Azərbaycanın Xankəndi şəhərində yaşayan bir qrup erməni əhali iş üçün Şuşadakı Azərbaycan hərbçilərinə müraciət edib. Bu kadrların əks edildiyi videoda ermənilərin Rusiya sülhməramlı hərbçilərinin iştirakı ilə Şuşanın giriş postuna yaxınlaşaraq, Azərbaycan vətəndaşlığı qəbul etməyə hazır olduqlarını bildirdikləri nümayiş olunur. Daha sonra ermənilər Azərbaycan dövlətindən iş istəyiblər. Onlar bildiriblər ki, çox bərbad vəziyyətdə yaşayırlar: “Xankəndidə iş, çörək yoxdur, ac qalmışıq. Azərbaycan dövlətindən xahiş edirik ki, bizi vətəndaşlığına qəbul edib iş versin. Xankəndi əhalisinin əksəriyyəti Azərbaycan dövlətinin Qarabağda apardığı yenidənqurma işlərinə dəstək verməyə hazırdır, biz burada fəhlə də işləməyə hazırıq, yetər ki, bizə iş verin". Azərbaycan hərbçiləri isə ermənilərin xahişlərini lazımı dövlət qurumlarına çatdıracaqlarına söz veriblər. Daha sonra sözügedən ermənilər Rusiya sülhməramlılarının müşayiətilə Xankəndiyə geri qayıdıblar.
Xankəndidə yaşayan ermənilərin bu iş istəyini Azərbaycan tərəfi necə dəyərləndirə bilər?
“Bunu kampaniyaya da çevirə bilərlər ki, biz gedib Azərbaycan rəsmi dairələrindən iş istəyirik, onlar bizi təmin etmir”
Vətəndaşların Əmək Hüquqlarının Müdafiəsi Liqasının rəhbəri Sahib Məmmədov “Bakı-Xəbər”ə bildirdi ki, bu məsələyə bir neçə aspektdən yanaşmaq lazımdır: “Əvvəlcə onların kimliyi dəqiq araşdırılmalıdır. Əgər 1992-ci il yanvarın 1-dən əvvəl Azərbaycan ərazisində yaşayıblarsa və ya həmin adamların övladlarıdırsa, onların müraciətinə baxmaq olar. Təklif etmək olar ki, ən yaxın ASAN Mərkəzə gedib, vətəndaşlıqlarını təsdiq etdirsinlər. Şəxsiyyət vəsiqələrini alandan sonra onların məşğulluq məsələsi nəzərdən keçirilə bilər. Qarabağın bütün ərazisi hüquqi baxımdan bizim yurisdiksiyadadır, faktiki baxımdan isə kiçik bir hissəsi nəzarətimizdən kənardı. Bizim nəzarətimizdən kənar ərazilərdə bank sektoru, iş yerləri də nəzarətimizdə deyil. Azərbaycan vətəndaşlığını qəbul edəndən sonra bu məsələ pilləli həllini tapa bilər. Sən ermənisən, iş yoxdursa, gəl burda işlə prinsipi keçərli olmamalıdır. Bəlkə onların hansısa təxribat planı var. Kənardan ora gələn ermənilərin vətəndaşlığı məsləsinə fərqli baxılmalıdır. Ya vətəndaşlıq verilə bilər, ya da imtina olunar. Azərbaycanda vətəndaşlıq həm də qan hüququ ilə keçir. Valideynlərindən biri 1992-ci ilin yanvar ayına kimi Azərbaycan vətəndaşı olubsa, ona verilə bilər. Əgər onlardan hansılarsa bu proseduru keçməyə hazırdırsa, bəzəilərini nəzarətimiz altında olan quruculuq işlərinə cəlb edə bilərik və əmək haqlarını da manatla ödəməliyik. Onların başqa seçimi də yoxdur. Ya ordan köçüb getməlidirlər, ya da bizim vətəndaşlığı qəbul etməlidirlər. Prezidentimiz də deyir ki, Qarabağda yaşayan ermənilərin bizimlə inteqrasiyasında maraqlıyıq. Burada bir təxribat da ola bilər. Bunu kampaniyaya da çevirə bilərlər ki, biz gedib Azərbaycan rəsmi dairələrindən iş istəyirik, onlar bizi təmin etmir. Bununla isbat etməyə çalışacaqlar ki, güya azərbaycanlılar onlarla birgəyaşayışı istəmir. Buna görə də məsələyə təmkinlə, qanun çərçivəsində yanaşmaq lazımdır”.
Məhəmmədəli QƏRİBLİ
