Rusiyanın Ermənistandakı səfiri Sergey Kopırkin bu ölkənin Azərbaycan və Türkiyə ilə həmsərhəd bölgəsinə səfər edib. Bu barədə Rusiya səfirliyinin “Facebook” səhifəsində məlumat paylaşılıb. Məlumatda qeyd olub ki, diplomat və ailəsi Ararat bölgəsinin Arazdəyən qəsəbəsində olub.
Səfər zamanı səfir Kopırkin Ermənistan sərhədinin müəyyən hissələrinə də baş çəkib. O, Arazdəyən kəndində Rusiya FSB-nin Ermənistandakı Sərhəd İdarəsinin Ararat sərhəd dəstəsinin rus və erməni sərhədçiləri ilə görüşüb. Səfir, həmçinin, 1948-ci ildə türklərlə atışmada ölən rus sərhədçisi Koryakovun büstünü ziyarət edib və ailəsilə birlikdə həmin büstün önünə əklil qoyub. Qeyd edək ki, Arazdəyən qəsəbəsi Azərbaycanın Heydərabad (Sədərək rayonu) və Türkiyə ilə sərhəddə yerləşir. Məlumdur ki, dövlət sərhədinin məhz həmin ərazisində Ermənistan silahlı qüvvələri tez-tez təxribatlar törədir. Məhz belə məqamda Rusiyanın Ermənistandakı səfirinin həmin ərazini ziyarət etməsi və rus sərhədçinin büstü önünə əklil qoyması təsadüfdürmü?
Hərbi-siyasi ekspert Ramil Məmmədli “Bakı-Xəbər”ə bildirdi ki, bunu təsadüf saymaq olmaz: “Rusiyanın Ermənistandakı səfiri Sergey Kopırkin bu il tətilini Ermənistanın görməli yerləri ilə tanışlığa həsr etmək qərarına gəldiyini bildirib. Bu dəfə Sergey Kopırkin tətil səfərləri çərçivəsində Ararat bölgəsinə gəlib. Ötən həftədə isə səfir sərhədin başqa istiqamətində görünmüşdü. Təbiidir ki, bunu istirahət adlandırmaq sadəlövhlük olar. Çünki Ermənistanın gəzməli, görməli yerləri yalnız dövlət sərhədindən ibarət deyil. Rusiyalı səfir yalnız qaynar nöqtələrdə olursa, deməli, məqsəd başqa məsələdir. Fikir verirsinizsə, son vaxtlar Azərbaycana qarşı qərəzli mövqe tutan ölkələrin Ermənistandakı səfirləri tez-tez sərhədə gedib, oradan Azərbaycana boylanırlar. Bir müddət əvvəl biz İranın səfirini sərhəddə gördük. İran və Rusiyanın Qarabağla bağlı mövqeləri bizə qarşı səmimi deyil. Bu iradları bir neçə gün əvvəl Prezident də öz çıxışında ifadə etdi. Doğrudan da, Azərbaycan son günlərdə hər iki ölkənin mövqeyinə görə onlara etiraz notası təqdim edib. Hələ də onlardan rəsmi cavab gəlməyib. Rusiya Ermənistanı silahlandırır, sülhməramlı missiyanı layiqincə yerinə yetirmir. İran isə bizim icazəmiz olmadan öz yük maşınlarını Qarabağa göndərir. Təbiidir ki, belə ölkələrin səfirlərindən hansısa xoşniyyətli addımlar gözləməyə dəyməz. Səfirin bu jesti Ermənistana Rusiyanın açıq dəstəyinin nümayişi üçündür. Sərhəddəki vəziyyətlə şəxsən tanış olub, vəziyyəti siyasi rəhbərliyə məruzə edir. İstirahət hara, 1948-ci ildə ölən rus sərhədçinin bütünü ziyarət etmək hara? Bununla da demək istəyib ki, Ermənistan sərhədləri o vaxt da, indi də rusların nəzarətindədir. Lazım gələndə, hətta ruslar ölməyə də hazırdır. Bütün bu addımlar Ermənistana motivasiya vermək məqsədini daşıyır. Ancaq Rusiya bir qədər neytral davranmağa çalışmalıdır. Çünki tərəflər arasındakı arbitrlığı məhz o üzərinə götürüb. Belə addımlar isə onların neytrallığına şübhə salır. Onda sual oluna bilər: Rusiyanın Azərbaycandakı səfiri niyə bizim tərəfdən gedib sərhədi ziyarət etmir? Deməli, məqsəd bəllidir”.
Məhəmmədəli QƏRİBLİ
