Bu günlərdə Kəlbəcər və Laçın rayonlarına səfəri çərçivəsində prezident İlham Əliyevin verdiyi açıqlamalarla bağlı Ermənistanda hələ də çoxsaylı müzakirələr davam edir. Xüsusən də sərdəd məsələsi ilə bağlı Azərbaycan Prezidentinin dedikləri ermənilərdə böyük həyəcan doğurub.
Dövlət başçısının sərhəddə möhkəmlənməklə bağlı açıqlamalarını ermənilər qorxu ilə qarşılayır. Xatırladaq ki, bu xüsusda İlham Əliyev qeyd edib: “Biz Kəlbəcər, Laçın istiqamətində dövlət sərhədimizi möhkəmləndiririk. Bu sərhəd 30 ilə yaxın müddət ərzində ermənilərin əlində idi və biz may ayında qarlar əriyəndən sonra bu sərhədlərə çıxmışıq, öz mövqelərimizi tutmuşuq, Zəngəzurda yerləşmişik və orada möhkəmlənirik. Bu bizim torpağımızdır. Ermənistan tərəfindən səslənən fikirlər tamamilə əsassızdır. Biz öz torpağımızdayıq, Qaragöl də bizimdir, başqa yerlər də bizimdir. Biz gəlmişik. 30 il bu ərazi ermənilərin əlində idi. Əgər o sərhəd onların dediyi yerdən keçirdisə, durardılar o sərhəddə. Durardılar, deyərdilər ki, sərhəd budur. Nə oldu bəs? Biz gələndən sonra, durandan sonra dedilər ki, yox, biz düz yerdə durmamışıq. Biz düz yerdə durmuşuq, harada lazımdır, orada durmuşuq və əgər istəsək, harada lazım bilsək, orada da duracağıq. Onu heç kim unutmasın. Ona görə indi Müdafiə Nazirliyinin və Sərhəd Qoşunlarının xətti ilə bütün sərhəd boyunca - Murovdağdan ta Araz çayına qədər bütün sərhəd infrastrukturu, hərbi hissələr yaradılır, biz bu sərhədlərdə möhkəmlənirik”. Bu fonda Ermənistanda hətta dövlət rəsmiləri belə etiraf edir ki, Azərbaycan üstün mövqedədir və ona qarşı çıxmaq çətindir. Ermənistan Silahlı Qüvvələrinin Baş Qərargahının Əməliyyat Baş İdarəsinin rəisi, Baş Qərargah rəisinin müavini, general-mayor Edvard Asryan bu xüsusda bildirir: “İstənilən dövlət üçün rəqib olan ölkəyə müxtəlif vasitələrlə təzyiq edilir. Rəqibin ordusuna da təzyiq göstərilməsi bu zaman adi haldır. Rəqib dövlətimiz olan Azərbaycan da eyni şeyi müxtəlif vasitələrlə bizə tətbiq etməyə çalışır”. Edvard Asryan təsdiq edib ki, mayın 12-dən etibarən Azərbaycanın yeni fəaliyyətləri başlayıb və qısa müddət ərzində Azərbaycan ordusu uğurlar qazanıb: “Azərbaycan Prezidentinin bəyanatları isə narahatlığımızı və sayıqlığımızı daha da artırır”. Erməni ictimai fəal Qurqen Avetisyan isə iddia edir ki, Azərbaycan Ermənistan sərhədlərinə hücum qoşunları toplayır: “İlham Əliyev, yəqin ki, Ermənistana maksimum təzyiq göstərməyə qərar verib. Bu məqsəd üçün o, Kəlbəcər rayonuna qoşunlar köçürür. Bu il ərzində erməni tərəfindən heç bir sərhəd müdafiə strukturu yaradılmayıb. Buna görə də İlham Əliyev Türkiyə-Azərbaycan quru sərhədinə sahib olmaq üçün hücum qoşunlarını ora daxil etmək və Kəlbəcər rayonunu Naxçıvan Muxtar Respublikasından ayıran 27 km torpağa nəzarət etmək qərarına gəlib. Ermənistan buna necə cavab verir? Hələlik heç bir şəkildə. Müxalifətin də səsi batıb”.
