“Zəngilan, Laçın, Füzuli hava limanlarının inşa edilməsi və istismara verilməsi bölgənin canlanmasına gətirib çıxaracaq”. Bunu Prezident İlham Əliyev Laçın Beynəlxalq Hava Limanının təməlini qoyarkan deyib.
Bununla belə, ölkə başçısı sözügedən hava limanlarının həm də hərbi əhəmiyyət kəsb edəcəyini qeyd edib: “Hesab edirəm ki, bu bir çoxları üçün gözlənilməz oldu. Bəziləri bunu möcüzə hesab edirdilər. Çünki sovet dövründə heç vaxt bu bölgədə - Kəlbəcər-Laçın zonasında hava limanı olmayıb. Məhz bu səbəbə görə. Çünki çox bahalı bir layihə ola bilərdi və məqbul yer də tapmaq mümkün deyildi. Ancaq biz müstəqil Azərbaycan dövlətiyik, buna texniki imkanlarımız da, maliyyə imkanlarımız da və güclü iradəmiz də var.
Zəngilan, Laçın, Füzuli hava limanlarının inşa edilməsi və istismara verilməsi bölgənin canlanmasına gətirib çıxaracaq. Bu hava limanlarının həm yüklər, həm sərnişinlər, eyni zamanda hərbi təyinatı da, təbii ki, göz önündədir. Biz daim hazır olmalıyıq, daim öz hərbi gücümüzü artırmalıyıq, hərbi infrastruktur yaratmalıyıq və yaradırıq, o cümlədən hava limanları bizim hərbi məqsədlərimizə də xidmət edəcək”.
Görünən odur ki, sözügedən hava limanları həm də hərbi məqsədlərə xidmət edəcək. O üzdən, hərbi nöqteyi-nəzərdən həmin hava limanlarının əhəmiyyətini ekspertlər necə dəyərləndirir?
“Ermənistan hansısa genişmiqyaslı təxribata cəhd edərsə, çevik formada bunu önləmək və havadan müdaxilə etmək mümkün olacaq”
Məsələyə münasibət bildirən politoloq Elşən Manafovun fikrincə, sözügedən hava limanları strateji əhəmiyyətli nöqtələrdə yerləşdiyi üçün onların hərbi baxımdan əhəmiyyəti böyük olacaq: “Çünki həmin hava limanlarının üçü də strateji nöqtələrdə yerləşir. Bu o deməkdir ki, Ermənistan hansısa genişmiqyaslı təxribata cəhd edərsə, çevik formada bunu önləmək və havadan müdaxilə etmək mümkün olacaq. Bununla belə, həmin hava limanlarından 2-si Ermənistana yaxın məsafədə yerləşir. Həmin limanlardan hərbi məqsədlər üçün istifadə olunması planı Ermənistan hakimiyyətinin yeritdiyi siyasətin məntiqi nəticəsidir. Məsələ ondadır ki, baxmayaraq Ermənistan müharibədə ağır məğlubiyyətə uğrayıb, amma hələ də revanşist məqsədlərini gizlətmir. Seçkilərdən sonra Ermənistan-Azərbaycan sərhədində atəşkəsin pozulması gündəlik hal alıb. Halbuki, seçkilərə qədər belə hallar yaşanmırdı. Deməli, Paşinyan mövqelərini möhkəmləndirdikcə, hərbi ritorikaya maraq artır. Üstəlik, Ermənistanın yeni müdafiə nazirinin Moskvada Şoyqu ilə keçirdiyi görüşlər, verdiyi sərsəm bəyanatlar bizim hər şeyə hazır olmağımızı tələb edir. O üzdən, biz bütün mümkün vasitələrlə Qarabağın hava sahəsinə nəzarəti artırmalıyıq. O baxımdan tikilən hər üç hava limanı hərbi məqsədlərə də öz töhvəsini verəcək. Prezidentin hava limanları ilə bağlı dedikləri həm də o deməkdir ki, dəmir yumruq yerindədir. Onlar növbəti təxribata əl atsalar nəticəsi ağır olacaq”.
Politoloq hesab edir ki, Ermənistanla sərhədin mühafizəsini ən yüksək səviyyəyə qaldırmaq lazımdır.
Vidadi ORDAHALLI
