Prezident İlham Əliyevin “CNN Türk” televiziya kanalına müsahibəsi İtaliyanın “Kmetro0”, “Eurasianews” və “Agenzia Nova” kimi kütləvi informasiya vasitələri tərəfindən geniş şəkildə işıqlandırılıb.
“Prezident İlham Əliyev: Ermənistan Azərbaycanın ərazi bütövlüyünü tanımağa hazırdırsa, bölgəyə sülh gələcək” sərlövhəli yazılarda qeyd olunur ki, “CNN Türk”-ə müsahibəsində Prezident İlham Əliyev Azərbaycanın ərazi bütövlüyünün bərpası və Ermənistanın hərbi işğalına son qoyulması üçün görülmüş tədbirlərdən, İkinci Qarabağ müharibəsi və onun nəticələrindən, müharibədən sonra bölgədəki vəziyyətdən, bölgədə uzunmüddətli sülhün təmin edilməsi və buna nail olmaq üçün atılacaq addımlardan bəhs edib.
Yazılarda Prezident İlham Əliyevin müsahibədəki fikirlərinə geniş şəkildə istinadlar edilib.
Qeyd edək ki, bundan əvvəl Ukrayna və digər ölkələrin KİV-lərində də “CNN Türk”ün müsahibəsinə geniş yer verilmişdi.
İlham Əliyevin CNN Türk-ə müsahibəsinə dünya KİV-lərində geniş marağın kökləri nədən qaynaqlanır?
“Bu müsahibənin dünya KİV-lərini maraqlandırması çox təbiidir və Azərbaycan Prezidentinin hər müsahibəsi beynəlxalq aləmdə ciddi maraq doğurur, ətraflı müzakirə edilir”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Prezident İlham Əliyevin sözügedən KİV-ə müsahibəsində həm dünyaya, həm də Ermənistana böyük mesajlar olub: “Prezident İlham Əliyevin bu müsahibəsi bütün dünyaya bir daha göstərdi ki, Cənubi Qafqazda, regionda qüvvələr nisbəti Azərbaycanın xeyrinə dəyişib. Reallıqlar budur ki, Azərbaycan öz ərazi bütövlüyünü bərpa edib. Eyni zamanda, Prezident İlham Əliyevin dünya və region ölkələrinə mesajları var idi. Prezidentin mesajlarında əməkdaşdaşlıq Azərbaycanla olmalıdır, Azərbaycanın işi haqq işidir, mövqeyi ədalətlidir, təcavüzkar Ermənistanı dəstəkləməklə regionda sabitliyə, inkişafa nail olmaq olmaz... Bu sabitliyə və inkişafa nail olmaq üçün Ermənistanın öz məğlubiyyətini boynuna alması, bundan əlavə, Azərbaycanın ərazi bütövlüyünü tanıması, sülh sazişi bağlaması vacibdir, məlum layihələrin reallaşdırılması da pandemiya və iqtisadi böhran dövründə dünyaya bir töhfə olar. Hər bir ölkə kimi, Azərbaycan da ərazi bütövlüyünü beynəlxalq hüquq çərçivəsində bərpa etmək hüququna malikdir o da bu hüquqdan istifadə edib ərazi bütövlüyünü təmin edib. Bilirsiz ki, bir sıra dövlətlərdə də ərazi bütövlüyü, separatizmlə bağlı bir çox problemlər var, o problemlər hələ indiyə qədər öz həllini tapmayıb. Ərazi bütövlüyü məsələsində problem yaşayan Ukraynanın mətbuatının da Prezident İlham Əliyevin məzmunlu və bütün dünyaya ünvanlanan mesajlarına geniş yer ayırması heç təsadüfi deyildi. Çünki bu müsahibədə həm dünya, həm də region üçün vacib olan əsas məsələlər, hədəflər vurğulanırdı. Bu müsahibənin dünya KİV-lərini maraqlandırması çox təbiidir və Azərbaycan Prezidentinin hər müsahibəsi beynəlxalq aləmdə ciddi maraq doğurur, ətraflı müzakirə edilir.
Prezident İlham Əliyevin bu müsahibəsindən dost da, düşmən də öz payını götürdü.
Prezident bütün dünyaya bəyan etdi ki, bəzi dünya ölkələrinin təcavüzkar Ermənistanı müdafiə etməsi o ölkələrə müsbət heç nə vəd etmir, onlar bu ölkəni müdafiə etməkdə davam etsələr belə, bu əhəmiyyətsizdir”- deyə Ş.Ağayev qeyd etdi.
İradə SARIYEVA
