“Bəzi ölkələrin İkinci Qarabağ savaşı dönəmində sərgilədini siyasi mövqe onu göstərir ki, onlar Ermənistan tərəfində idilər. Onlar şər qüvvələrin tərəfində idilər, işğalçının, zalımın, vəhşinin tərəfində idilər. Heç bir izahat, məntiqə əsaslanan hər hansı bir söz onların mövqeyinə təsir etmirdi. Onlar real həqiqəti görmək istəmirdilər və bizi ittiham edirdilər, sanki biz işğalçıyıq. Mən isə deyirdim ki, biz öz torpağımızda savaş aparırıq. BMT Nizamnaməsi bu hüququ bizə verir. Hər bir ölkə özünü müdafiə edə bilər və bu hüquq Birləşmiş Millətlər Təşkilatı tərəfindən verilib. Ancaq buna baxmayaraq, bizə qarşı çox çirkin şər-böhtan kampaniyası aparılırdı. Biz bilirik bunun arxasında kimlər dayanır”.
Bu sözləri Prezident İlham Əliyev “CNN Türk” televiziya kanalına müsahibəsində deyib. Maraqlıdır, İkinci Qarabağ savaşı zamanı sərgilədiyi siyasi mövqeyə görə şər qüvvələrin, işğalçının, zalımın, vəhşinin tərəfində olan kimlər olub? Prezident kimləri, hansı ölkələri nəzərdə tutub?
“Yaxın qonşumuz, üzdə müsəlman qardaş ölkə deyib, arxada başqa cür davranan İran dövləti 30 illik işğal zamanı Ermənistan üçün nəfəslik rolunu oynayırdı”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Prezident “CNN Türk” televiziya kanalına müsahibəsi zamanı bir sıra məsələlərə aydınlıq gətirib: “İkinci Qarabağ savaşı zamanı bəzi ölkələr zalımın, şərin yanında dayandılar. Ermənistanın yanında olan ölkələrdən biri Fransa idi. Bu ölkə açıq şəkildə işğalçı ölkəyə dəstək olacağını bəyan etmişdi. Təəssüf ki, yaxın qonşumuz, üzdə müsəlman qardaş ölkə deyib, arxada başqa cür davranan İran dövləti 30 illik işğal zamanı Ermənistan üçün nəfəslik rolunu oynayırdı. 44 günlük Zəfər müharibəsi dövründə də Rusiyanın texnikası, silahlarının İranın Ənzəli limanı üzərindən və quru yolu ilə Ermənistana daşınmasını təmin edib. İran bunu təkzib də etməyib”.
Siyasi şərhçi onu da əlavə etdi ki, məlum müsahibə zamanı Rusiyaya da açıq şəkildə işarə edildi: “Danılmaz faktdır ki, bu illər ərzində Rusiya Ermənistanı silahla təmin edib, işğalçı ölkəni dəstəkləyib. 44 günlük müharibə zamanı Rusiyadan quru və hava yolu ilə Ermənistana silah, texnika daşınırdı. Bunlar faktdır. Xatırladım ki, İkinci Qarabağ müharibəsi zamanı quru yolu ilə Gürcüstan üzərindən keçməklə Ermənistana silah, texnika daşınmasının qarşısı alınıb. Gürcüstanın müvafiq qurumları bu hadisənin qarşısını alıb. Eyni zamanda, Yunanıstanın praktiki dəstəyi olmasa da, Ermənistanın yanında olduğunu açıq şəkildə büruzə verirdi. Baxmayaraq ki, Yunanıstan Azərbaycanla dost ölkədir. Hesab edirəm, cənab Prezident müsahibəsində bu ölkələri nəzərdə tutub”.
Günel CƏLİLOVA
