Kilikiyada oturub Ermənistanı idarə edən katolikos Birinci Aram Nikol Pasinyana baş nazir seçilməsi münasibətilə təbrik göndərib. Təbrikində ilginc çağırış edən katolikos Ermənistanı Putinə “yox” deməyə və üçtərəfli bəyanata məhəl qoymadan müharibəni başlamağa çağırıb.
Erməni kilsəsinin yanaşmasına görə, "ərazilərin itirilməsinin" əsas günahkarı Ermənistan deyil, bu prosesin möhkəmlənməsinə kömək edən Putindir...
Ekspertlər deyir ki, katolikos Birinci Aram Kilikiyada otursa da, Ermənistanda suyu bulandırmaqdan əl çəkmir. İnsanları sülhə, əminamanlığa çağırmalı olan katolikos Ermənistanı müharibəyə, revanşizmə səsləyir. Bir müddət “müharibə qurtarmayıb. Erməni xalqı, oyan” deyə çağırış edən Birinci Aram indi də Ermənistan rəhbərliyini üçtərəfli bəyanata məhəl qoymamağa və Putinə “yox” deməyə çağırır.
“Birinci Aramın çağırışının kökündə separatizm, revanşizm, antisülh meylləri açıq şəkildə özünü göstərməklə yanaşı, həm də bu, Ermənistanı məhvə sürükləyir”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Birinci Aram Ermənistanda mövcud olan bütün hərbi və siyasi rəhbərlərə təsir göstərib. Q.Hacıyev qeyd etdi ki, katolikos hər zaman Paşinyan hakimiyyətindən narazı olub.
“Həqiqətən də təkcə erməni siyasətçilərinin, elitasının deyil, eyni zamanda dini rəhbərlərinin düşüncəsində yalnız separatizmi, revanşizmi alovlandırmaq, sülhə, əminamanlığa zərbə vurmaq kimi çirkin niyyətlər, məqsədlər var. Kim ölür ölsün, nə qədər erməni qırılır qırılsın, məhv olursa olsun, veclərinə deyil, təki onlar istəklərinə nail olsunlar. Təkcə indi deyil, tarixin ayrı-ayrı vaxtlarında ermənilər öz dini rəhbərlərinin fitvası ilə yaşadıqları ölkələrdə təxribatlar törədiblər. Birinci Aramın separatçı çağırışlarını indiyə qədər çox eşitmişik, o hər zaman erməniləri terror törətməyə çağırır. Bilirsiz ki, Qafqazda ilk Ermənistan dövləti yaranana qədər də erməni icmasını, çox da böyük olmayan erməni kütləsini erməni qriqorian kilsəsi idarə edib. Amma gördüyünüz kimi, katolikoslar öz çirkin niyyətlərini həyata keçirmək üçün erməniləri qırğına veriblər, onlara zərər də çəkdiriblər”.
Q.Hacıyevin sözlərinə görə, erməni kilsəsi hər zaman ermənilərə dəstək olan, onlara yer-yurd verən, yaşamlarını təmin edən xalqlara və dövlətlərə qarşı təxribat törədib. Q.Hacıyev deyir ki, Qafqaza, konkret olaraq Azərbaycan ərazilərinə erməniləri köçürüb gətirən Rusiya imperiyası olub, amma bu gün katolikos Ermənistanı Rusiyaya xəyanət etməyə çağırır. “Rusiya həmişə ermənilərə arxa-dayaq olub, onları Azərbaycan torpaqlarında yerləşdirib, burada onlara dövlət qurub. Amma erməni kilsəsi həmişə erməniləri Rusiyaya qarşı xəyanət yolu tutmağa təhrik edir. Birinci Aramın çağırışının kökündə separatizm, revanşizm, antisülh meylləri açıq şəkildə özünü göstərməklə yanaşı, həm də bu, Ermənistanı məhvə sürükləyir. Birinci Aram yaxşı bilir ki, Qarabağ Azərbaycan torpağıdır, Azərbaycana məxsus ərazidir, Azərbaycan öz halal torpağını işğaldan azad edib, amma o, Ermənistanı işğala, təcavüzə çağırır. Bu adam dərk etmir ki, Qarabağ Ermənistan ərazisi deyil. Birinci Aramın çağırışından bir daha o nəticəyə gəlirik ki, erməni separatizmi faşizmdən də təhlükəlidir. Ermənistanın ağır böhran vəziyyətində olduğunu, sınıq-salxaq duruma düşdüyünü, beli qırıldığını deyəsən Birinci Aram görmür, əgər görsəydi, Ermənistanı “Putinə yox” deməyə, üçtərəfli bəyannəməni pozmağa, müharibəni başlamağa çağırmazdı. Fikrimcə, Rusiya dövləti, Putin nəhayət ki, erməni katolikosun çağırışından nəticə çıxarıb Ermənistanı dəstəkləməkdən əl çəkməlidir. Birinci Aramın Ermənistanın hakim dairələrinə hər zaman təsir imkanları olub, xüsusən də diasporun xəttilə hər şeyə müdaxilə etməyə cəhd göstərib. Paşinyanın qarşısına cəfəng tələb qoyan Birinci Aram bir şeyi unudur ki, Ermənistanın nəinki müharibəyə başlamağa, heç özünü müdafiə etməyə nizami ordusu, silah-sursatı, döyüşən əsgəri belə yoxdur. Katolikosun Putini ittiham etməsinin əsas səbəbi ondan ibarətdir ki, Rusiya İkinci Qarabağ müharibəsində Ermənistan tərəfdən Azərbaycana qarşı döyüşməyib. O elə zənn edir ki, müharibədə Ermənistanın məğlub olmasının günahkarı Putindir. Unudur ki, Ermənistanı müzəffər Azərbaycan ordusu diz çökdürüb...”-deyə Q.Hacıyev qeyd etdi.
İradə SARIYEVA
