Prezident İlham Əliyev “CNN-Türk” televiziyasına müsahibəsində bir çox mətləblərə aydınlıq gətirdi, bəzi dövlətlərə açıq mesajlar göndərdi. Ölkə başçısı Qarabağdakı son vəziyyəti şərh edərkən, Rusiyanı 10 noyabr Bəyanatın tələblərini yerinə yetirməyə və Ermənistanı silahlandırmamağa çağırdı:
“Rusiyadan gözləntimiz odur ki, üçtərəfli Bəyanatın bütün müddəaları yerinə yetirilsin. Çünki bu üçtərəfli Bəyanatı Azərbaycan, Rusiya və Ermənistan rəhbərləri imzalamışlar və onların böyük qismi artıq gerçəkləşib. Amma bəzi məsələlər var ki, hələ də açıqdır. Gözləntimiz bundan ibarətdir. Rusiya Azərbaycanın qonşusu və Ermənistanın yaxın müttəfiqi kimi, əlbəttə, bu bölgədə xüsusi rol oynayır. Bu, təbiidir. Ümid edirik ki, Rusiya bundan sonra da bu bölgənin təhlükəsizliyi üçün öz səylərini əsirgəməsin və uzunmüddətli sülhü təmin etmək üçün addımlar atsın. Eyni zamanda, bizim gözləntimiz odur ki, Rusiya Ermənistanı silahlandırmasın. Biz bu məsələni Rusiya tərəfinə çatdırmışıq. Bu bizi narahat edir. Müharibə başa çatıb. Yəni erməni xalqı da bu vəziyyətlə barışıb. Erməni rəhbərliyi də məğlubiyyətlə barışıb və Ermənistanda keçirilmiş son parlament seçkiləri bunu göstərdi. Tarixdə görünməmiş bir mənzərədir ki, məğlub edilmiş rəhbərlik yenidən xalqdan səs alır. Belə olan halda, əlbəttə ki, Ermənistanı silahlandırmaq heç bir məntiqə sığmır. Biz hələ ki, bunu görmürük, müşahidə etmirik. Amma Rusiya tərəfindən bəzi açıqlamalar oldu. Bir neçə gün bundan əvvəl Rusiya müdafiə naziri Ermənistan müdafiə naziri ilə görüş zamanı söyləmişdir ki, Ermənistana Rusiya silahlarının göndərilməsi prosesi başlamışdır. Bu çox narahatedici bir məsələdir. Həm də Ermənistanın yeni müdafiə naziri çox məsuliyyətsiz açıqlamalar verdi ki, əgər Azərbaycan tərəfi Ermənistan sərhədini bir santimetr pozsa, o zaman onlar atəş açacaqlar. Yəni görünür, İkinci Qarabağ savaşı hələ ki, hər kəs üçün dərs olmadı. Əgər belədirsə, biz dərsini yenidən verməyə hazırıq. Ona görə biz ümid edirik ki, Rusiya Ermənistanı silahlandırmayacaq. Çünki buna ehtiyac yoxdur. Xankəndidə Rusiyanın sülhməramlı missiyasının nəzarəti altında olan ərazi indi təhlükəsiz ərazidir. Eyni zamanda, bizim Ermənistanla sərhədimizdə də vəziyyət bəzən narahatlıq doğurur, amma ümumilikdə sabitdir. Ona görə, əlbəttə, biz istəyirik ki, Rusiya bu məsələdə bizim narahatlığımızı nəzərə alsın. Çünki nə qədər silahlar verilsə də, yenə də güclər nisbəti dəyişməyəcək. Çünki son 30 il ərzində Rusiya Ermənistana milyardlarla dollar dəyərində pulsuz-parasız silahlar verib, - onların bir qismi indi bizim Hərbi Qənimətlər Parkında dağılmış muzey eksponatları kimi sərgilənir, - buna baxmayaraq, Ermənistan ordusu tamamilə darmadağın edilib. Biz ordumuzun silahlanmasına nə qədər lazımdır, o qədər də vəsait ayıracağıq və bunu edirdik. Sadəcə, hesab edirik ki, artıq müharibə bitdi, buna ehtiyac yoxdur. Bölgənin yenidən silahlandırılması prosesinə biz təşəbbüskar olmamışıq və deyilik. Ümid edirik ki, digər tərəfdaşlar da buna uyğun addımlar atacaqlar”.
Göründüyü kimi, ölkə başçısı açıq mətnlə Rusiyaya öz ismarıcını göndərib ki, erməniləri himayə etməkdən və ən əsası da silahlandırmaqdan əl çəksinlər. Rusiya bundan hansısa nəticəni çıxaracaqmı?
Politoloq Qabil Hüseynli “Bakı-Xəbər”ə açıqlamasında bildirdi ki, Prezidentin məlum açıqlaması çox obyektiv və cəsarətliydi: “Rusiyanın son günlər etdiyi hərəkətlər heç bir məntiqə sığmır. 10 noyabr razılaşmasının yerinə yetirilməsinə təminat verən tərəf kimi Rusiya çıxış edir. Çünki Putinin həmin sənəddə imzası var. Rusiyanın müdafiə naziri kameraların qarşısında cırtdan bir dövlətin elə cırtdan olan nazirinə qılınc bağışlayıb, ona silahlandırmanın başlandığını deyirsə, bundan hansı neytrallığı əxz etmək olar? Sonra da əlavə edir ki, Ermənistan ordusunun yeni silahlarla təmin edilməsində bütün yardımları göstərəcəklər. Üstəlik də Qarabağa silah yığırlar. Laçın koridorundan kimi istəyirlər buraxırlar. Sülhməramlı qüvvələr erməni silahlılarını bölgəyə yerləşdirməyə mane olmur. Bu həddini aşmaqdı. Başqa adı isə Azərbaycana qarşı qisasçılıq hisslərini qızışdırmaqdır. Azərbaycan Prezidenti Rusiya qarşısında haqlı tələblər qoyur. İmzalanan sənədin 4-cü bəndində deyilir ki, erməni silahlı qüvvələri bölgədən çıxarılır və ora Rusiyanın sülhməramlıları gətirilir. Biz bunun tam tərsini görürük. Belə çıxır ki, erməni silahlıları necə varsa, elə də qalıblar və Qarabağı tərk etməyiblər. Əksinə, yeni qüvvələr bölgəyə gətirilib. Şuşanın düz yaxınlığında postlar qururlar. Sanki ermənilərə status xortlatmaq üçün hazırlıq görürlər. Azərbaycan Prezidenti müsahibəsində vəziyyəti ətraflı şərh edib. Baş verənlər bizi çox narahat edir. Biz buna səbrlə yanaşa bilmərik. Bizi həmin ərazilərdə anti-terror əməliyyatları keçirməyə vadar edirlər. Son aylar ərzində Azərbaycan iki qonşu ölkəyə etiraz notası verib. Prezident də dedi ki, onlardan cavab gözləyirik. Hesab edirəm ki, həm Rusiya , həm də İran Ermənistana açıq dəstək verməkdən imtina etməlidir. Ermənistan da onların verdiyi motivasiyadan həvəslənməyə davam edəcəksə, yenidən dəmir yumruğu dadmalı olacaq”.
Məhəmmədəli QƏRİBLİ
