Türk düşməni, Rusiya Liberal Demokrat Partiyasının rəhbəri Vladimir Jrinovski yenə də cəfəng fikirlərlə həm özünü yorur, həm də insanları bezdirir. Deyirlər ki, dəyirman öz işindədir, çax-çax baş ağrıdır.
Jirinovski elə iddialarda bulunur ki, adam məəttəl qalır. Türk xalqına qarşı indiyə qədər atdığı çirkablardan, böhtanlardan doymayan kloun Jirinovski indi də elə cəfəngiyyat səsləndirib ki, bişmiş toyuğun gülməyi gəlir. O iddia edib ki, guya ruslar həmişə türklərə qalib gəlirmiş (?), sonradan türklər güclənib. “Başa düşdülər ki, bizim ordunun gücü nədir. Bizim ordunun gücü milli iradədədir. Ona görə də bizim uşaqları götürüb 20 il bəslədilər, onlara hərbi təlimlər keçdilər, xüsusi ordu yaradıb adını da Yeniçəri qoydular”. Bu, Jirinovskinin növbəti sərsəmləməsindən sitatdır. Onun cəfəngiyatından belə çıxır ki, guya Osmanlının (Türkiyə) məşhur Yeniçəri ordusu “rus uşaqlarından” ibarət imiş. Bunun tamamilə absurd olduğu məlumdur, heç vaxt Yeniçəri ordusu “rus uşaqlarından” ibarət olmayıb. Tarixçilərin verdiyi bilgiyə görə, Yeniçəri Ordusunda ermənilərdən başqa əksər millətlərin nümayəndələri təmsil olunub və orada ümumiyyətlə milliyyət söhbəti olmayıb. Bu orduda əsasən etnik albanlar, bosniyalılar, bolqarlar, yunanlar, gürcülər, serblər olub. Osmanlı İmperiyasının genişlənməsi ilə birliklərini yenidən təşkil etmək, əsas zərbə qüvvəsi olaraq nizamlı piyada birlikləri yaratmaq lazım gəlirdi, bu səbəbdən də Yeniçəri Piyada Qoşunu 1365-ci ildə Türk sultanı I Murad tərəfindən yaradılıb.
“...Bu cür çərənləmələri və sərsəmləmələri ilə təmsil etdiyi dövləti tamamilə rüsvay edir”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli bizimlə söhbətində bildirdi ki, türklərin dünyanın ən cəngavər, ən döyüşkən ordular quran xalqlarından biri olduğu bütün dünyaya məlumdur. Hunlar, Oğuzlar, Səlcuqlar, Osmanlılar, Səfəvilər, Ağqoyunlular, Qaraqoyunlular, Qəznəvilər, Əfşarlar, Qacarlar və bütövükdə türk dövlətlərinin timsalında açıq görürük ki, türklər at belində böyüyüblər, cəngavər və döyüşkən ruha sahibdirlər. “Bütün dünya türk xalqının döyüşkənliyini, cənagəvərliyini, əlində qılınc, ox olduğunu, cənglər etdiyini çox yaxşı bilir və qoca tarix türkün ruhunu, əzmini hər zaman dünyaya xatırladır. Biz Türkiyənin, Azərbaycanın, eləcə də başqa türk xalqlarının əsgərlərinin timsalında bunu görürük. 44 günlük müharibədə də Azərbaycan türklərinin döyüşkənlik ruhu, cəngavərliyi bir daha özünün tarixi təsdiqini tapdı”.
Jirinovskinin fikirlərini mənasız və əsassız sayan F.Ələkbərlinin sözlərinə görə, Osmanlının Yeniçəri ordusu ilə bağlı onun dedikləri uydurmadır. “Osmanlı ordusunda da, başqa türk dövlətlərinin ordusunda da qeyri-türklər vardı, amma türklər döyüşməyi onlardan yox, onlar döyüşməyi türklərdən öyrəniblər. Bilirsiz ki, Yeniçəri ordusu üçün yetişdirilən döyüşçülər kimsəsiz uşaqlardan ibarət idi və onlar xüsusi olaraq yetişdirilirdilər, onlara döyüşməyi türklər öyrədirdi. Məsələn, biz əgər konkret olaraq slavyan xalqlarını götürsək, görərik ki, slavyanlar ox atmağı, qılınc oynatmağı, döyüşməyi, döyüş taktikalarını türklərdən öyrəniblər. Slavyanların özünün döyüşməyi türklərdən öyrınməsi bir tarixi gerçəklikdi, bunu cəfəngiyyatlar ustası Jirinovski də yaxşı bilir, sadəcə, həqiqəti inkar edib miflər yaratmaqla, xəyallar qurmaqla məşğul olur.
Xəzərlər dövləti dövründə Kiyevdə slavyanların bir dövləti yarandı. Əslində Kiyev dövləti sırf slavyan dövləti də deyildi, bunun yarısı xristian qıpçaq türklərindən, yarısı isə slavyanlardan ibarət idi. Bu dövlətin isə X-XI əsrlərdə daha fəal şəkildə ortaya çıxdığını görürük.
Osmanlı dövlətinin əsas qurucusu kaylar idi, amma burada kınıklar da, əfşarlar da vardı. Osmanlıda əsasən kaylar və digər türk-oğuz boyları idi. Düzdür, xristian qıpçaqlar da vardı. Əslində Yeniçəri deyilənlərin tərkibi əsasən xristianlığı qəbul etmiş türklərdən ibarət idi, aralarında slavyanların - serblərin, xorvatların olması da istisna edilmir, onlar da vardı, amma çoxluq deyildilər. Bolqarlar, macarlar, qaqauzlar xristanlığı qəbul etmişdilər, Osmanlı Yeniçərləri arasında bu cür xristian türkəri də az deyildi”.
F.Ələkbərli deyir ki, çar Rusiyasının ortaya çıxmasında və böyük imperiyaya çevrilməsində Osmanlı ordusunda xidmət edən xristian türk yenicərilərin xüsusi rolu olub. “Əgər xristian türklər olmasaydı, çar Rusiyası böyük bir imperiyaya çevirilə bilməzdi. Suvorov, Kutuzov kimi türk mənşəli xristian sərkərdələrin, eləcə də müsəlman sərkərdələrin çar ordusunun böyüməsində böyük xidmətləri olub. Müasir Rusiya ordusunda da əsas rolu türklər oynayır. Bu baxımdan, Jirinovski tarixi azdan-çoxdan oxusaydı, dürüst öyrənə bilsəydi bilərdi ki, türk olmadan Rusiyanın, slavyanların tarixi yoxdur. Jrinovski bu cür çərənləmələri və sərsəmləmələri ilə təmsil etdiyi dövləti tamamilə rüsvay edir. Dünya qəbul edir ki, dünyada dəyikliklərin olması, döyüşkənlik ruhunun mövcudluğu əsasən türklərin adı ilə bağlıdır.
Görürük ki, müasir dövrdə də yeni döyüş taktikaları məsələsində, yeni nəsil silahların istehsalı və istifadəsində türk dövlətləri öndədir”-deyə F.Ələkbərli qeyd etdi.
İradə SARIYEVA
