Rusiyanın Xarici işlər naziri Sergey Lavrov Beynəlxalq Avtomobil Daşıyıcıları Assosiasiyasını (BADA) Qarabağa dəvət edib.
Belə ki, Lavrovun BADA təmsilçilərini “Dağlıq Qarabağa diqqət yetirməyə” çağırdığı görüşdə səsləndirdiyi fikirlər xüsusilə erməni mətbuatında geniş şəkildə işıqlandırılıb. Rusiyanın XİN rəhbəri qeyd edib ki, sözügedən ərazidə yol infrastrukturunun bərpası prosesi gedir. O bildirib ki, bu prosesin məhz Rusiyanın iştirakı ilə gerçəkləşməsi lazımdır: “İndi orada yol infrastrukturunun bərpası ilə bağlı aktiv iş gedir. Ona görə də bu perspektivli əraziyə diqqət yetirmənizi xahiş edirəm. Bu, məncə açıq iqtisadi gəlir gətirəcək. Ancaq bizim yaxın qonşuluğumuzdakı iqtisadi inkişafın Rusiyanın aktiv iştirakı ilə baş verməsi vacibdir”.
Rusiya rəsmiləri elə davranırlar ki, sanki Qarabağın sahibi onlardır. Halbuki, hansısa beynəlxalq təşkilatı Azərbaycan ərazilərində fəaliyyətə dəvət etmək yalnız rəsmi Bakının səlahiyyətlərinə aiddir və bunun beynəlxalq hüquqa görə Rusiya XİN-ə heç bir aidiyyəti yoxdur. Lavrovun bu cür fəaliyyətində provakativ elementlər var. Ən azından, gərək o bunu Bakı ilə razılaşdıraydı. Bakı ilə razılaşdırmadan belə bir addımın atılması Azərbaycanın suverenliyinə hörmətsizlikdir. Yeri gəlmişkən onu da qeyd edək ki, bundan əvvəl Rusiya prezidenti Vladimir Putin fransalı həmkarı Emmanuel Makronu Qarabağa çağırıb.
Bir sözlə, nə baş verir? Yollar məsələsinin Lavrova nə dəxli var? Azərbaycandan xəbərsiz bu addımı atmaq nə dərəcədə doğrudur?
“Lavrov özünü Rusiyanın deyil, qondarma rejimin təmsilçisi kimi aparır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə Lavrovun bu çağrışına bir neçə aspektdən yanaşdı: “Rusiyanın xarici işlər naziri Sergey Lavrovun Beynəlxalq Avtomobil Daşıyıcıları Birliyinə Qarabağda iş imkanlarını nəzərdən keçirməyi təklif etməsi Kremlin yanlış siyasətidir. İlk növbədə ona görə ki, Qarabağa beynəlxalq təşkilatları Azərbaycan dəvət edə bilər, Lavrov yox. Azərbaycanın razılığı olmadan Qarabağda sülhməramlı qüvvələrin məsuliyyət zonasına Rusiyanın hər hansı bir şirkəti dəvət etməsi Azərbaycanın suverneliyinə təhdiddir. Göründüyü kimi, Rusiya Qarabağda sülhməramlı missiya aparmaq əvəzinə, buradakı ermənilərin yaşadığı ərazini “öz əyaləti” sayır və istədiyi qurumu bura dəvət edir. Ona görə də Sergey Lavrovun bu qeydlərinə Azərbaycan XİN etiraz etməlidir. Rusiya Azərbaycanla razılaşdırmadan və müzakirə etmədən Qarabağda istədiyi fəaliyyti həyata keçirir. Bu, sonradan ermənilərə Rusiyanın pasport verməsi ilə nəticələ bilər. Ona görə də Azərbaycan Rusiyadan Qarabağdakı bu kimi fəaliyyətə son verilməsini tələb etməlidir. Azərbaycanın razılığı olmadan hansısa beynəlxalq şirkətin buraya dəvət edilməsi qanunsuz hesab edilməlidir. Sergey Lavrovun bu dəvətində məqsəd, əsasən, Qarabağda erməniləri beynəlxalq müstəvidə bir subeykt kimi tanıtmaqdır. Moskvanın əsas siyasəti budur. Ümumiyyətlə, Rusiyaya Qarabağdan beynəlxalq müstəvidə danışmağa icazə verilməməlidir. Lavrov özünü Rusiyanın deyil, qondarma rejimin təmsilçisi kimi aparır”.
Politoloq onu da qeyd etdi ki, Rusiya bu kimi addımlara son qoymalıdır.
Vidadi ORDAHALLI
