Sosial medianın erməni seqmentlerində belə bir məlumat yayılıb ki, ermənilər sentyabrın 2-də "Arsax"ın 30 iliyini qeyd etməyə hazırlaşır. "Arsax" var ki, onun 30 illiyi də olsun? “Arsax” deyilən qondarma rejim çoxdan tarixin zibilliyinə yuvarlanıb, məhv olub. Heş şübhəsiz, separatçıların əsassız və cəfəng niyyətləri heç zaman gerçəkləşməməlidir.
Rusiya bu məsələyə necə yanaşmalıdır, hansı mövqeni göstərməlidir? Nəzərə alsaq ki, separatçıların bu "30 illik" söhbətini Rusiyadan xəbərsiz və icazəsiz ortaya atması inandırıcı deyil, bu baxımdan onların bu planlarına Rusiya sülhməramlıları səssiz qalmamalıdır.
“Tör-töküntülərin toparlanıb varlıqlarını sürdürmək iddiasına düşməsində, olmayan bir qurumun 30 illiyini keçirmək niyyətlərini ortaya qoymasında onlara dəstək olan qüvvələr var”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi icmalçı Faiq Ələkbərli “Bakı-Xəbər”ə bildirdi ki, hər kəsə “Arsax” adlı separatçı, qondarma qurumun məhv edildiyi və yalnız tör-töküntülərinin qaldığı məlumdur. “Çox təəssüf ki, məhv edilən qondarma rejimin tör-töküntüləri Rusiya sülhməramlıları, dolayısı ilə də Rusiya Federasiyası tərəfindən qorunur. Azərbaycan ordusu tərəfindən söndürülən və hazırda külü qalan separatizmi yenidən Rusiya sülhməramlıları, Fransa və bəzi başqa Qərb ölkələri alovlandırmağa çalışır. Gerçəklik budur. Əslində, şanlı Azərbaycan ordusu separatçı rejimi yerlə bir etmişdi. Ancaq 44 günlük müharibədən sonra ötən dövr ərzində qondarma rejimin tör-töküntüsü üzərindən bəlli qüvvələr nələrsə etməyə çalışır. Çox təəssüflər olsun ki, Rusiya sülhməramlılarının nəzarəti altında olan bölgələrdə bu tör-töküntüləri bir yerə yığıb “diriltmək” istəyənlər var ki, bu da uğursuzluqla nəticələnəcək. Vaxtilə Qarabağda bir qondarma rejim vardı, artıq o rejim yoxdur, yalnız onun tör-töküntüləri qalıb, olmayan bir qurumun nəyinin 30 illiyini qeyd edəcəklər, anlamıram. Bu tamamilə absurddur. Separatçıların “Arsax” adı verdiyi o qondarma rejim çoxdan məhv edilib, amma görünür ki, məhv olmuş bir nəsnəni meydana çıxarmaqda maraqlı olan tərəflər var. Bu tamamilə faydasızdır. Azərbaycan tərəfin Rusiyaya verdiyi mesajlar, Rusiya sülhməramlıları ilə bağlı açıq-aşkar ortaya qoyduğu mövqe ona görədir ki, bu ölkə Qarabağdakı tör-töküntüləri dirçəltməkdən, onun üzərindən oynamaqdan əl çəksin. Bu tör-töküntülərin dirçəlməsində maraqlı olan Rusiya da, Fransa da, başqa bu yolu tutan ölkələr də separatçıların qalıqlarını dəstəkləməməlidir. Bu anlamda Rusiyanın, Rusiya sülhməramlılarının separatçılar üzərindən oynadıqları oyunlara son verilməlidir. Onlar özləri də anlamalıdır ki, rəsmi Bakıya, Azərbaycana qarşı bu cür münasibət Azərbaycan-Rusiya münasibətlərini də ciddi şəkildə zədələyə bilər. Artıq rəsmi Bakı rəsmi Moskvanın bu hərəkətlərinə, xüsusilə də Rusiya sülhməramlılarının orada məhv olmuş qondarma rejimin tör-töküntülərinin ayaqlanmasına hər cür dəstək göstərmələrinə dözməyəcək. Şübhəsiz ki, Azərbaycan Prezidenti İlham Əliyevin ən yüksək səviyyədə ifadə etdiyi kimi, bu tör-töküntülərin, erməni faşizminin dirçəldilməsinə cəhdlər olacaqsa Azərbaycan ordusunun dəmir yumruğu onların başı üzərində olacaq. Bu dəfə daha ağır nəticə olacaq”.
F.Ələkbərli hesab edir ki, bu gün Ermənistanın revanşist qüvvələri ilə birgə separatçı rejimin tör-töküntülərinin dirçəldilməsində, hansısa 30 illiyin keçirilməsini planlamalarında maraqlı olan Rusiya sülhməramlılarıdır və Rusiyanın bəzi dairələridir. “Tör-töküntülərin toparlanıb varlıqlarını sürdürmək iddiasına düşməsində, olmayan bir qurumun 30 illiyini keçirmək niyyətlərini ortaya qoymasında onlara dəstək olan qüvvələr var. Bu gün görünən odur ki, rəsmi İrəvandan daha çox rəsmi Moskvanın bu işdə canınyananlıq göstərməsi, bu və ya digər anlamda sülhməramlıların nəzarətində olan ərazilərdə ermənilərə hər cür dəstək vermələri, hətta bölgədən getmək istəyənləri zorla saxlamaları qəbuledilməzdir. Ümid edirik, rəsmi Moskva, sülhməramlılar “30 illik” məsələsində rəsmi Bakının həssaslığını, mövqeyini nəzrə alacaq. Əks təqdirdə isə Azərbaycan-Rusiya münasibətləri mənfiyə doğru gedəcək. Hər halda inanmaq istəyirik ki, rəsmi Moskva buna yol verməyəcək, məhv olmuş qondarma rejimin tör-töküntülərinin hər hansı bir uydurma ad altında tədbir keçirməsinin qarşısını alacaq. Yəni çox şey rəsmi Moskvadan aslıdır. Rəsmi Moskva ya bu tör-töküntülərlə oyuna son verəcək, ya da Azərbaycan öz mövqeyini istər diplomatik anlamda, istərsə də döyüş meydanında ortaya qoyacaq. Şübhəsiz ki, bu dəfə isə dəmir yumrugun əzib məhv etdiyi qondarma rejimin tör-töküntülərindən əsər-əlamət qalmayacaq” - deyə F.Ələkbərli qeyd etdi.
İradə SARIYEVA
