“Taliban”ın Əfqanıstandakı Qarabağ bölgəsini, rayonunu işğal etməsi faktına ən çox sevinən erməni sosial şəbəkə istifadəçiləri, ermənilərdir. Ümumiyyətlə, “Taliban”çıların Əfqanıstan hakimiyyətini qəsb etməsini ermənilər böyük sevinc hissi ilə qarşılayır.
30 il əvvəl işğal etdikləri Qarabağ torpağının müzəffər Azərbaycan ordusu tərəfindən işğaldan azad edilməsi və 44 günlük müharibədə qazandıqları ağır məğlubiyyət ermənilərin “Taliban”çıların “qələbə”sinə sevinməsinə gətirib çıxarıb. Rəsmi statistikaya görə, Əfqanıstanın Qarabağ bölgəsində taciklər və puştunlar yaşayır, qeyri-rəsmi statistikaya görə isə, orada Qarabağdan köçmüş Azərbaycan türkləri yasayır. Bir çox politoloqlar vurğulayır ki, ermənilər İkinci Qarabağ müharibəsində düçar olduqları məğlubiyyətin acısını “Taliban”ın qəsbkarlığı ilə ovudurlar.
“Vaxt gələcək, Azərbaycan dövləti də Əfqanıstandakı qarabağlıların, türklərin, soydaşlarımızın inkişafına töhfələr verəcək, onda ermənilər sevinməyəcək - növbəti dəfə kədərə boğulacaqlar”
Siyasi şərhçi Azər Həsrət bizimlə söhbətində bildirdi ki, ermənilərin bu davranışı gülməli görünür: “Ermənilərin “Taliban”ın Əfqanıstanı işğal etməsinə sevinməsi sadəcə olaraq bir uşaq sevincindən başqa bir şey deyil. Ermənilər Azərbaycana böyük hesabla uduzublar və təbiidir ki, bu uduzma onların psixologiyasında ağır izlər buraxıb. Ona görə də Azərbaycana bağlı, Azərbaycanla bu və digər mənada əlaqəsi olan istənilən məsələdə toy-bayram edirlər ki, Azərbaycan bu sahədə “zərər gördü”. Bu da ermənilərin özlərini müvəqqəti olaraq ovutması üçün bir bəhanədir. Əfqanıstanda da vəziyyət düzələcək, oradakı insanlarımız da azadlıqlarına qovuşacaqlar. Vaxt gələcək, Azərbaycan dövləti də Əfqanıstandakı qarabağlıların, türklərin, soydaşlarımızın inkişafına töhfələr verəcək, onda ermənilər sevinməyəcək - növbəti dəfə kədərə boğulacaqlar. Biz belə şeyləri görmüşük, təbiidir ki, narahat deyilik. Zamanla hər şey qaydasına düşəcək. Ermənilərin də vaxtsız sevincləri ürəklərində qalacaq. Necə ki, Dağlıq Qarabağ daxil olmaqla, bütövlükdə Azərbaycan torpaqlarını işğal altında tutub sevinirdilər, amma günün birində başlarına enən dəmir yumruq hesabına oralardan çıxıb getməli oldular, sevincləri də uzun sürmədi. Bu dəfə də belə olacaq”-deyə A.Həsrət bildirdi.
İradə SARIYEVA
