Bu gün Ermənistan ictimai-siyasi dairələrində ən çox müzakirə edilən məsələlərdən biri də Prezident İlham Əliyevin “CNN Türk” televiziya kanalına müsahibəsində səsləndirdiyi fikirlərdir. Belə görünür ki, bu müsahibə sözün əsl mənasında Ermənistanda ciddi ajiotaja səbəb olub. Hər halda, erməni ekspertlərinin açıqlamaları, mediada yer alan fikirlər də bu qənaəti gücləndirir.
Erməni siyasi xadim Karin Tonoyan bu fonda diqqəti aşağıdakı məqama yönəldir: “Azərbaycan Prezidenti İlham Əliyev “CNN Türk” telekanalına müsahibə zamanı bildirib ki, müharibə başa çatıb və erməni xalqı da bu vəziyyətlə barışıb. O qeyd edib: “Erməni rəhbərliyi də məğlubiyyətlə barışıb və Ermənistanda keçirilmiş son parlament seçkiləri bunu göstərdi. Tarixdə görünməmiş bir mənzərədir ki, məğlub edilmiş rəhbərlik yenidən xalqdan səs alır. Belə olan halda, əlbəttə ki, Ermənistanı silahlandırmaq heç bir məntiqə sığmır”. Bu fikirləri səsləndirməklə İlham Əliyev məğlubiyyəti seçən ermənilərin 25 faizinə sillə vurub. İndi 75 faizin növbəsidir, sübut edin ki, məğlubiyyət bizi yalnız oyadıb, bizim 30 ilimiz yoxdur”. Erməni siyasi şərhçi Ramella Mnatsakanyan da eyni mövqedədir: “İlham Əliyev haqlıdır, biz həqiqətən də məğlubiyyətlə barışmışıq. Mən hətta artığını da deyərdim, biz məğluyyəti haqq etdik. Azərbaycan Prezidenti “CNN Türk” televiziya kanalına müsahibəsində Ermənistana çox vacib mesaj göndərdi. Onun sözlərinə görə, məğlub edilmiş rəhbərliyin yenidən xalqdan səs alması tarixdə görünməmiş bir hadisə idi. Əliyev tamamilə haqlıdır. Biz düşməni kənarda axtarmamalıyıq. Düşdüyümüz bu biabırçı vəziyyətdə hər birimiz günahkarıq. Bu bizim üçün heç vaxt silinməyəcək ləkə olacaq”.
Erməni hərbi ekspert Mher Hakobyan isə müsahibənin başqa tərəflərinə nəzər salır, diqqəti Azərbaycan Prezidentinin sərhədlərin müəyyən edilməsi ilə bağlı səsləndirdiyi fikirlərə yönəldir: “Bəli, müəyyən dərəcədə oyun kartları açıldı və əslində, bəzi yarımrəsmi Azərbaycan mənbələri deyirdi, rəsmi mənbələr də işarə vururdu, bizi səlahiyyətlilərimizi də inkar etmirdilər. Belə desək, demarkasiya, delimitasiya, anklavlar məsələsi və rəsmi İrəvan tərəfindən Azərbaycanın ərazi bütövlüyünün tanınmasını təsbit edəcək əsas son sülh müqaviləsidir. Faktiki olaraq İlham Əliyevin gözləntiləri var, bizim hakimiyyətimiz də bu gözləntilərin formalaşmasına qarşı getməyib”. Ermənistan parlamentinin “Ermənistan” blokunun deputatı Andranik Tevanyan da diqqəti Azərbaycan Prezidentinin dediklərinə yönəldir: “İlham Əliyev Ermənistandakı seçkilərin nəticələrindən xoşcasına təəccüblənib və sülh müqaviləsi, demarkasiya və delimitasiya məsələlərində mövqeyini sərtləşdirib”. Tevanyan qeyd edib ki, yeni genişmiqyaslı müharibə və ya ən azından yeni sərhəd gərginlikləri, yeni eskalasiya qoxusu gəlir: “Türkiyə mediasına verdiyi müsahibədə o, sülhün təsdiq edilməsinin və kommunikasiyaların açılmasının ilkin şərti olaraq Ermənistan tərəfindən Dağlıq Qarabağı Azərbaycanın tərkibində tanımağı qoyub”. “Facebook” səhifəsində Ermənistan parlamentinin keçmiş deputatı Naira Zöhrabyan isə yazır: “Ermənistanda hakimiyyət Bender prinsipi ilə müxalifətlə vəzifələri bölüşdürərkən Bakıdan neftdən başqa yeni toqquşmalar və eskalasiya qoxusu gəlir. Azərbaycan demarkasiya-delimitasiya tələblərinə yeni bir ilkin şərt əlavə edib: Ermənistan Dağlıq Qarabağı Azərbaycanın tərkibində tanımalıdır. Lakin bu hələ bu hekayənin bütün cazibəsi deyil. İlham Əliyev qətiyyətlə “Zəngəzur dəhlizi” ifadəsini qeyd edir, paralel olaraq nəinki erməni qoşununun Qarabağdan tamamilə çıxarılmasını, həmçinin Ermənistana rus silahının tədarük edilməsinin istisna edilməsini tələb edir”. Azərbaycan ərazilərində Rusiya sülhməramlı qüvvələrinin məsuliyyət zonasında olan ermənilər də ciddi narahatdır. Bunu qondarma qurumun “nümayəndəsi” Metakse Hakobyanın açıqlamaları da təsdiq edir: “Düşünürəm ki, Azərbaycanın istədiyi kimi erməni qoşunları Qarabağdan çıxarılacaq. Nikol Paşinyan Azərbaycanın bu tələbini də yerinə yetirəcək, Azərbaycan səlahiyyətlilərinə qarşı çıxmaq üçün onun hər hansı qolu yoxdur”. Onun sözlərinə görə, zamanla Nikol Paşinyanın bu tələbi yerinə yetirəcəyi birmənalıdır.
Türkiyəli siyasi şərhçi Ragıp Kutay Karaca ermənilərin bir müsahibədən doğan əndişəsini təsadüf hesab etmir. Onun sözlərinə görə, İlham Əliyevin Türkiyənin “CNN Türk” televiziyasına verdiyi müsahibədə diqqət çəkən ən önəmli məqamlardan biri də Azərbaycan liderinin Ermənistanın delimitasiya və demarkasiya işlərinə başlaması ilə Azərbaycan-Ermənistan münasibətlərinin diplomatik cəhətdən rəsmiləşəcəyini bildirməsidir: "Bu çox önəmli məqamdır. Ermənistanın sərhəd xəttinin 75%-i Azərbaycan və Türkiyə ilədir. Bu mənada, Ermənistan Azərbaycan Prezidenti İlham Əliyevin müasir düşüncəyə uyğun, diplomatik və ağıllı təklifini qəbul etməklə özünü günü-gündən kasıblaşan, üfüqləri daralan dövlət kateqoriyasından çıxara bilər. Bununla da Türkiyə, Azərbaycan və digər region dövlətləri ilə ticarət əlaqələri, loqistik münasibətləri, iqtisadi vəziyyəti normallaşa bilər, bundan da ən çox qazanan elə erməni xalqı olacaq".
Samirə SƏFƏROVA
