Erməni ictimaшнyətində, siyasi çevrələrində Rusiyanın Cənubi Qafqazda təsir imkanlarının azalmasına yönəlik əminlik geе-gedə daha da artır. İctimai rəy davamlı olaraq müxtəlif formada ona köklənir ki, Rusiyaya stavka etməyin perspektivi yoxdur. Ölkənin aparıcı siyasi ekspertləri açıq bəyan edirlər ki, Rusiya zəifləyir.
Bu baxımdan Ermənistanın Qafqaz İnstitutunun direktoru, politoloq Aleksandr İskandaryanın dəyərləndirmələri diqqəti cəlb edir. A.İskandaryanın sözlərinə görə, rus xalqı imperiya xalqı olaraq formalaşsa da, gənc nəsil üçün bu hisslər artıq sönməkdədir. Politoloq vurğulayır ki, Rusiya artıq qlobal bir ölkə olaraq çəkisini itirir. Hazırda Rusiya daha çox regional bir dövlətdir və buna keçid mərhələsi sürətlə baş verir.
Siyasi analitikin gəldiyi qənaət belədir ki, Putin Rusiyası maraqları ətrafındakı boşluğu dərk edir. Politoloq hesab edir ki, Rusiyanın Qafqazda rolu artmır, əksinə azalır. Məsələn, 2008-ci il müharibəsi Moskvaya Abxaziya və Cənubi Osetiyanı qazandırsa da, nəticədə o, regionun mühüm ölkəsi olan Gürcüstanı itirdi. Eyni şey Ukraynada da baş verdi. İkinci Qarabağ müharibəsindən sonra Rusiyanın Azərbaycana da təsir imkanları xeyli azalıb. Bunu açıq-aşkar hiss etmək olar: “Əslində Rusiyanın Qafqazla bağlı heç bir şeyi yoxdur, lakin bəzi mexanizmlər işləyir. SSRİ-nin artıq tarix olduğunu və “buna niyə ehtiyacımız var?”, - deyə düşünməyə başlayan böyük bir nəsil yetişir Rusiyada”.
Göründüyü kimi, Ermənistanda az-çox müstəqil mövqedən çıxış edən ekspertlər Rusiyanın iflasa doğru getdiyinə eyham vururlar. O baxımdan bütün bu deyilənləri ekspertlər necə dəyərləndirir?
“Ermənistan dövlətini xilas etməkdən ötrü bir növ o, həyəcan təbili çalır”
Məsələyə münasibət bildirən ekspert Azər Həsrətin sözlərinə görə, Ermənistanda sağlam mövqedən çıxış edən politoloqlar reallıqdan çıxış edərək vəziyyəti dəyərləndirir: “Əvvəla, biz hər zaman qeyd edirik ki, Ermənistan ictimai rəyi ilə işləyənlərin heç də hamısı ağıldan kəm deyil, erməni xəstəliyinə yoluxmayıb. Bu baxımdan həqiqətən də Rusiyanın vəziyyətini doğru-düzgün dəyərləndirənlər var. Çünki Rusiya nə qədər cəhd etsə də, dünya təkqütblü dünyaya çevrilir. Özü də bu, əsasən Birləşmiş Ştatların hegemonluğu altında baş verir. Rusiya əvvəlki gücünü və qüdrətini çoxdan itirib. SSRİ dağılandan sonra Rusiyanın nüfuzu üzü aşağı gedirdisə, indi bu ölkə tam zəifləyib. O baxımdan növbəti mərhələdə Rusiyanın özünün dağılmasını müşahidə edəcəyik. Yəni Rusiyada muxtar subyektlər müstəqilliyə qovuşacaqlar. Bir sıra erməni analitikləri də bu gerçəkliklərin fərqində olduğu üçün vəziyyəti düzgün dəyərləndirməyə çalışırlar. Onların arasında bəziləri Türkiyə və Azərbaycanla münasibətlərin normallaşdırılması prizmasından çıxış edir. Bununla bağlı müəyyən çağırışlar edirlər. Yəni reallıqları düzgün qiymətləndirirlər ki, Azərbaycan və Türkiyə ilə yaxınlaşmasaq vəziyyətdən çıxa bilmərik. Niyə? Ona görə ki, Rusiyanın forpostu olmağın axırı yoxdur. A.İskandaryan demək istəyir ki, Rusiyanın ardınca getməyin axırı yoxdur. Ermənistan dövlətini xilas etməkdən ötrü bir növ o, həyəcan təbili çalır”.
Bir sözlə, ekspert hesab edir ki, Ermənistan düzgün seçim edərsə, bu onların xeyrinə işləyəcək. Əks təqdirdə hər şey əksinə olacaq.
Vidadi ORDAHALLI
