Azərbaycan-Ermənistan sərhədində biz söz sahibiyik. Bu təbiidir və bundan sonra da söz sahibi olacağıq. Ona görə, bu məsələ ilə bağlı bəzən hansısa xarici dairələrdə də qeyri-adekvat fikirlər səsləndirilir. Buna ehtiyac yoxdur. Biz harada lazım bilmişiksə, orada da durmuşuq və əgər bu kimisə narahat edirsə, əgər kimsə əsəbləşirsə, necə deyərlər, getsinlər, su içsinlər.
Bu fikri Azərbaycan Prezidenti İlham Əliyev avqustun 16-da Kəlbəcər şəhərində dövlət bayrağının ucaldılması mərasimində çıxış edərkən deyib. Dövlət başçısı bildirib:
“Biz, eyni zamanda, Kəlbəcər, Laçın istiqamətində dövlət sərhədimizi möhkəmləndiririk. Bu sərhəd 30 ilə yaxın müddət ərzində ermənilərin əlində idi və biz may ayında qarlar əriyəndən sonra bu sərhədlərə çıxmışıq, öz mövqelərimizi tutmuşuq, Zəngəzurda yerləşmişik və orada möhkəmlənirik. Bu bizim torpağımızdır. Ermənistan tərəfindən səslənən fikirlər tamamilə əsassızdır. Biz öz torpağımızdayıq, Qaragöl də bizimdir, başqa yerlər də bizimdir. Biz gəlmişik. 30 il bu ərazi ermənilərin əlində idi. Əgər o sərhəd onların dediyi yerdən keçirdisə, durardılar o sərhəddə. Durardılar, deyərdilər ki, sərhəd budur. Nə oldu bəs? Biz gələndən sonra, durandan sonra dedilər ki, yox, biz düz yerdə durmamışıq. Biz düz yerdə durmuşuq, harada lazımdır, orada durmuşuq və əgər istəsək, harada lazım bilsək, orada da duracağıq. Onu heç kim unutmasın. Ona görə indi Müdafiə Nazirliyinin və Sərhəd Qoşunlarının xətti ilə bütün sərhəd boyunca - Murovdağdan ta Araz çayına qədər bütün sərhəd infrastrukturu, hərbi hissələr yaradılır, biz bu sərhədlərdə möhkəmlənirik.
Daxili əhəmiyyət daşıyan 700 kilometr uzunluğunda yolların çəkilişi prosesi gedir. Mən hələ əsas şəhərlərarası yolları kənara qoyuram, o layihələr haqqında kifayət qədər məlumat verildi. Bizim sərhədlərə gedən 700 kilometr yolların çəkilişi prosesi gedir və artıq qış gələnə qədər bu işin təqribən 80 faizi görüləcək. Yəni torpaq, çınqıl örtüklə döşənmiş yollar və bu bizə imkan verəcək ki, həm hərəkət üçün, həm hərbi nöqteyi-nəzərdən bu bölgələrdə daha da möhkəmlənək”.
Bununla Prezident bir daha təsdiqləmiş oldu ki, sərhədlərin dəqiqləşdirilməsi prosesində Ermənistan Azərbaycandan bir qarış da olsun torpaq qopara bilməyəcək. Azərbaycan Prezidentinin bu qətiyyətinin arxasında hansı amillər dayanır?
Politoloq Elşən Mustafayev “Bakı-Xəbər”ə bildirdi ki, Prezidentin sərhədlə bağlı mövqeyi çox qətidir: “Belə də olmalıdır. Çünki Ermənistanın istəyi budur ki, bu prosesdə cığallıq edib, əlavə torpaq ələ keçirsin. Artıq bir neçə müddətdir ki, Azərbaycan-Ermənistan sərhədində baş verən gərginlikdən xəbərdarıq. Ermənistan Azərbaycanın ölkənin suveren ərazisini pozduğunu, Azərbaycan isə beynəlxalq səviyyədə tanınmış sərhədlərini bərpa etdiyini deyir. Rusiya isə Azərbaycanla Ermənistana sərhədlərin demarkasiyasında öz yardımını təklif edir. Prezident İlham Əliyev ABŞ Prezidentinin Milli Təhlükəsizlik məsələləri üzrə müşaviri Ceyk Sallivanla telefon danışıqları zamanı Azərbaycan və Ermənistan arasında beynəlxalq sərhədin delimitasiyası üzrə danışıqların başlanmasına ehtiyac duyulduğu fikri ilə razı olduğunu ifadə edib və bu prosesin 10 noyabr 2020-ci il üçtərəfli bəyanatına uyğun olaraq həyata keçirilməsinin əhəmiyyətini bildirmişdi. Ermənistan Baş naziri Nikol Paşinyan isə bu məsələdə də şərtlə danışmaq istəyir. Ermənistan siyasi rəhbərliyi dezinformasiya yaymaqla məşğuldur və beynəlxalq ictimaiyyətinə yalan məlumatı çatdırır. Güya Azərbaycan Silahlı Qüvvələri Ermənistan ərazisinə müdaxilə edib. Reallıq isə ondan ibarətdir ki, Ermənistanla Azərbaycan arasında sərhədlərin müəyyən edilməsi ilə bağlı məsələdə Azərbaycanın beynəlxalq hüquqa söykənən mövqeyi var. 1975-ci ildə Sovet Silahlı Qüvvələrinin Baş Qərargahının irimiqyaslı xəritədə aydın şəkildə Qaragöl və onun ətrafındakı ərazilərin Azərbaycan sərhədləri daxilində olduğu göstərilib. 1975-ci ilin etibarlı və irimiqyaslı xəritəsində sərhədlər necə təqdim edilibsə eyni ildə qəbul olunmuş Helsinki Aktında da onların toxunulmazlığı öz əksini tapıb. Azərbaycanın işi haqq işidir və Rusiyanın bu məsələdə mövqeyi`onunla bağlıdır ki, Azərbaycan-Ermənistan komissiyası yaradılsın və həmin komissiya delimitasiya və demarkasiya məsələlərini həll etsin.
10 noyabr bəyanatında iki dövlət arasında nəqliyyat əlaqələrinin, kommunikasiyaların bərpasından söhbət gedir. Konkret bu məsələdə Azərbaycanın mövqeyi dəyişməzdir və ondan ibarətdir ki, delimitasiya və demarkasiya məsələləri ilə bağlı Azərbaycan Ermənistanla siyasi dialoqa hazırdır. Qazaxın yeddi, Naxçıvanın bir kəndi geri qaytarılmalıdır. Zəngəzur üzərindən dəhliz açılmalıdır”.
Məhəmmədəli QƏRİBLİ
