Türkiyə-Azərbaycan birliyi artıq bölgəsəl amildir. Bəlkə də nə vaxtsa qlobal amilə çevriləcək, ola bilər. Çünki indi bizim artıq başqa ölkələrlə də müttəfiqlik əlaqələrimiz formalaşmaqdadır. Bu bəzilərini narahat edir. Çalışacaqlar ki, aramıza girsinlər, çalışacaqlar ki, provokasiyalar, təxribatlar, uydurmalar ortaya atılsın.
Bu sözləri “CNN Türk” televiziya kanalına müsahibəsində Prezident İlham Əliyev deyib. Dövlət başçısı bildirib: "Türkiyə və Azərbaycan bayraqlarının birgə dalğalanması təbiidir. Birliyimiz də əbədidir. Yeni nəsil, gənc nəsil, bax, sizin nəsliniz gərək bizim yolumuzu davam etsin. Çünki biz bu təməli qoyduq, yoluna oturtduq, çox güclü müttəfiqlik yaratdıq, sarsılmaz birlik yaratdıq. Ancaq siyasət elə bir sahədir ki, bunun üzərində hər gün çalışmalısan. Boşluq olmamalıdır, ara olmamalıdır ki, kimsə bu araya girməsin. Çünki elələri də var. Türkiyə-Azərbaycan birliyi artıq bölgəsəl amildir. Bəlkə də nə vaxtsa qlobal amilə çevriləcək, ola bilər. Çünki indi bizim artıq başqa ölkələrlə də müttəfiqlik əlaqələrimiz formalaşmaqdadır. Bu, bəzilərini narahat edir. Çalışacaqlar ki, aramıza girsinlər, çalışacaqlar ki, provokasiyalar, təxribatlar, uydurmalar ortaya atılsın. Ona görə bizdən sonra gələn nəsil bu yolla getməlidir. Bu yol əbədi olmalıdır".
Göründüyü kimi, Prezident Türkiyə-Azərbaycan əməkdaşlığının regionaldan qlobal faktora çevriləcəyinin anonsunu verir. Qlobal faktora çevrilmək necə mümkün ola bilər?
Politoloq İlqar Vəlizadə “Bakı-Xəbər”ə açıqlamasında bildirdi ki, artıq Azərbaycan regiondan kənar aktiv fəal oyunçudur: “Təbiidir ki, bu formatların çoxunda Azərbaycan Türkiyə ilə birgə iştirak edir. Son illərdə formalaşalan regional formatlar bundan xəbər verir. Azərbaycan hətta bizim regionumuza aid olmayan Pakistan kimi bir oyunçu ilə yaxından əməkdaşlıq edir. Burada Türkiyə də iştirak edir. Türkidilli ölkələrlə yaxından əməkdaşlıq çərçivəsində Türkiyə ilə əlaqələrimizin böyük önəmi var. Bu amil həmin çoğrafiyadakı münasibətlərimizin dərinləşməsinə mühüm təkan verir. Azərbaycan-Türkiyə əməkdaşlığı Avropa məkanının enerji təhlükəsizliyi üçün böyük töhfələr verir. Türkiyə tranzit ölkə, Azərbaycan isə enerji istehsalçısı və ixracatçısı olaraq fəaliyyət göstərir. Bu da Avropaya ciddi təsir göstərir. İki qardaş ölkənin belə formatlarda birgə yer alması təkcə regional deyil, həm də qlobal səviyyədə bizim təsir imkanlarımızı böyüdür. Son illər Türkiyənin dostlarının da Azərbaycana olan dəstəyi bizə imkan verir ki, Qoşulmama Hərəkatı kimi təsisatlarda aparıcı rol oynayaq. Piar olunmayan, lakin Asiyada önəmli çəkiyə malik Asiya Təhlükəsizlik Üzrə Əməkdaşlıq formatında da bizim Türkiyə ilə birgə əməkdaşlığımız var. Göründüyü kimi, qlobal təsir imkanlarımız get-gedə artır. Ümid var ki, bu tandemin qlobal təsir imkanları daha da genişlənəcək. Çünki hər iki ölkənin regionda oynadığı rol və yaratmış olduqları yeni reallıqlar bunu deməyə tam əsas verir. Artıq bu amili dünya gücləri də qəbul etməyə, hətta çoxları qısqanmağa başlayıb”.
Məhəmmədəli QƏRİBLİ