Belə vəiyyətdə İrəvanın törətdiyi sərhəd təxribatları Ermənistan daxilində narazılıq yaradıb. Hesab edilir ki, bu halda Azərbaycanın cavab tədbirləri Ermənistanın daha sarsıdıcı məğlubiyyətinə səbəb ola bilər. Erməni hərbi ekspert Vaan Hambardzumyan qeyd edib ki, belə halda müharibənin ikinci mərhələsi başlayacaq. Lakin İrəvan buna hazır deyil. “Əriklər Ölkəsi” partiyasının lideri Zaruhi Postancyan isə qeyd ki, İlham Əliyev İrəvana necə nəzarət edəcəyinə dəqiq şəkildə qərar verib. Onun sözlərinə görə, Azərbaycan Prezidentinin sərhədlə bağlı açıqlamaları da bundan xəbər verir. Erməni ictimai xadim Qriqor Qriqoryan Ermənistan hakimiyyətinə müraciət edərək qeyd edib: “O vəziyyətə çatdırmayın ki, döyüşmüş oğlanlar sizə qarşı silah götürsünlər. Sərhəd məsələsin həll edin. Yoxsa Azərbaycanın daha sərt hücumları qaçılmaz olacaq”.
Eks-prezident Robert Köçəryanın rəhbərlik etdiyi “Ermənistan” blokundan olan millət vəkili Tadevos Avetisyan da bədbin proqnozlar verənlər sırasında yer alır. Onun sözlərinə görə, sərhəddə yaşanan gərginlik, ağır sosial-iqtisadi vəziyyət erməni əhalisi üçün böyük çətinliklər yaradır: “Ermənistan hökuməti son üç ildə sabit iqtisadi artımın əsasını qoya bilməyib. Hakimiyyətin yaxın illərlə bağlı vəd etdiyi minimum 7 faiz iqtisadi artım üçün Ermənistanda heç bir şərait yoxdur”. Deputat, iqtisadi artım yerinə, ölkəni inflyasiyanın gözlədiyini vurğulayıb. Avetisyana görə, iqtisadi artım vəd edən səlahiyyətlilər son üç il yarımdakı fəaliyyətlərinin nəticələrinə yenidən baxmalıdır:
“Ölkəni dar qrup maraqlarından çıxış edən populistlər yox, milli maraqları müdafiə edən peşəkarlardan ibarət bir komanda idarə etməlidir. Hazırkı şəraitdə isə qarşıya qoyulan vəzifə baxımından müəyyən bir geriləmə qeyd edilə bilər. Çünki eyni hökumət keçmişdə ikirəqəmli iqtisadi artım da vəd edirdi. İnvestisiya axını iqtisadi artımın əsas amillərindən biridir. Amma son illərdə onların həcmi sürətlə azalır. Həmçinin ölkədən kapital “uçuşu” var. Buna inflyasiyanın davamlı artması da əlavə olunur. Qorxularım var ki, vəd edilmiş 7 faiz iqtisadi artım əvəzinə 7 faiz inflyasiya əldə edəcəyik. Son 7 ayda maaşlar orta hesabla 5,4 faiz artıb, ərzaq məhsulları isə orta hesabla 3 dəfə artıb. Bu göstəricilər nəinki azalan iqtisadiyyatı xarakterizə edir, həm də əhalinin daha da yoxsullaşmasına yol açır”. Müxalif deputat hökumətin işsizliyi azaltma planlarına da şübhə ilə yanaşır: “Bu mərhələdə hakim komanda xalqı boş vədlərlə “doydurur”, bir müddət sonra isə vədləri yerinə yetirə bilmədikdə günahkar axtarmağa başlayacaqlar”. Tadevos Avetisyan qeyd edir ki, belə ağır vəziyyətdə Azərbaycanla yaşanan sərhəd problemləri insanları daha ümidsiz vəziyyətə salır və bu səbəbdən ölkəni tərk edənlərin sayı yenidən artır:”Bu, indi sərhəd zonasında yaşayan əhali ilə bağlı özünü daha qabarıq büruzə verir”.
Nahid SALAYEV
