“Biz Kəlbəcərin şimal hissəsində strateji yüksəklikləri götürərək erməni silahlı qüvvələrinin hərəkətlərini bu istiqamətdə böyük dərəcədə məhdudlaşdıra bildik”. Bu fikirləri Azərbaycan Prezidenti İlham Əliyev Kəlbəcərə səfəri zamanı çıxışında söyləyib.
Ölkə başçısının sözlərinə görə, İkinci Qarabağ müharibəsinin ilk günlərində döyüşlər gedən zaman Kəlbəcərin şimal hissəsi Azərbaycan Silahlı Qüvvələri tərəfindən işğalçılardan azad edildi: “Murov dağının ərazisində və ətraf yerlərdə şiddətli döyüşlər gedirdi, şəhidlər vermişdik. Ancaq strateji yüksəklikləri götürdük və bu yüksəkliklər bizə imkan verirdi ki, ermənilərin istifadə etdikləri nəqliyyat-kommunikasiya infrastrukturuna da nəzarət edək. Beləliklə, biz Kəlbəcərin şimal hissəsində strateji yüksəklikləri götürərək erməni silahlı qüvvələrinin hərəkətlərini bu istiqamətdə böyük dərəcədə məhdudlaşdıra bildik və faktiki olaraq, onlar Basarkeçər-Kəlbəcər yolundan istifadə edə bilmədilər. Bu, hərbi əməliyyatın, əks-hücum əməliyyatının tərkib hissəsi idi. Biz əks-hücum əməliyyatını bir neçə istiqamətdə aparırdıq və hər istiqamət önəmli idi. Çünki biz artıq bəzi istiqamətlər üzrə müdafiə xəttini yararaq işğalda olan torpaqları azad edirdik, bəzi istiqamətlərdə strateji nöqtələri götürərək Ermənistan ordusunun hərəkətlərini, demək olar ki, iflic vəziyyətə salmışdıq. Bəzi istiqamətlər üzrə, sadəcə olaraq, hərbi manevrlər apararaq erməni silahlı birləşmələrinin başqa yerə göndərilməsinin qabağını alırdıq”.
Görünən odur ki, Azərbaycan Ordusu Kəlbəcər istiqamətində strateji yüksəklikləri götürməklə, əsas təchizat yollarından birini bağlayıb. Eyni zamanda, müharibə boyu həmin istiqamətdə düşmən təzyiq altında saxlanıldı.
“Müharibənin ilk günlərində Murov yüksəkliklərinin götürülməsi Ermənistanı bu imkandan məhrum etdi”
Məsələyə münasibət bildirən hərbi ekspert İbrahim Rüstəmlinin sözlərinə görə, müharibənin ilk günlərində Kəlbəcər istiqamətində strateji yüksəkliklərin götürülməsi unikal hərbi uğur idi: “Əvvəla, 44 günlük müharibə dövründə Ali Baş Komandanın hadisələrə müdaxiləsi çox ideal səviyyədə özünü göstərdi. Məsələ ondadır ki, biz 44 günlük maharibədə çox ciddi redaktələrlə üz-üzə qaldıq. Çünki müharibənin ilk günlərində müəyyən problemlər yarandı. Ancaq cənab Prezidentin bu məsələlərə vaxtında və çevik müdaxiləsi, redaktəsi nəticəsində biz qarşıya çıxan çətinlikləri aradan qaldırdıq. Kəlbəcər rayonu Azərbaycanın ən hündür dağ rayonu hesab olunur. Rayon olduqca strateji əhəmiyyətə malikdir. Məhz Kəlbəcərin 1993-cü ilin aprelində işğal olunması Ermənistanın digər rayonlarımızı da işğal etməsinə şərait yaratdı. Basarkeçər-Ağdərə yolu separatçıların əsas təchizat yolu idi. Həm hərbi, həm də digər baxımdan. Çünki bu yol Laçın dəhlizi ilə müqayisədə daha rahat və məsafəcə qısa idi. Müharibənin ilk günlərində Murov yükskəkliklərinin götürülməsi Ermənistanı bu imkandan məhrum etdi. Sözügedən yüksəkliklərin azad olunması həm də Gəncəbasar bölgəsinin təhlükəsizliyi baxımından mühüm əhəmiyyət kəsb edirdi. Bununla yanaşı, yüksəkliklərin azad edilməsi Ermənistanı məcbur etdi ki, qüvvələrinin bir qismini Ağdərə istiqamətində saxlasın. Bu da ordumuzun Cənub istiqamətində sürətlə irəliləməsinə əlverişli zəmin yaratdı. Yəni Ermənistan ehtiyat qüvvələrini Cənub istiqamətində təmərküzləşdirə bilmədi”.
Bu baxımdan hərbi ekspert Murov yüksəkliklərinin azad edilməsini hərbi nöqteyi-nəzərdən çox uğurlu əməliyyat hesab edir.
Vidadi ORDAHALLI
