Ermənistanın baş naziri Nikol Paşinyan Azərbaycanla sərhədin necə qorunmalı olduğuna dair özünün sayca üçüncü və əvvəlkilərdən tam fərqlənən planını irəli sürüb.
Belə ki, Paşinyan hökumətin iclasındakı çıxışı zamanı Ermənistanın Azərbaycanla sərhədin “bəzi hissələrinin” mühafizəsini ölkənin Milli Təhlükəsizlik Xidmətinin sərhəd qoşunlarına həvalə etməyə hazırlaşdıqlarını bildirib. Baş nazir bu planı hökumətin 2021-2026-cı illər üçün proqramını təqdim edərkən açıqlayıb: “Bizim proqram və plan bundan ibarətdir ki, Ermənistan Milli Təhlükəsizlik Xidmətinin sərhəd qoşunları tezliklə sərhədin daha çox hissəsini nəzarətinə götürəcək - həmin hissələrə nəzarətin Silahlı Qüvvələr tərəfindən onlara təhvil verilməsindən sonra. Bu planda sərhəd qoşunlarının sayı artırılmalıdır və islahatlar keçirilməlidir”.
Baş nazirin fikrincə, bu plan Ermənistanın “dinc regional gündəmə” can atdığını göstərir. Bu o deməkdir ki, Ermənistan mühafizə etdiyi yerlərə sülh zonası kimi baxır. Onun fikrincə, sərhədçilər hərbi yox, dinc zona hesab edilən sahələrdə məsuliyyəti üzərlərinə götürürlər.
Maraqlıdır, Ermənistan Azərbaycan sərhədinə sərhədçiləri yerləşdirəcək, yoxsa yerləşdirməyəcək? Bir sözlə, Paşinyan Ermənistanın Azərbaycanla, Türkiyə ilə olan sərhədlərinə sülh sərhədi kimi baxa biləcəkmi?
“Bu, xarici oyunçuların sözügedən məsələdə necə mövqe tutacağından asılı olan məsələdi”
Məsələyə münasibət bildirən Yeni Yol Partiyasının sədri Ramil Hüseynovun fikrincə, bunu indidən proqnozlaşdırmaq çox çətindir: “Ona görə ki, Paşinyanın bunda nə dərəcədə səmimi və qərarlı olacağını demək çətindir. Bu bir tərəfdən Paşinyanın siyasi iradəsindən, digər tərəfdən Ermənistandakı xarici oyunçulardan, xüsusən də Rusiyadan çox asılıdır. Bu, xarici oyunçuların sözügedən məsələdə necə mövqe tutacağından, onların maraqlarının Ermənistanda uzlaşacağından, yoxsa toqquşacağından asılı olan məsələdir. Fikrimcə, Ermənistan Azərbaycanın sərhədlərini tanısa, bu reallaşa bilər. Yox əgər tanımasa, o zaman bu, o qədər də real görünmür. Başqa bir tərəfdən, Paşinyanın nə edəcəyi çox vaxt bəlli olmur. Bundan əvvəl Paşinyan Azərbaycanla sərhədə ATƏT-in Minsk Qrupunun həmsədri olan ölkələrdən, o cümlədən Fransa və ABŞ-dan sülhməramlı qüvvələrin yerləşdirilməsinə çağırmışdı. Daha sonra o, fərqli mövqe tutdu. Bildirdi ki, Azərbaycanla bütün sərhəd boyu Rusiya sərhəd qoşunlarının dayaq məntəqələri yaradılacaq. Paşinyanın bu planını açıqlamasından sonra Əskipara kəndi istiqamətində Rusiya sərhəd qoşunlarının bölməsi yerləşdirildi. İndi isə Paşinyan erməni sərhədçilərinin yerləşdiriləcəyini deyir. Bu baxımdan hansısa proqnoz vermək çətindir. Baxaq görək proseslər hansı istiqamətdə gedəcək”.
Bütün bunlarla yanaşı, partiya sədri hesab edir ki, Ermənistanla sərhədlər möhkəmləndirilməlidir.
Vidadi ORDAHALLI
