“Kreml bütün bu baş verənlərə görə izahat verməlidir”
Prezident İlham Əliyev “CNN Türk” televiziya kanalına müsahibəsində çoxsaylı məqamlara toxunub.
Prezidentin müsahibəsində diqqəti çəkən məqamlardan biri də ondan ibarətdir ki, İlham Əliyev əvvəlki illərdən fərqli olaraq, Rusiyanı strateji tərəfdaş kimi deyil, sadəcə qonşu olaraq adlandırdı və həmin qonşunun Ermənistanı silahlandırmağa davam etdiyini anlamadığını bildirdi: “Rusiyadan gözləntimiz odur ki, üçtərəfli Bəyanatın bütün müddəaları yerinə yetirilsin. Çünki bu üçtərəfli Bəyanatı Azərbaycan, Rusiya və Ermənistan rəhbərləri imzalamışlar və onların böyük qismi artıq gerçəkləşib. Amma bəzi məsələlər var ki, hələ də açıqdır. Gözləntimiz bundan ibarətdir. Rusiya Azərbaycanın qonşusu və Ermənistanın yaxın müttəfiqi kimi, əlbəttə, bu bölgədə xüsusi rol oynayır. Bu, təbiidir. Ümid edirik ki, Rusiya bundan sonra da bu bölgənin təhlükəsizliyi üçün öz səylərini əsirgəməsin və uzunmüddətli sülhü təmin etmək üçün addımlar atsın. Eyni zamanda, bizim gözləntimiz odur ki, Rusiya Ermənistanı silahlandırmasın. Biz bu məsələni Rusiya tərəfinə çatdırmışıq. Bu, bizi narahat edir. Müharibə başa çatıb. Yəni, erməni xalqı da bu vəziyyətlə barışıb. Erməni rəhbərliyi də məğlubiyyətlə barışıb və Ermənistanda keçirilmiş son parlament seçkiləri bunu göstərdi. Tarixdə görünməmiş bir mənzərədir ki, məğlub edilmiş rəhbərlik, yenidən xalqdan səs alır. Belə olan halda, əlbəttə ki, Ermənistanı silahlandırmaq heç bir məntiqə sığmır. Biz hələ ki, bunu görmürük, müşahidə etmirik. Amma Rusiya tərəfindən bəzi açıqlamalar oldu. Bir neçə gün bundan əvvəl Rusiya müdafiə naziri Ermənistan müdafiə naziri ilə görüş zamanı söyləmişdir ki, Ermənistana Rusiya silahlarının göndərilməsi prosesi başlamışdır. Bu, çox narahatedici bir məsələdir. Biz ümid edirik ki, Rusiya Ermənistanı silahlandırmayacaq. Çünki buna ehtiyac yoxdur”.
Görünən odur ki, ölkə başçısı sözügedən məsələdə Rusiyanın da böyük məsuliyyət daşıdığını, məğlub olan tərəfi silahlandırmağın heç bir məntiqi əsasının olmadığını qarşı tərəfin diqqətinə çatdırdı.
Məsələyə münasibət bildirən AMİP funksioneri Əli Orucovun fikrincə, Prezidentin sözügedən məsələdə Rusiya ilə bağlı açıq danışması müsbət haldır: “Əvvəla, ölkə başçısı bununla bildirdi ki, Azərbaycan rəsmi olaraq Rusiyanın Ermənistanı silahlandırmasına susmayacaq. Hər kəsə məlumdur ki, Ermənistanın təcavüzkar siyasətinin arxasında Rusiya dayanır. Rusiyanın himayəsi olmasaydı Ermənistan nə Azərbaycan ərazilərini işğal edə bilərdi, nə də 30 ilə yaxın əraziləri işğal altında saxlaya bilərdi. Azərbaycan toparlanaraq şükürlər olsun ki, ötən il işğal altındakı ərazilərin böyük hissəsini azad etdi. Rusiyanın müdaxiləsi və maneçiliyi olmasaydı, birdəfəlik Qarabağ erməni separatçılarından təmizlənərdi. Paradoksal hal odur ki, 10 noyabrda Rusiya imza atdığı razılaşmadan irəli gələn məsələlərin həllinə yardım etmir. Əksinə, bunu tormozlamağa çalışır. Məsələ ondadır ki, Rusiya erməni silahlı birləşmələrinin Qarabağdan çıxmasını təmin etmək əvəzinə, onların yenidən komplektləşdirilməsinə birbaşa şərait yaradır. Bu isə Rusiyanın öz öhdəliklərinə əməl etməməsinə dair əyani sübutdur. Hansı ki, məğlub tərəfi yenidən silahlandırmağın məntiqi əsası yoxdur. Bəlli olur ki, Rusiya bölgədə dayanıqlı sülh və sabitliyin bərqərar olmasında maraqlı deyil. O baxımdan Kreml bütün bu baş verənlərə görə izahat verməlidir. Ən başlıcası, Rusiya 200 ildir Cənubi Qafqazda həyata keçirdiyi “parçala hökmranlıq et” siyasətinə son qoymalıdır”.
Partiya funksioneri onu da qeyd etdi ki, Azərbaycan qalib tərəf kimi davamlı olaraq separatçı tör-töküntülərin silahlandırılmasına dözməyəcək.
Vidadi ORDAHALLI
