“Mən bir neçə dəfə öz sözümü açıq demişdim ki, biz istəyirik Ermənistanla sülh müqaviləsi imzalansın. Ermənistan və Azərbaycan bir-birilərinin ərazi bütövlüyünü tanısınlar və sərhədlərin delimitasiyası, yəni, müəyyən edilməsi prosesi də başlasın. Ancaq bu günə qədər Ermənistandan müsbət cavab almamışıq. Belə görünür ki, Ermənistan buna hazır deyil, ya da bunun əleyhinədir. Mən söylədim ki, bu böyük yanlışlıq olar və onlar özləri də peşman olacaqlar. Çünki biz bu təklifi masa üzərində əbədi saxlamalı deyilik. Əgər buna etiraz edirlərsə, açıq söyləsinlər ki, onlar Azərbaycanla sülh müqaviləsi imzalamaq istəmirlər. Belə olan halda biz də öz siyasətimizi buna uyğun şəkildə aparacağıq. Əgər Ermənistan buna hazırdırsa, əgər Azərbaycanın bütün dünya tərəfindən tanınan ərazi bütövlüyünü tanımağa hazırdırsa, onda əlbəttə ki, bölgəyə uzunmüddətli sülh gələcək. Biz bunu istəyirik və eyni zamanda, buna nail olmaq üçün indi konkret təkliflər də masa üzərindədir”. Bunu Prezidenti İlham Əliyev “CNN Türk” televiziya kanalına müsahibəsində deyib.
Prezident açıq dedi ki, sülh müqaviləsi təklifini əbədi olaraq masa üzərində saxlamaq fikrində deyilik, Ermənistan sülh istəmirsə desinlər, biz də işimizi bilək. Prezident nə demək istədi?
“Dövlət başçımız bununla demək istədi ki, məğlub, süquta uğrayan və güclə ayaqda qalan Ermənistan, belə davam edərsə, hətta Rusiyanın ona silahlar verməsinə baxmayaraq, bu dəfə daha sarsıdıcı zərbələr altında qala bilər”
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, Prezident İlham Əliyevin CNN Türk televiziya kanalına müsahibəsi zamanı səsləndirdiyi fikirlərin hər biri kifayət qədər həssas və incə məqamları ehtiva etməsi ilə yanaşı, həm də regiondakı mövcud mühitin yaxın gələcəkdəki perspektivlərini müəyyən etmiş oldu. “Bu gün artıq həll olunmuş Qarabağ münaqişəsinin birdəfəlik tənzimlənməsi üçün sülh sazişinin imzalanması mühüm şərtlərdəndir. Lakin gördüyümüz kimi, Ermənistandakı növbədənkənar parlament seçkilərindən sonra yenidən baş nazir vəzifəsinə seçilmiş Nikol Paşinyan öz təbirincə siyasi ritorikasını dəyişdiyini sanır, hətta 44 günlük müharibədən əvvəlki qeyri-ciddi davranışlarını yenidən təkrar etməyə cəhdlər göstərir – istər Zəngəzur dəhlizi məsələsində, istər sərhədlərin delimitasiyası və demarkasiyası məsələsində, istərsə də Laçın dəhlizi vasitəsilə gizli, ya da aşkar şəkildə Rusiya sülhməramlıları kontingentinin nəzarətlərindəki ərazilərdən erməni silahlı qüvvələrini Azərbaycan ərazilərinə sızdırması məsələsində... Cənab Prezident əsasən bu faktlarla bağlı sualları cavablandırarkən bir daha və bəlkə də sonuncu xəbərdarlıqlarını istər İrəvana, istərsə də son vaxtlar İrəvanın havasına oynayan Rusiyaya sərt, həmçinin incə mesajlar xarakterində yolladı. O cümlədən, Rusiyanın Ermənistanı silahlandırması siyasətinin də İrəvan üçün heç bir səmərə verməyəcəyini deməsi ilə Bakıdakı Qənimətlər Parkı istiqamətini göstərdi. Dövlət başçımız bununla demək istədi ki, məğlub, süquta uğrayan və güclə ayaqda qalan Ermənistan, belə davam edərsə, hətta Rusiyanın ona silahlar verməsinə baxmayaraq, bu dəfə daha sarsıdıcı zərbələr altında qala bilər. Yəni fakt budur ki, cənab İlham Əliyev açıq qaydada bəyan etdi ki, qarşı tərəf sülh istəmirsə, biz də işimizi bilək və üçtərəfli bəyanatda tələb edilən bəndlərdəki müddəaları güc yolu ilə həll edək”.
B.Quliyevin fikrincə, başqa tərəfdən, ölkə rəhbərimiz müsahibəsi zamanı Moskvaya çatdırdı ki, İrəvanı sülahlandırmaqdansa üçtərəfli bəyanatdakı tələblərin realizə olunmasında hərəkətə keçsin, müttəfiqi Ermənistanın nazı ilə oynamasın. Siyasi ekspert həmçinin bildirdi ki, heç nə əbədi deyil və gördüyümüz kimi, 30 illik işğal siyasətinə son qoyuldusa, Bakı işğaldan sonra İrəvanın inadkarlığına səbr, təmkin göstərmək fikrində deyil: “Bu baxımdan, dövlət başçımızın CNN Türk-ə müsahibəsi və bəyanatları ayrı-ayrılıqda ismarıc rolunu oynayır və həmin ismarıclar yollanan tərəflər həqiqətən də Cənubi Qafqazda sülh, inkişaf və tərəqqi, eləcə də xalqların inteqrasiyasını istəyirlərsə, bu zaman tələb edilən qaydaları pozmamalı, onlara dürüstlüklə riayət etməlidirlər. Bu gün regionun aparıcı güclərinə çevrilən Türkiyə və Azərbaycan gerçəkliyi unudulmamalıdır. Bu güclər çox qısa zamanda və vahid şəkildə dünya güclərinə çevrilmək məqsədini ortaya qoyublar. Bizimlə əməkdaşlıq, dostluq, partnyorluq, hətta müttəfiqlik etmək istəyən tərəflər ilk növbədə tələb edilən prinsiplərə uymalı, müxtəlif qeyri-ciddi iddialardan əl çəkməlidirlər. Prezident İlham Əliyev öz müsahibəsində bu və bu kimi digər mühüm məsələləri diqqətə çatdırmış oldu”.
İradə SARIYEVA
