Ermənistan hökumətinin iclasında Baş nazir Nikol Paşinyan bəyan edib ki, Bakı ilə danışıqlara hazırdır. O şərtlə ki, danışıqlar ATƏT-in Minsk Qrupunun himayəsi altında keçirilsin.
Paşinyan iclasda Azərbaycanla yüksək səviyyədə danışıqlara başlamağa hazır olması barədə bəyanatını təkrarlayıb və regional sabitlik baxımından Qarabağın yekun statusunun müəyyən edilməsinə yönələn danışıqların ATƏT-in Minsk Qrupu çərçivəsində davam etdirilməsinin vacibliyini qeyd edib: “ATƏT-in Minsk Qrupu Dağlıq Qarabağ məsələsilə bağlı danışıqlar prosesinin tam bərpa edilməsinin zəruriliyini dəfələrlə bəyan edib. Biz bu bəyanatları və mövqeyi alqışlayırıq və danışıqlarda yüksək və ali səviyyədə iştirak etməyə hazırıq. Ermənistanın təhlükəsizliyinin, suverenliyinin və ərazi bütövlüyünün təmin edilməsi, Dağlıq Qarabağ probleminin ədalətli həlli, Ermənistan ətrafında əlverişli mühitin yaradılması prioritet məsələ olaraq qalır”.
Paşinyan, həmçinin, Ermənistanda silahlı qüvvələrdə irimiqyaslı islahatlar prosesinin başladığını qeyd edib. O, ordunu ölkənin xarici təhlükəsizliyinin təminatında əsas amil adlandırıb. Fəal xarici siyasəti isə təhlükəsizliyin daha bir zəruri şərti hesab edir: “Ermənistan bütün ölkələrlə və beynəlxalq təşkilatlarla işləyərək fəal və təşəbbüskar xarici siyasət yürütməlidir”.
Görünən odur ki, Paşinyan yenə hər vasitə ilə Minsk Qrupunu prosesə cəlb etmək istəyir. Halbuki, ATƏT-in Minsk Qrupu 30 illik fəaliyyəti dövründə özünü doğrultmadı. Nəzərə alsaq ki, 10 noyabr, 11 yanvar razılaşmaları MQ-nin iştirakı olmadan əldə olunub, o zaman Ermənistan-Azərbaycan danışıqlarının bu qurumun himayəsi ilə keçirilməsinə nə ehtiyac var?
“Paşinyan bu açıqlaması ilə bir daha ikili oyun oynadığını ortaya qoydu”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucov hesab edir ki, Paşinyan bu açıqlaması ilə bir daha ikili oyun oynadığını ortaya qoydu: “Əvvəla, yaxşı olardı ki, Ermənistan heç bir vasitəçi olmadan Azərbaycanla danışıqlara otursun. Danışıqlar belə bir müstəvidə keçirilsə daha çox nəticə əldə olunar, nəinki vasitəçilərin iştirakı ilə. Niyə? Ona görə ki, vasitəçilər danışıqları təşkil edərkən məsələyə öz maraqlarından yanaşırlar. Çalışırlar ki, onların cızdığı çərçivədə və şərtlər daxilində danışıqlar getsin. Təəssüflər olsun ki, Ermənistan marionet dövlət olduğuna görə vasitəçi olmadan danışıq aparmağa cəsarət etmir. Paşinyanın Minsk Qrupunun iştirakı şərti ilə Azərbaycanla danışıqlara hazıır olmasını bəyan etməsi təsadüfi deyil. Ona bu təlimatı Qərbdəki dairələr verib. Məsələ ondadır ki, 10 noyabr razılaşmasından sonra ABŞ və Fransa Rusiyanın onları prosesdən kənarlaşdırdığını düşünür. Ona görə də hər vasitə ilə MQ-ni diriltmək istəyirlər. Paşinyan da Rusiyadan asılılığı azaltmaqdan və Qarabağla bağlı xam xəyallarını reallaşdırmaqdan ötrü MQ-yə önəm verir. Çünki yaxşı bilir ki, həmsədr ölkə olan Fransa bütün imkanlarını Ermənistan üçün səfərbər edəcək. Ona görə də bu cür qəbulolunmaz şərtlərlə çıxış edir. İstənilən halda, Ermənistanla MQ-nin himayədarlığı ilə danışıqlar aparmaq qəbuledilməzdir. Çünki MQ-nin prosesə qayıdışı bizim ziyanımıza işləyəcək. Ən azı ona görə ki, ATƏT-in Minsk Qrupunun 30 ilə yaxın fəaliyyəti özünü doğrultmadı”.
Bir sözlə, partiya funksioneri hesab edir ki, Azərbaycan danışıqlarda qətiyyətli mövqe tutmaqda davam etməlidir.
Vidadi ORDAHALLI
