“Zəngəzur və Göyçə mahalından zorla qovulan vətəndaşlarımızın tam haqqı var ki, gedib öz dədə-baba torpaqlarında yaşasınlar. Biz bunu sonrakı mərhələyə saxlayırıq”. Bunu Prezident İlham Əliyev Kəlbəcər və Laçın səfəri zamanı deyib.
Prezidentin fikirlərinin tam olaraq tarixi gerçəkliyi və Azərbaycanın hədəflərini əks etdirdiyi məlumdur. Heç şübhəsiz, ölkə başçısının “Biz bunu sonrakı mərhələyə saxlayırıq” fikri Azərbaycanın yeni hədəflərinin ortaya qoyulması deməkdir.
Əziz Ələkbərli: “Prezident son 100 ildə, xüsusilə Qarabağ müharibəsinin ilk mərhələsində – 1988-1991-ci illərdə Azərbaycanın tarixi torpaqları olan indiki Ermənistan ərazisindəki dədə-baba yurdlarından vəhşicəsinə qovulmuş soydaşlarımızın haqqını dilə gətirib”
Milli Məclisin deputatı Əziz Ələkbərli “Bakı-Xəbər”ə şərhində bildirdi ki, Prezident İlham Əliyev son 100 ildə, xüsusilə Qarabağ müharibəsinin ilk mərhələsində – 1988-1991-ci illərdə Azərbaycanın tarixi torpaqları olan indiki Ermənistan ərazisindəki dədə-baba yurdlarından vəhşicəsinə qovulmuş soydaşlarımızın haqqını dilə gətirib: “Cənab Prezident İlham Əliyevin Kəlbəcər və Laçın səfərində səsləndirdiyi fikirlər, şübhə etmirəm ki, Ermənistanın və bütün dünya erməniliyinin başı üstündə ildırım kimi çaxıb. Əslində, cənab Prezident son 100 ildə, xüsusilə Qarabağ müharibəsinin ilk mərhələsində – 1988-1991-ci illərdə Azərbaycanın tarixi torpaqları olan indiki Ermənistan ərazisindəki dədə-baba yurdlarından vəhşicəsinə qovulmuş soydaşlarımızın haqqını dilə gətirib. Bu, tamamilə beynəlxalq hüquqa da uyğundur. Əgər bu gün Ermənistan-Azərbaycan münaqişəsi başa çatıbsa, Ermənistan kapitulyasiya aktına imza atıbsa və təbii ki, bu belədir, deməli, bu münaqişənin bütün nəticələri aradan qaldırılmalıdır. Yəni məğlub olan işğalçı Ermənistan tərəfi törətdiyi bütün faciələrin nəticəsinə qatlaşmalı, bütün ziyanı ödəməli, qalib tərəfin şərtlərinə boyun əyməlidir.
Bu gün 20-30 min erməninin Qarabağda yaşamaq “haqqından” dəm vuran ermənilər və onların zəncirini tərpədib üstümüzə hürdürənlər yaddan çıxarmamalıdırlar ki, bu münaqişənin ilkin mərhələsində 300 min azərbaycanlı min illər boyu yaşadıqları doğma ocaqlarından qovularaq 33 ildir qaçqın həyatı yaşayırlar. Bəli, cənab Prezident demişkən, “Zəngəzur və Göyçə mahalından zorla qovulan vətəndaşlarımızın tam haqqı var ki, gedib öz dədə-baba torpaqlarında yaşasınlar”. Eləcə də Dərələyəz, Dərəçiçək, Vedibasar, Gərnibasar, Zəngibasar, İrəvan, Loru, Pəmbək, Ağbaba, Şörəyel, Qırxbulaq və Qərbi Azərbaycandakı digər tarixi mahallarımızdan qovulanlar qayıdıb öz yurdlarında yaşamalıdırlar!
Cənab Prezidentin bu çıxışı biz Qərbi Azərbaycanlıları, bütün Azərbaycan xalqını bu məqsəd uğrunda mübarizədə daha sıx birləşdirir, insanlarımız millətimizin haqqını bu cür net şəkildə ifadə edən lideri ilə qürur duyur. Bu çıxışı ilə cənab Prezidentimiz Millətimizin və Dövlətimizin strateji hədəflərini bizə bir daha nişan verdi. O Millət böyük Millətdir ki, həlledici məqamlarda tarix səhnəsinə belə bir güclü Lider çıxarır! Və o Lider böyük Liderdir ki, strateji hədəflər üçün öz Millətini yenidən yetişdirməyi, formalaşdırmağı, səfərbər etməyi bacarır! Dünya azərbaycanlılarının və Azərbaycan dünyasının alternativsiz Lideri İlham Əliyev kimi!
İrəvanda görüşənədək!”
Qafar Çaxmaqlı: “...Xalqımız öz torpaqlarının sahibinə çevriləcək”
İrəvan Türk Cümhuriyyətinin (İTC) Millət Şurasının sədri, Kayseri Erciyez Universitetinin professoru, ermənişünas-alim Qafar Çaxmaqlı da “Bakı-Xəbər”ə bildirdi ki, Prezident İlham Əliyev bununla Azərbaycan xalqının sahib olduğu haqqa qovuşması üçün Azərbaycan dövlətinin bütün lazımı addımları atacağını bir daha bəyan edib. “Prezident İlham Əliyev bu məsələni, yəni Qərbi Azərbaycandan qovulub çıxarılan əhalimizin öz yurdlarına geri dönməsi məsələsini bir neçə dəfə diqqətə çatdırıb. Bu əhalinin beynəlxalq haqqıdır və onlar geri dönməlidir. Qarabağın işğaldan azad olunmamış hissəsinə erməni əhalinin geri dönüşü baş verirsə, oradan çıxmış əhalinin də öz torpaqlarına qayıtmaq haqqı tanınmalıdır. İndiki halda mövcud Ermənistan dövləti ilə sərhədlərin müəyyənləşməsi prosesi başlayır, 44 günlük savaşın diqtə elədiyi sülh sazişindən söhbət gedir. Həmin proseslərin aparılması zamanı bu məsələ danışıqlar predmeti olacaqdır. Prezidentin dediyi "sonrakı mərhələ"də onun həll edilməsi mümkündür. İrəvan Türk Cümhuriyyəti olaraq biz də əhalimizin öz torpaqlarına dönməsi prinsipinin danışıqlar prosesinə daxil edilməsini istəyirik. Yalnız Prezidentin dediyi mahallara deyil, digər ərazilərə də qərbi azərbaycanlı əhalinin yerləşdirilməsinə Ermənistanı məcbur etmək lazımdır. Kapitulyasiya sənədini imzalamış dövlət bunları etməlidir, ədalət bərpa edilməlidir. İndiki Etmənistan ərazisi bizim tarixi vətənimizdir. Bu torpaqlarda yaradılmış erməni dövləti bölgəyə ölüm, qan gətirmişdir. Gələcək perspektivdə belə bir dövlətin varlığı sual altında olacaq, xalqımız öz torpaqlarının sahibinə çevriləcək. Buna inanırıq” - deyə Q.Çaxmaqlı bildirdi.
İradə SARIYEVA
