“Zəngəzur dəhlizinin tam fəaliyyəti üçün həm dəmir yolu, həm avtomobil yolu olmalıdır”. Bu barədə Prezident İlham Əliyev “CNN Türk” televiziyasıa müsahibəsində deyib.
Ölkə başçısının sözlərinə görə, Bakı-Tbilisi-Qars dəmir yolu sayəsində Türkiyə ilə birləşdik: “Zəngəzur dəhlizi isə ikinci bir birləşmə istiqaməti olacaq. Beləliklə, bizim üçün yeni fürsətlər ortaya çıxacaq. Eyni zamanda, Azərbaycan öz ayrılmaz hissəsi olan Naxçıvan Muxtar Respublikası ilə də dəmir yolu ilə birləşəcək. Eyni zamanda biz tələb edirik ki, avtomobil yolu da çəkilsin - Ermənistanın nəzarəti altında olan Qərbi Zəngəzur ərazisində, Mehri bölgəsində. Çünki bu da mütləq lazımdır. Əfsuslar olsun ki, Ermənistan buna etiraz edir. Son günlərə qədər Zəngəzur dəhlizinin açılmasına etiraz etmişdi. Sadəcə olaraq, bir neçə gün bundan əvvəl orada bir müsbət fikir ortaya çıxdı ki, onlar da etiraz etmirlər. Ancaq Zəngəzur dəhlizinin tam fəaliyyəti üçün həm dəmir yolu, həm avtomobil yolu olmalıdır. Biz Bakıda avtomobilə əyləşib oradan rahatlıqla Türkiyəyə və Naxçıvana keçə bilərik”.
Prezident onu da qeyd edib ki, Zəngəzur dəhlizi bölgə ölkələri üçün də yeni fürsət olacaq. Yəni bu, həm Türkiyə, həm Azərbaycan, həm bölgə üçün və o cümlədən Ermənistan üçün yeni fürsət olacaq.
Yeri gəlmişkən onu da qeyd edək ki, ötən həftə Ermənistanın ərazilərin inkişafı və infrastruktur naziri Qnel Sanosyan Zəngəzur dəhlizinin əhəmiyyətindən danışarkən burada söhbətin yalnız dəmir yolundan getdiyini qeyd edib. O, xəttin keçmiş SSRİ zamanındakı xətt istiqamətində Azərbaycanın Naxçıvan və Ermənistanın Mehri bölgəsindən keçəcəyini vurğulayıb.
Ancaq Prezident İlham Əliyev bəyan etdi ki, dəmir yolu ilə yanaşı, avtomobil ylu da olmalıdır.
“Prezident qarşı tərəfə mesaj verdi ki, avtomobil yolu olmayacaqsa, dəmir yolu da olmayacaq”
Məsələyə münasibət bildirən ekspert Rəsul Cahangirlinin sözlərinə görə, prezident məlum açıqlaması ilə sözügedən dəhlizin birtərəfli olmayacağı ilə bağlı konkret mövqe ortaya qoydu: “Bu o deməkdir ki, Ermənistan nə qədər cəhd etsə də, yalnız dəmir yolu ilə kifayətlənə bilməyəcək. Dəmir yolu ilə yanaşı, avtomobil yolu da işə düşməlidir. Özü də ərazidə, dəmir yolundan fərqli olaraq, avtomobil yolu infrastrukturu mövcuddur. Belə olan halda niyə bu imkandan istifadə edilməsin ki? Bir növ prezident qarşı tərəfə mesaj verdi ki, avtomobil yolu olmayacaqsa, dəmir yolu da olmayacaq. Dəmir yolu Rusiya və Ermənistan üçün nə qədər vacibdirsə, bizim üçün də avtomobil yolu onun qədər vacibdir. Məsələ ondadır ki, Naxçıvanla əlaqələrin daha tez qurulması baxımından Zəngəzur dəhlizi məsafəcə çox qısadır. Eyni zamanda, bu yolla Türkiyəyə də daha tez gedib-gəlmək olar. Bunun sayəsində tərəflər həm vaxta qənaət etmiş olacaq, həm də yük və sərnişin daşımalarının effektivliyi artacaq. O üzdən, dəmir yolu ilə yanaşı, mütləq avtomobil yolu da olmalıdır. Zəngəzur dəhlizi sayəsində həm də rəqabət artacaq. Digər ölkələrdən asılılıq azalacaq. Ona görə də Ermənistan bu istiqamətdə yersiz maneələr yaratmaq siyasətindən əl çəkməlidir. Məsələlərə real baxış bucağından yanaşmalıdır”.
Ekspert onu da qeyd etdi ki, Ermənistan vaxt amilini düzgün dəyərləndirməlidir.
Vidadi ORDAHALLI
