İkinci Qarabağ müharibəsindən sonra Ermənistan ordusunda hökm sürən xaos, nizamnamədənkənar münasibətlər, özbaşınalıq, ruh düşkünlüyü daha da dərinləşməkdədir. Elə bu səbəbdəndir ki, son bir neçə gün ərzində hərbi qulluqçular arasında özünəqəsd faktları artır.
Bununla bağlı yayılan məlumatlarda hərbi hissələrin birində postda xidmət edən hərbi qulluqçu Karen Ağacanyanın ona təhkim olunmuş silahdan atəş açaraq özünə qəsd etdiyi bildirilir. Belə bir vaxtda Ermənistanın cənub-şərqində, Zəngəzurda yerləşən hərbi hissələrdən birinin döyüş postunda güllə yarası almış üç erməni hərbçinin meyiti tapılıb. Ermənistan Müdafiə Nazirliyinin mətbuat xidməti bildirir ki, 19 avqust 02:15 radələrində meyitləri tapılan hərbçilər Murad Muradyan (2002), Levon Arutyunyan (2002) və Qor Saakyan (2002) olub. Ermənistan mətbuatında yayılan məlumatlara əsasən isə, Zəngəzur bölgəsindəki hərbi hissədə meyitləri tapılan hərbçilər bir-birini güllələyib. Onlardan Murad Muradyan adlı hərbi qulluqçunun digər iki hərbçini güllələdiyi qeyd olunur. Murad Muradyanın hansı şəraitdə ölməsi barədə isə məlumat verilmir. Digər məlumata görə, Ermənistan Silahlı Qüvvələrinin başqa ərazidə olan bir hərbi qulluqçusu da odlu silah yarası alıb. Məlumata əsasən, erməni hərbi qulluqçu daxili intriqa nəticəsində yaralanıb. Qeyd olunur ki, onun həyatına təhlükə yoxdur. Ermənistan İstintaq Komitəsinin informasiya və ictimaiyyətlə əlaqələr şöbəsindən bildiriblər ki, müddətli hərbi qulluqçunun yaralanması hadisəsi ilə bağlı cinayət işi açılıb. Onun adı hələlik açıqlanmır.
Başqa bir məlumatda isə qeyd olunur ki, Ermənistan ordusunun hərbi qulluqçusu, baş gizir Vahan Tatosyan orduda hökm sürən “dedovşina” nəticəsində ölüb. Tatosyan aprel döyüşlərinin və 44 günlük müharibənin iştirakçısı olub. O, artıq 10 il idi ki, Ermənistanın Ararat vilayətində yerləşən hərbi hissələrindən birində müqaviləli hərbi qulluqçu kimi işləyirdi. Ermənistanın Armavir vilayətinin Carart icmasının rəhbəri Samvel Qalstyan bildirib ki, erməni baş gizir işinə görə Ermənistanın Ararat vilayətinin kəndlərindən birində yaşayırdı: “Lakin əslən Carartdan idi. Vahan Tatosyan evli idi, oğlu və qızı var. Qızı azyaşlıdır, oğlu isə bu yaxınlarda müddətli hərbi xidmətdən qayıdıb. Onun oğlu da 44 günlük müharibədə iştirak edib”. Son vaxtlar Ermənistan ordusunda adi hal alan faktlardan biri də rüşvətxorluqdur. Bu günlərdə hərbi hissələrin birində ortaya çıxan rüşvətxorluq faktı böyük narazılığa səbəb olub. Yayılan məlumatlarda Ararat vilayətinin Armaş qəsəbəsində yerləşən hərbi hissədə qulluq edən hərbçilər Edqar Zavtilyan, Artur Volodyan, Qriqori Qriqoryandan ordu sıralarından tərxis olunmaları üçün böyük miqdarda rüşvət tələb edildiyi bildirilib. Hərbi qulluqçular hələlik hüquq-mühafizə orqanlarına müraciət etməsələr də, yaxın vaxtlarda ehtiyata buraxılmasalar, rüşvət tələb edən şəxs barədə hərbi prokurorluğa ərizə yazacaqları haqda komandanlığı xəbərdar ediblər. “Joğovurd” nəşri yazır ki, rüşvətlə bağlı daha bir qalmaqal “Çiçəklənən Ermənistan” partiyasının lideri Qaqik Tsarukyanın oğlu ilə bağlı özünü göstərib. Qəzet yazır ki, bu yaxınlarda Qaqik Tsarukyanın oğlu Nver Tsarukyanın Ermənistan ordusundan azad olması ilə bağlı möhlət müddəti bitib: “Tsarukyan əvvəlcə ona nail olub ki, rus tərəfinin razılığı ilə Nver Tsarukyan rus hərbi hissəsində xidmət etsin, asanlıqla evə getsin və sərbəst rejimi olsun. Lakin hansısa bir mərhələdə razılaşma pozulur, çünki Ermənistan Müdafiə Nazirliyinin hərbi komissarlığında işçilərdən biri iddia edir ki, Nver Tsarukyan hamı kimi qutudan xidmət etməli olduğu hərbi hissənin nömrəsini çəkməlidir. Və beləliklə, Tsarukyanlar Nver Tsarukyanın Ermənistan Müdafiə Nazirliyinin hər hansı digər hərbi hissəsinə düşməsinin mümkün olduğunu anladıqda saxladıqları versiyanı işə salırlar. “Joğovurd” nəşrinin mənbələri bildirir ki, Tsarukyan nömrə çəkmədə iştirak etməkdən imtina edir və Ermənistan Müdafiə Nazirliyinin şəxsi heyətinə tibbi sənəd göstərir. Bu sənədə əsasən, o, xidmət edə bilməz, xidmətə yararlı deyil. Beləliklə, müayinə üçün Nver Tsarukyanı xəstəxanaya, iş adamı Samvel Aleksanyana məxsus “Astğik” tibb mərkəzinə aparırlar. Burada naməlum metodlarla və ya bu olmadan Tsarukyanlar Nver Tsarukyanı Ermənistan ordusunda xidmət etməkdən 3 il müddətinə azad edən tibbi sənəd almağı bacarırlar. Təbii ki, burada rüşvət və pul öz sözünü deyib”. Bir məqamı da qeyd edək ki, 44 günlük müharibədən sonra Ermənistan ordusundan təcili surətdə tərxis edilərək ölkədən çıxıb getmək istəyənlərin sayı gündən-günə artır. Bu isə Azərbaycan ordusunun parlaq qələbəsi nəticəsində Ermənistan silahlı qüvvələrində yaranan xaosun nəticəsi sayıla bilər.
Samirə SƏFƏROVA
