10 noyabrdan sonra istər Ermənistanın, istərsə də Rusiya sülhməramlılarının bütün cəhdlərinə baxmayaraq, ermənilərin Qarabağa geri qaytarılması cəhdləri səmərə vermir. Bir neçə ay əvvəl rus sülhməramlılarının rəhbəri 52 min erməninin geri qayıtdığını bildursə də, bu ciddi qəbul olunmadı. Eyni zamanda məlum oldu ki, qayıdan ermənilərin bir qismi sonra yenidən oranı tərk edib.
Artıq vəziyyət o həddə gəlib çatıb ki, Qarabağda üzdə olan separatçılar da bunu etiraf etmək məcburiyyətində qalıblar. Bu baxımdan separatçıların “xarici işlər naziri” David Babayanın açıqlamaları vəziyyətin kritik olmasından xəbər verir. Babayan ermənilərin Qarabağda qalmaq istəmədiyini açıq şəkildə etiraf edib: “Burada yaşamağa davam etməliyik, Qarabağda həyat sadəcə yaşamaq deyil, xüsusi bir missiyadır. Ona görə buna davam etməliyik. Ancaq bu cəhdlər nəticə vermir, insanların ümidini, inancını gücləndirmək üçün hər şeyi etməliyik”.
Yeri gəlmişkən onu da qeyd edək ki, qondarma “nazir” bir müddət əvvəl “Komsomolskaya Pravda” qəzetinə də müsahibəsində əhalinin köçünün başlandığını etiraf edib. Babayanın növbəti etirafı bu sahədə vəziyyətin son dərəcə kritik olmasını ortaya qoyur.
“Separatçıların etirafı onu göstərir ki, onlar qarşılarına qoyduqları hədəfin utopiya olduğunun fərqindədilər”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili, politoloq Elman Nəsirovun fikrincə, separatçıların məlum etirafı bir daha onu göstərir ki, onlar qarşılarına qoyduqları hədəfin utopiya olduğunun fərqindədilər: “Eyni zamanda hər keçən gün bunu daha çox dərk edirlər. Həm də etiraf etməyə başlayıblar ki, niyyətlərini həyata keçirmək imkan və potensialı olduqca aşağıdır. Xüsusilə əsas hədəfləri odur ki, erməniləri müvəqqəti nəzarət etdikləri əraziyə köçürsünlər. Yaxud da ermənilərin kütləvi şəkildə Xankəndini tərk etməsinin qarşısını alsınlar. Ancaq görünən odur ki, hər iki proses onların niyyətlərinin əksinə cərəyan etməkdədir. Məsələ ondadır ki, Qarabağa Ermənistandan heç kəs qayıtmaq istəmir. Bununla belə, Ermənistanın özündən əhalinin həndəsi silsilə üzrə köçməsi barədə proqnozlar reallaşmaqdadır. Sadəcə, pandemiya rejimi və onun yaratdığı məhdudiyyətlər bu işə müəyyən maneələr yaradır. Eyni zamanda Qarabağda yaşayan ermənilər də hər gün bu əraziləri tərk etməkdədilər. Artıq bunu Ermənistan rəhbərliyi və separatçıların təmsilçiləri də etiraf edir. Etiraf edirlər ki, belə bir proses getməkdədir. Digər tərəfdən əhali arasında yaşanan ruh düşkünlüyünü önləmək üçün çox ciddi tədbirlərin görülməsinin vacibliyini də qeyd edirlər. Bu isə artıq boğulanın saman çöpündən yapışması anlamına gəlir. Hesab edirlər ki, təxribatlar vasitəsilə, Azərbaycana qarşı informasiya savaşı aparmaq yolu ilə buna nail olacaqlar. Ancaq bütün bunların hamısı cəfəngiyatdır. Çünki ortada Azərbaycan Silahlı Qüvvələri Ali Baş Komandanının iradəsi var. Xalq öz Ali Baş Komandanını birmənalı surətdə dəstəkləyir. Bizim yenilməz ordumuz var. Bütün bu reallıqlar fonunda erməni əhalisi niyə Qarabağı və Ermənistanı tərk etməsin ki? Bax, budur reallıüq”.
Millət vəkili hesab edir ki, bütün hallarda proseslər Azərbaycanın xeyrinə cərəyan edir.
Vidadi ORDAHALLI
