“Taliban” Əfqanıstanı qəsb etdikdən sonra bu ölkədə yaşayan Azərbaycan, türkəsilli ziyalıların, ictimai-siyasi, mədəni fəalların, məmurların həyatının təhdid altına düşdüyü barədə soydaşlarımızın özlərinin dilindən eşidirik. Əfqanıstanda yaşayan bir neçə icmanın nümayəndəsi haqq səslərinin Azərbaycan dövlətinə, hökümətinə çatdırılmasını istəyirlər, buna görə də “Bakı-Xəbər”dən dəstək istəyirlər.
Soydaşımız Rezay Afşar xahiş edir ki, Əfqanıstan azərbaycanlılarının, burada yaşayan ziyalıların, icma rəhbərlərinin keçirdiyi narahat günlər haqqında Azərbaycan ictimaiyyətinə, dövlətinə məlumat verək.
Rezay Afşar: “Xahiş edirəm, Azərbaycan dövləti bizə yardımçı olsun, bizi mühacir kimi Azərbaycana qəbul etsin”
Rezay Afşar Azərbaycan dövlətinin onları mühacir kimi qəbul etməsini istəyir, Azərbaycandan başqa pənahlarının olmadığını deyir: “Əfqanıstanın vəziyyətindən xəbəriniz var. Biz Azərbaycana mühacir olmaq istəyirik. Siz bu məsələdə bizə yardımçı olun, bizim səsimizi Azərbaycan dövlətinə çatdırın. Bizim ana-bacılarımız, uşaqlarımız çox qorxur. “Talib”lər terrorçudurlar, “Talib”lər yaxşı adamlar deyillər. Sizdən yardım istəyirəm ki, bizim səsimizi Azərbaycan hökümətinə, Azərbaycan dövlətinə yetişdirin. Xahiş edirəm, Azərbaycan dövləti bizə yardımçı olsun, bizi mühacir kimi Azərbaycana qəbul etsin”
Fərid bəy Mərvi: “Azərbaycan dövləti bizə kömək etsin”
Soydaşımız Fərid bəy Mərvi də baş verən narahatlığı dilə gətirir və bildirir ki, “Taliban” Heratı ələ keçirdikdən sonra onlar mühasirədə qalıblar. Fərid bəy də Azərbaycana gəlmək isədiyini və onun kimi çoxlu insalar olduğunu dedi: “Çox təəssüf ki, “Taliban”çılar şəhərə girdilər və şəhərin mərkəzinə gəldilər, Herat şəhər rəhbərliyi onlara təslim oldu. Biz evdə mühasirədəyik. Bütün ölkələr, o cümlədən də İran bizdən viza istəyir. 2019-da Kabildə Azərbaycan səfirliyi yox idi, mən dostların dəvətilə Azərbaycana gəldim. İndi də onların dəvət etməsini istəyirəm. Məni Azərbaycanda tanıyırlar. Bizi dəvət edin Azərbaycana gələk və orada qaldıqdan sonra Türkiyəyə getmək istəyirik. Vəziyyət düzələndən sonra yenidən Əfqanıstana gələrik. Vəziyyətimiz pisdi, mühasirədəyik, Azərbaycan dövləti bizə kömək etsin”.
Mübariz Ağalarlı: “Əfqanıstanda ziyalı və məmur soydaşlarımız təhdid altındadır”
Əfqanıstandakı azərbaycanlı icmalarının nümayəndələrinin səsini “Bakı-Xəbər”ə çatdıran və bu səsin qəzetimiz vasitəsilə Azərbaycan ictimaiyyətinə, dövlətinə çatdırılmasını istəyən AMEA Tarix İnstitutunun aparıcı elmi işçisi, ADPU-nun dosenti Mübariz Ağalarlı bizimlə söhbətində bildirdi ki, Əfqanıstanda yaşayan ziyalı soydaşlarımızın vəziyyəti acınacaqlıdır. “Taliban” rejiminin Əfqanıstanda hakimiyyəti ələ keçirməsindən bir müddət keçsə də, mövcud rejimin siyasi sabitliyk yaradacağı ilə bağlı səsləndirdiyi bəyanatlara baxmayaraq, hələ də siyasi gərginlik davam etməkdə, hətta dərinləşməkdədir. Sosial şəbəkələr üzərindən və fərdi əlaqələr vasitəsilə əldə olunan məlumatlardan bəlli olur ki, rejim qüvvələri əhaliyə qarşı aqressiv davranışlarını davam etdirməkdədir. Xüsusilə də “Taliban” rejiminin Əfqanıstanın türkəsilli vətəndaşlarına qarşı münasibəti ürəkaçan deyil.
Əfqanıstanın türkəsilli, azərbaycan kökənli vətəndaşlarının məlumatlarından bu qənaətə gəlmək olur ki, hazırda rejim qüvvələri türk mənşəli əhaliyə basqılarını davam etdirməkdədir. “Taliban təhlükəsi ilə qarşı-qarşıya qalan ən həssas təbəqə isə ziyalı və keçmiş məmur təbəqəsidir. Ziyalı təbəqəsinə və savadlı kəsimə müsbət münasibət sərgiləməyən “Taliban2 rejimi bu təbəqənin nümayəndələrini hər vəchlə basqı altında saxlayır və təzyiqlərə məruz qoyur. Əfqanıstanın müxtəlif əyalətlərində yaşayan azərbaycan kökənli vətəndaşların məlumatlarından aydın olur ki, əksər soydaşlarımız, xüsusilə də azərbaycan kökənli ziyalılar, məmurlar, onların ailələri təhdid altında və təhlükə vəziyyətindədirlər. “Taliban” mənsubu qüvvələr bu təbəqə əhalini daha çox təhdid edir, həbs edərək müəyyən təzyiq vasitəsilə ifadələri alınır və təhqirlərə məruz qalırlar”.
Alim daha sonra qeyd etdi ki, Əfqanıstanda yaşayan soydaşlarımız, xüsusilə də ziyalı təbəqəsinin nümayəndələri ümidgahlarının Azərbaycan dövləti və azərbaycanlılar olduğunu qeyd edir: ”Soydaşlarımız Əfqanıstanda vəziyyət sabitləşənə qədər ziyalıların, məmurların və təzyiqlərə məruz qalan fəal nümayəndələrin Azərbaycana gələrək burada yerləşdirilməsini xahiş edirlər. Əfqanıstanda yaşayan soydaşlarımızın bu ağır günündə istər mənəvi baxımdan, istərsə də təhlükəsizliklərinin təmin olunması baxımından bütün vasitələrdən istifadə edərək həm Azərbaycan dövləti, həm də hər bir Azərbaycan vətəndaşı bacardığı köməyi göstərməlidir. Bu bir mənəvi borcdur...”
İradə SARIYEVA
