil. Çünki xeyli insan həmçinin quru yolla ölkədən gedir. Komitənin məlumatında o da qeyd olunur ki, sərhədlər tam açılacağı təqdirdə bu rəqəmlər daha yüksək ola bilər.
Görünən odur ki, Ermənistanın boşalması hər keçən gün daha da artır.
“Pandemiya ilə bağlı məhdudiyyətlər olmasaydı, daha çox erməni Ermənistanı tərk edəcəkdi”
Məsələyə münasibət bildirən AMİP funksioneri Əli Orucovun sözlərinə görə, Ermənistanda miqrasiyanın güclənəcəyi gözlənilən idi: “Ermənistanda hakimiyyətdə olan qüvvələrin uzun illərdir apardığı işğalçılıq siyasəti bunu qaçılmaz reallığa çevirdi. Məlum olduğu kimi, uzun illərdir sosial-iqtisadi problemlərlə üz-üzə qalan Ermənistan ötən il 44 günlük müharibədə Azərbaycanın qarşısında ağır məğlubiyyətə uğradıqdan sonra yeni tənəzzül dövrünə qədəm qoyub. Belə ki, məğlub ölkə ciddi ictimai-siyasi xaosla yanaşı, dərin sosial-iqtisadi böhran dövrünü də yaşayır. İqtisadiyyatı tamamilə sıradan çıxan dövlətin vətəndaşları hər fürsətdə ölkəni tərk etməyə, xaricə üz tutmağa çalışırlar. Məhz bu səbəbdən son aylarda ölkəni tərk edənlərin sayı dəfələrlə artıb. Hazırkı vəziyyət məğlub ölkə üçün iqtisadi inkişaf və sosial rifah vəd etmir. Üstəlik, 2021-ci ilin yanvar-iyun aylarında 2020-ci ilin eyni dövrü ilə müqayisədə sosial müavinətlərin, pensiyaların, minimum əməkhaqqının, dövlət qulluqçularının məvaciblərinin artımı baş verməsə də, ciddi bahalaşma qeydə alınıb. Belə olan halda erməni əhalisi ölkədə qalmağın perspektivsiz olduğunu düşünür və imkan yaranan kimi ölkəni tərk edirlər. Çünki ölkəyə xarici sərmayə gəlmir, Ermənistanın iqtisadiyyatı canlandırmaq üçün vəsaitləri yoxdur. Üstəlik, Türkiyə və Azərbaycanla sərhədlər hələ də bağlıdır. Belə olan halda ölkədə qalmaq üçün heç bir perspektiv görmürlər”.
Partiya funksioneri onu da qeyd etdi ki, pandemiya ilə bağlı məhdudiyyətlər olmasaydı, o zaman daha çox erməni ölkəni tərk edəcəkdi.
Vidadi ORDAHALLI
