“Zəngilan rayonunda bir neçə aydan sonra artıq birinci qrup keçmiş köçkünlər yerləşəcək”. Bu fikri Prezident İlham Əliyev avqustun 16-da Kəlbəcər şəhərində dövlət bayrağının ucaldılması mərasimində çıxış edərkən deyib.
“İndiki mərhələdə bizim əsas vəzifəmiz müharibənin nəticələrini möhkəmləndirməkdir, azad edilmiş torpaqlarda möhkəmlənməkdir. Azərbaycan-Ermənistan sərhədində bundan sonra da mövqelərimizi gücləndirməkdir. Yenidənqurma, bərpa işlərinə artıq start verilib, bu da əsas vəzifələrdən biridir. Keçmiş məcburi köçkünləri azad edilmiş torpaqlara tədricən qaytarmaq da gündəlikdə duran məsələdir. Mən artıq bildirmişəm, Zəngilan rayonunda bir neçə aydan sonra artıq birinci qrup keçmiş köçkünlər yerləşəcək. Eyni zamanda, Ağdam, Cəbrayıl, Füzuli və Xocavənd rayonlarında da pilot kəndlər seçildi. Artıq işlər gedir ki, o kəndlərin bərpasına start verək və vətəndaşları oraya qaytaraq. Ağdam şəhərinin baş planı təsdiqləndi, digər şəhərlərin baş planının təsdiqlənməsi yaxın aylarda nəzərdə tutulur.
Beləliklə, biz bundan sonrakı əsas hədəfləri düzgün müəyyən edərək, bu hədəflərə çatmağa da nail olacağıq. Biz bu gün buradayıq, Kəlbəcərdəyik, Azərbaycanın çox gözəl guşələrindən biri olan Kəlbəcərdəyik və biz bundan sonra burada əbədi yaşayacağıq. Yaşasın Azərbaycan! Eşq olsun Azərbaycan xalqına!”-deyə ölkə başçısı qeyd edib.
“Bir neçə aydan sonra Zəngilan ərazisinə Böyük Qayıdışın baş verməsi böyük tarixi hadisə olacaq”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, Prezidentin işğaldan azad edilən ərazilərə böyük qayıdışla bağlı verdiyi xəbər hər kəsin diqqətlə izlədiyi və arzuladığı bir məsələdir. “Biz hər birimiz bərpa olunan ərazilərimizə Böyük Qayıdışı gözləyirik. Bu hamının diqqətində olan bir məsələdir. Amma bununla bağlı müəyyən nigarançılıqlar da var, nə üçün qayıdış ləngiyir, o hansı şəkildə həyata keçiriləcək və sair. İnsanlar bir az da səbrsizlik edirlər, öz yurdlarına daha tez qayıtmaq istəyirlər və bu da təbiidir, başadüşüləndir. Gördüyümüz kimi, Prezident Zəngilana ilk qayıdışla bağlı anons verdi və Zəngilanda “ağıllı kənd” salınır. Proqnozlara görə, keçmiş köçkünlərimiz gələn ilin əvvəllərində öz yurdlarına qayıdacaqlar. Azərbaycanın bu sahədə müəyyən qədər təcrübəsi var. Yəni Cəbrayılın işğaldan azad olunmuş Cocuq Mərcanlı kəndinə də insanlar köçürülmüşdü, orada onlar üçün hər cür şərait yaradılmışdı. Hesab edirəm ki, keşmiş məcburi köçkünlərin öz yurdlarına qayıtması üçün texniki cəhətdən Azərbaycanın heç bir problemi yoxdur. Sadəcə olaraq, Böyük Qayıdış çox geniş, əhatəli, miqyaslı, vaxt tələb edən prosesdir. Arzuedilən odur ki, Böyük Qayıdış prosesi ilə bağlı bütün rayonlar üzrə iş getsin, insanlar daha çox sayda, böyük sürətlə öz yurdlarına qayıtsınlar. Bir neçə aydan sonra Zəngilan ərazisinə Böyük Qayıdışın baş verməsi böyük tarixi hadisə olacaq. Ağdamın bərpa olunması və ora qayıdışla da bağlı söhbətlər həmişə olub. Bizim də bir qrup ağdamlı ilə Prezidentə müraciətimiz olub. İndi də o fikir gündəmdədir. Bildiyim qədər, Prezident Administrasiyasında bu məsələ ətrafında işlər gedir, verilən təkliflərin nəzərə alınması vacibdir”.
A.Nağının sözlərinə görə, Böyük Qayıdışın Zəngilan rayonunu əhatə etməsi də diqqətçəkəndir. “Böyük Qayıdış prosesinə Zəngilandan başlanılması heç də təsadüfi deyil, bunun böyük tarixi, siyasi anlamı var. Şərqi Zəngəzurda artıq tikinti, quruculuq-bərpa işlərinə başlanması və qısa müddət ərzində zəngilanlıların öz yurdlarına qaytarılması planı olduqca müsbət haldır. Bütövlükdə, Böyük Qayıdış insanların böyük səbrsizliklə, böyük ruh yüksəkliyi ilə gözlədiyi, hazırlaşdığı bir prosesdir. Dövlət səviyyəsində də bu proseslər planlı, ardıcıl şəkildə həyata keçirilir, davamlı şəkildə aparılır. İnanırıq ki, Böyük Qayıdış tez bir zamanda əhatəli şəkildə, böyük miqyasda həyata keçiriləcək”-deyə A.Nağı vurğuladı.
İradə SARIYEVA
