Prezident İlham Əliyev “CNN Türk” televiziya kanalına müsahibəsində qeyd etdi ki, Rusiya sülhməramlı missiyasının nəzarətində olan ərazidə yaşayan ermənilərin sayı çox azdır: “Onların sayı o qədər də çox deyil. Dəqiq məlumata görə, 25 minin altındadır. Əlbəttə ki, onlar da Azərbaycan cəmiyyətinə inteqrə olunmalıdır. Azərbaycan çoxmillətli, çoxkonfessiyalı ölkədir və burada bir çox xalqlar yaşayır, bir ailə kimi yaşayır, o cümlədən ermənilər də yaşayır”.
Öz aləmində “Arsaxın” “dövlət naziri” Artak Beqlaryan guya buna cavab verib. A.Beqlaryan iddia edib ki, “Arsaxın” 25 min yox, guya 120 min sakini var. Daha sonra başından böyük qələt edərək bəyan edib ki, “Arsax” heç vaxt Azərbaycanın bir hissəsi olmayacaq.
Təbii ki, bu cür absurd açıqlamanın heç bir əsası yoxdur. Çünki rəqəmlər dəfələrlə şişirdilir. Bu, Rusiya sülhməramlıların belə açıqladığı rəqəmlərlə uzlaşmır. Baxmayaraq ki, sülhməramlıların verdiyi rəqəm də reallığı əks etdirmir. Məsələ ondadır ki, 10 noyabrdan sonra ermənilərin müəyyən hissəsi Qarabağa qayıtdı. Rusiya bəyan etdi ki, 52 min erməni Qarabağa qayıdıb. Halbuki, bu rəqəm də həqiqəti əks etdirmirdi. Üstəlik, Qarabağa qayıdan ermənilərin bir çoxu sonra oranı tərk etməli oldu. Separatçıların qondarma “dövlət naziri” isə rusların verdiyi rəqəmləri də iki dəfə şişirdərək, guya Qarabağda 120 min erməninin yaşadığını iddia edir.
“Onlar yaxşı bilirlər ki, səsləndirdikləri rəqəmlər ağ yalandır”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin sözlərinə görə, bütün bunlar onu göstərir ki, separatçılar doğrudan da başlarını itiriblər: “Bunların doğrudan da nə qədər xəstə və anormal olduqları bir daha məlum oldu. Azərbaycan Ordusu ətraf 7 rayonu, Qarabağın böyük hissəsini işğaldan azad edib. Belə olan halda rus sülhməramlıların nəzarətində olan əraziyə 120 min erməni hardan gəldi? Müharibə başlamazdan əvvəl işğal olunmuş ərazilərdə bu qədər erməni yaşamayıb. Ona görə də bu bir daha onu göstərir ki, separatçılar xəstə təfəkkürə malik anormal məxluqlardır. Onlar yaxşı bilirlər ki, səsləndirdikləri rəqəmlər ağ yalandır. Sadəcə, saxta təbliğat kampaniyası aparmaqla dünya ictimaiyyətini çaşdırmaq istəyirlər. Bu da alınmır. Ona görə alınmır ki, deyilənlərin heç bir əsası yoxdur. Bu, erməni əxlaqsızlığının nümunəsidir. Aydın olur ki, erməni əxlaqsızlığı sərhəd tanımır”.
Ən nəhayət, V.Rəhimzadə onu da qeyd etdi ki, separatçılar bununla öz mənfur niyyətlərini reallaşdıra bilməzlər.
Vidadi ORDAHALLI
