“İkinci Qarabağ müharibəsi tarixi Zəfərimizdir. Azərbaycanın çoxəsrlik tarixində buna bənzər qələbə olmamışdı. Müharibə ilə bağlı artıq kifayət qədər məlumatlar var və təkrar etmək istəmirəm. Müharibənin gedişatı hər kəsə məlumdur. Sadəcə olaraq, indi bizim dərsliklərimizdə, elmi əsərlərdə, məqalələrdə, kitablarda müharibə ilə bağlı və müharibədən əvvəlki dövrlə bağlı çox müfəssəl və geniş məlumat verilməlidir ki, biz bu tarixi olduğu kimi qeyd edək, bu tarixi olduğu kimi yazaq və gələcək nəsillər də daim bunu bilsinlər və unutmasınlar, o cümlədən erməni vəhşiliyini unutmasınlar”.
Bunu Azərbaycan Prezidenti İlham Əliyev avqustun 16-da Kəlbəcər şəhərində dövlət bayrağının ucaldılması mərasimində çıxış edərkən deyib.
Prezident çıxışı zamanı qeyd edib ki, İkinci Qarabağ müharibəsində erməni mifologiyası da tamamilə məhv oldu: “Uzun illər ərzində, otuz il ərzində ermənilər dırnaqarası “hərbi qələbə” ilə öyünürdülər. Ermənilər bir neçə mif uydurmuşdular ki, onların ordusu “yenilməz ordu”dur və onların ordusu bu torpaqları əbədi işğal altında saxlaya bilər. Biz bu mifi dağıtdıq. Erməni ordusu yoxdur bu gün. Erməni ordusu tamamilə məhv edildi. Erməni ordusunun silah-sursatlarının mütləq əksəriyyəti məhv edildi, ya da ki, qənimət kimi götürüldü və indi Hərbi Qənimətlər Parkında nümayiş etdirilir. Biz erməni ordusunu “yenilməz ordu” kimi təqdim edən mifologiyaya son qoyduq”.
Ölkə başçısı İlham Əliyevin qeyd etdiyi kimi, ermənilərin yaratdığı “sarsılmaz ordu” mifi Zəfər müharibəsi zamanı dağıdıldı. Ermənilərin uzun illər ərzində yaratdığı mifin qısa müddətdə dağılması nəyin hesabına oldu? Və bu mifin yenidən bərpası mümkündürmü?
“Əsl döyüşçü bir ordu yaranandan sonra Azərbaycan tərəfi döyüş meydanında Ermənistanla üz-üzə gəldi, və onlara…”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, ermənilərin mif yaratmaq təcrübəsi qədim tarixə malikdir: “Xırda xalq özünün cılızlığını dərk etdiyi üçün dünyada daha böyük görünməkdən ötrü müxtəlif sahələrə fərqli miflər uydururlar. Həmin mifləri də müxtəlif təbliğaf vasitələri ilə dünya ictimaiyyətinə çatdırmağa çalışırlar. Belə miflərin arasında ermənilərin qədim xalq olması, 1915-ci ildə soyqırıma məruz qalmaları, hətta Azərbaycan torpaqlarının elə qədim erməni ərazisi olması var. Bir sözlə, ermənilərin mif yaradıcılığı sərhədsizdir”.
Həmsöhbətimizin sözlərinə görə, ermənilər öz orduları, döyüş gücləri ilə bağlı müxtəlif miflər yaradırlar: “Azərbaycanın zəif olduğu illərdə, üstəlik daxildə qarşıdurma yaşandığı ərəfədə Ermənistan Rusiyanın köməyilə torpaqlarımızı işğal etdi. Azərbaycan artıq hərcmərclik dövrünü geridə qoyub. Ulu öndər Heydər Əliyevin atdığı təməllər üzərində Prezident İlham Əliyev çox uğurlu bir Azərbaycan qurdu. Danılmaz faktdır ki, bu gün dünyada sayılıb-seçilən Azərbaycan var. Təbii ki, bu proses ordu quruculuğu ilə paralel həyata keçirildi. Azərbaycan sıfırdan müasir, güclü, texniki cəhətdən yüksək səviyyədə təchiz edilən vətənpərvər bir ordu qurdu. Əsl döyüşçü bir ordu yaranandan sonra Azərbaycan tərəfi döyüş meydanında Ermənistanla üz-üzə gəldi. Onlara yaratdıqları mifin boş bir şey olduğunu açıq şəkildə göstərdik. Ölkə başçısı Ermənistan ordusu haqqında danışarkən qeyd etdiklərimi nəzərdə tutur”.
Günel CƏLİLOVA
